Read Thado Chin Luke 22 Bible Online

Luke 22 - Thado Chin bible

Luke 22

¹ Chuin kalchuh kut atiu cholsolou changlhah kut chu anaitan ahi.

²Chuin thempu pipuiho le danthu sunhon ama chu atha theina dingje aholtauvin ahi; ijeh-inem itile miho chu akichauvin ahi.

³Chuin somleni lah-a Iscariot atiu Judas sunga chun Satan aluttan ahi.

⁴Ama chu achen thempu pipuiho le houvaipoho toh ama chu amaho amatsah theina dingje chu akihou taovin ahi.

⁵Chuin amaho akipah-un, ama chu sum peh dingin atep taove.

⁶Hichea chun ama anomin, chule mipi umlou petcha aman ama chu amaho henga pehdoh-a matsahna thei ding agomkom aholtan ahi.

⁷Chuin kalchuh kutna kelngoi thana ding, cholsolou changlhah nikho chu ahung lhungtan.

⁸Chuin aman Peter le John asolin, Chelhonin lang kalchuh kut ineh dingu gago lhonin, ati.

⁹Chuin amanin, Hoikoma gago lhonleng nalungham? ati lhone.

¹⁰Aman ajah lhona, Ve lhonin, nangni khopi sung nalut lut lhonle twibel pu-a mi khattoh nakisuhto lhon ding ahi; ama nung chu jui lhonin, alutna in'ah lut lhonin.

¹¹Chule hiche in neipa jah-a chun, Houhilin nangma henga hitin aseije, Kaseijuite toh kalchuh kut an kanehna ding indan chu hoilaiham? ati, gati lhonin.

¹²Chule amapa chun in dan chungnung lentah gotsadem khat navetsah lhon ding ahi; hikoma chun anago lhontan, ati.

¹³Chuin amani ache lhonin, aman ajah lhona aseibang bang chun agatoh lhonin, kalchuh kut agagong lhontan ahi.

¹⁴Chuin aphat alhinin, ankong aumtan, chule solchah somleni ho chun aum piuvin ahi.

¹⁵Chuin aman ajah uva, Kathohgim masanga nang hotoh kalchuh kut an nehkhom ding hi katup lheh jenge.

¹⁶Ijeh-inem itile nangho jah-a kasei ahi, Pathen lenggama hiche hi aguilhun masangse-a kaneh lou ding ahitai, ati.

¹⁷Chuin aman khon chu alan, athangvah-in, Hiche hi kilah unlang kihom-un;

¹⁸Ijeh-inem itile kaseipeh nahiuve, Pathen lenggam hung lhun kahse-a, keiman tukala lengpiga twi kadon lou ding ahitai, ati.

¹⁹Chuin changlhah alan, athangvah-in, ahehbal balin, amaho chu apen, Hiche hi nangho dinga kipe-a katahsa ahi; keima neihet jingna dingun hiche hi bolun, ati.

²⁰ Chuin chutima chun khon chu alan a-anneh jouvun, Hiche khon hi kathisana kitepna thah, nangho dinga kisodoh chu ahi.

²¹ Ahivanginla, veuvin, eipedoh-a pang dingpa khut chu dokhanga hin keitoh kaum khome.

²²Mihem Chapa chu akigon banga chonpeh ding ahi; ahivangin apedoh-a pang mipa chu adana-e! ati.

²³Chuin amahon alah uva chutobang thilbol ding chu koipen ahi dingu akidongto taovin ahi.

²⁴ Chuin alah uva koipen chu achungnung penin akiseidem tia kinelna asohdoh tan ahi.

²⁵ Chuin aman ajah uva, Chidang namdangho lengho khu achunguva alal lheh-un; chule achunguva thunei ho khu phatna bol akitiuve.

²⁶ Nangho vang nachuti lou dingu ahi; ahin nalah uva alenjo chu aneojo bangin umhen, chule apipen chu lhachale bangin umhen.

²⁷ Ijeh-inem itile ankonga toule alhachale koijoh lenjo-em? Ankonga toujoh chu hilouham? Ahinla keima nangho lah-a lhachale bangin kaume.

²⁸Ahivangin eiki patepna-a eiumpi jingpeh nangho nahiuve.

²⁹Chule ka Pan keima eigotpeh banga, keiman nangho lenggam khat kagotpeh nahiuve;

³⁰ Chutia chu kagam sunga kadokhang chunga naneh-a nadon uva, chule nangho lal touna-a natou uva Israel phung somle phung ni thu natan dingu ahi.

³¹Chuin Pakaiyin aseijin, Simon, Simon, ven, chang kilhichil banga lhitchil dingin Satan'in nathume;

³²Ahivangin natahsan alosam louna dingin kataopeh-e: chule nangman nalung nahei kit nungle nasopiteho jong naphudet ding ahi, ati.

³³Chuin aman ajah-a, Pakai, nangma toh songkul le thina-a chetha dinga kigosa dema umjing kahi, ati.

³⁴Chuin aman ajah-a, Peter, kaseipeh nahi, nangman keima neihet hi thumvei naseilep masangse-a tunia ahchal khong lou ding ahi, ati.

³⁵ Chuin aman amaho jah-a, Keiman nangho kengchot selou, sumbom keng lou, chule sakhao keng louva kasoluva chu ima nalhahsam nao umji-am? ati. Chuin amahon, Aumjipoi, atiuve.

³⁶Chuin aman ajah uva, Tu vangin sumbom nei neijan kiken hen; chutima chun sakhao jong kiken hen; chule chemjam nei lou louvan asangkhol johhen, chemjam khat kichoh hen.

³⁷ Ijeh-inem itile kaseipeh nahiuve, Ama michonseho toh kisimtha ahitai, tia thu kisun chu kachunga guilhung sohkei ding ahi; ijeh-inem itile keima chungchang thudol chengse kichaisoh ding ahitai, ati.

³⁸Chuin amahon, Pakai, hikoma chemjam ni aume, atiuve. Aman, Hichu aphasetne, ati.

³⁹Chuin ama achonna ngai bangin apotdoh-in, Olivet molsanga achetan; aseijuiten jong anungnung ajuijun ahi.

⁴⁰Chukom mun chu alhun phatnun, ajah uva, Lhepma nalhah louna dingun taovun, ati.

⁴¹Chuin ama songse phahna chan khat ache chonin, adilsun ataovin,

⁴²Hepa, naphatsahle hiche khon hi kakoma konin chon mangin; ahivangin keima lunggot bang hi louvin nangma lunggot bangjoh hihen, ati.

⁴³Chuin van'a konin vantil khat ahung kilah-in, thahat ahungpen ahi.

⁴⁴Chuin aman na asa behseh jengin, guntah-in atao kittan; chule thisan aloma tolla valha bangin, a-ul thisanin along jengtan ahi.

⁴⁵Chuin atao jouvin athoudoh-in aseijuite henga ahungin ahile, amaho lungkhama ana-imutlhuh-u ahungtoh-in,

⁴⁶Ajah uva, Nangho ibola ihmua nahiuvem? Lhepna-a nalhah louna dingun thouvun lang taovun, ati.

⁴⁷Aman chutia asei pettah chun, veuvin, mipi hon khat ahungin, solchah somleni lah-a Judas atiu chu ahung lamkaijin; chuin ama chun Jesu chop dingin akom ahin naijin ahi.

⁴⁸Ahin Jesu'n ajah-a, Vo Judas, Mihem Chapa hi chopma matsah nagot ham? ati.

⁴⁹Chuin akimvela umho chun ipi aso ding chu amuvin, ajah-a, Pakai, chemjam'a kasat dingu hitam? atiuve.

⁵⁰Chuin alah uva khatnin thempu chungnung sohpa asatle, abilkol jetlam asatlhatan ahi.

⁵¹Chuin Jesu'n ajah-a, Hichan beh hi phalun, ati. Chuin abilkol chu athamin aboldamtan ahi.

⁵²Chuin aman dinga hung thempu pipuiho, houin ngah vaipoho, chule upaho jah-a chun, Gucha michom man dinga kon banga chemjamle moltum tho-a nahung konu ham?

⁵³ Nang hotoh niseh-a houin'a kaum lai chunla keima matnan nakhut nalha pouvin; amavang tu hi nangho phat le muthim thahat ahi, ati.

⁵⁴Chuin amahon ama amanun, thempu chungnung in lama akaitaove; chuin Peter'in galkanga ajuipeh-in ahi.

⁵⁵Chuin amahon inpi leitol lailunga mei akitiuva atoukhom petnun, Peter jong amaho lah-a chun atouvin ahi.

⁵⁶Ama meikoma atou pet chun soh nungah khatnin amun, hoitah-in aven, Hichepa jong hi akiloipi ahi, ati.

⁵⁷Ahivangin aman ama chu aseilepmin, Numei ama chu kahepoi, ati.

⁵⁸Ajo chomkhat jouvin, mi adang khatnin amun, ajah-a, Nang jong alah uva khat nahi, ati. Ahivangin, Peter'in, Mipa, keima kahipoi, ati.

⁵⁹Chuin nidan khat jouvin michom dang khatnin atahti tenin, Tahbeh-in ama jong hi aloiho khat mong mong ahi; ijeh-inem itile ama hi Galilee mi ahi, ati.

⁶⁰Ahivangin Peter'in, Mipa, nasei chu keiman kahehih hele, ati. Hichu asei nalaijin, hiche pettah chun ahchal akhongtan ahi.

⁶¹Chuin Pakai chu akiheijin, Peter lam aven ahi. Chuin Peter'in, Tunia ahchal khon masanga thumvei neiseilep ding ahi, tia Pakaiyin asei chu ageldoh-in,

⁶²Chuin Peter polama apotnin lhasetah-in hakan akaptan ahi.

⁶³Chuin Jesu manna tuhho chun ama chu totnopnan abolun, chule avovin ahi.

⁶⁴Chuin ponin amit atomun, amai abehpeh-un, koiham nadenga chu gaovinlang seijin? atiuve.

⁶⁵Chule ataitom ataitomun ama gotnan thu tamtah aseijun ahi.

⁶⁶Chuin jing khovah vah-in, miho upaho chengse, thempu pipuiho, chule danthu sunho chu ahung khomun, houvaipoloi kikhopna-a chun akaijun;

⁶⁷Nangma Christa chu nahim? neisei peh-un, atiuve. Ahivangin aman amaho jah-a, Keiman nangho seipeh jongleu veng, natahsan lou dingu;

⁶⁸Chule nadong jongleu veng, neidonbut lou dingu, lha jong neilhalou diu ahi.

⁶⁹Ahivangin tua pat Mihem Chapa hi Pathen thilbolthei khut jet lama tou ding ahitai, ati.

⁷⁰Chuin amahon abonchauvin adongun, Achutile nangma Pathen Chapa nahim? atiuve. Chuin aman ajah uva, Naseiju chu kahi, ati.

⁷¹Chuin amahon, Thu hettohsah dang iding iti tah dinguham? Ijeh inem itile eihotah-in aman akamcheng tah-a asei ijataove, atiuve.