Read Thado Chin Luke 23 Bible Online

Luke 23 - Thado Chin bible

Luke 23

¹Chuin mipi kikhom chengse chu akipat doh-un, ama chu Pilate henga akaitaovin ahi.

²Chuin ahehse panun, Hichepa hin, Keima Christa leng kahi atia, Caesar kai peh ding akhama, kanampiu apuiset kamu uve, atiuve.

³Chuin Pilate'in adongin, Nangma Judah te Lengpa nahim? ati. Chuin aman adonbutnin, Naseikhai, ati.

⁴Chuin Pilate'in thempu pipuiho le mipi jah-a, Hichepa chunga khansetna imacha kamupoi, ati.

⁵Chuin amaho ahapan cheh-un, Hichepa hin Galilee gama kipanin hiche kom geijin Juda gam khotinah ahille ahillen, mi jouse achohnoh jin ahi, atitaovin ahi.

⁶Chuin Pilate'in Galilee thu ajah phah chun, Ama hi Galilee mi ham? tin adonge.

⁷Chuin ama chu Herod thuneina gam mi ahi ahet phatnin, Herod hengah asoltan ahi; ijeh-inem itile hiche laija chu ama Jerusalem'a uma ahi.

⁸Chuin Jesu amu phat chun Herod akipah lheh jengin ahi. Ijeh-inem itile aman athu ajah jeh-a sotna pat ama chu mu atup ahitan; chule thil kidang abol khattou mu ding kinem lheh ahi.

⁹Chuin Herod chun thu tamtah adongin, ahivangin aman imachan adonbutpoi.

¹⁰Chuin thempu pipuiho le danthu sunho adingun, ama chu ahehheh jengun ahi.

¹¹Chuin Herod le asepaiten nahsahmon abolun, totnopnan aneijun, pon loupi asilpeh-un, chuin Pilate heng lama ahin solkit taove.

¹²Hiche nitah chun Herod le Pilate akihou thei lhontan ahi; ijeh-inem itile chuche masanga chu kidou jing ahi lhone.

¹³Chuin Pilate'in thempu pipuiho le vaipoho chule miho chu akou khomin,

¹⁴Ajah uva, Miho apuisei tia hichepa hi kahenga nahinkaiju ahin; veuvin, keiman amo amolou phatechan na-ang sunguvah kapatepmin, nanghon nahehnao thudola chun achungah themona kamupon;

¹⁵Chule Herod jengin jong amupoi: ijeh-inem itile aman ihenguva ahinsol kit tai; chule veuvin, aman athina theilom imacha abolpoi.

¹⁶Hijeh chun keiman bolgim ingting, lhadohtange, ati.

¹⁷(Hiche kut sunga chu amaho chu mi khat alhadohpeh tei ngai ahi).

¹⁸Ahivangin amahon thakhat tah-in asamun, Hichepa hi sumangin, Barabbas neilhadoh peh-un, atiuve.

¹⁹Ama chu khopi sung chonoh jehle atoltha jeh-a songkul'a kikhuma ahi.

²⁰Chuin Jesu chu alhadoh nom jeh-in, Pilate'in ajah uva thu asei kitnin;

²¹Ahivangin amahon, Ama chu thingpel'a khenbeh-in, thingpel'a khenbeh-in, tin asamtauve.

²²Chuin aman athumvei na-in, Ibolin-em? Hichepan ipi suhset aneijem? Keiman thina theilom ama chunga ima kamupoi; hijeh chun bolgim ingting lhadoh tange, ati.

²³Ahivangin amahon aw sangtah-in ahasapcheh-un, thingpel'a akhetbeh teina dingin athumun ahi. Chuin amahole thempu pipui aw chun anehjou jotai.

²⁴Chuin athum banguva bol dingin Pilate'in thu alhuh sahtan ahi.

²⁵Chuin aman khosung chonoh le tolthat songkul'a kikhum athumpau chu alhadohpeh-in; Jesu vang chu amaho lunggot banga dingin apedohtan ahi.

²⁶Chuin akaimang phatnun, gama kona hung Cyrene gam mi Simon chu amanun, Jesu nung lama pu dingin achungah thingpel chu angamun ahi.

²⁷Chule mihonpi atamatam le a-op chum chuma kap numei mipi nasatah-in anung ajuijun ahi.

²⁸Ahin Jesu akiheijin ajah uva, Jerusalem chanute, keima neika hih-un, nangho le nachateo dingjoh-in kapmun.

²⁹Ijeh-inem itile, veuvin, Achingho le chavop khalou naobu, chule naonoi chepsah khalouho anun nomui ati nadingu hitobang nikho chu hung lhung ding ahi.

³⁰ Chutengle amahon molsang jah-a, Neilhuh khumun, atiuva lhang jah-a, Neikhu khumun neiselun, ati dingu ahi.

³¹Ijeh-inem itile amahon thing hing bon hitia abolule, thing go i-aloda dinguham? ati.

³²Hichea chun amatoh thatha ding akhang gilou adang mi ni jong apuijun ahi.

³³Chuin Calvary [1] atiu mun chu alhun phatnun, ama chu thingpelah akhenbeh-un, chule akhang giloute ni jong chu khat ajet lamah, khat avei lamah akhenbeh-un ahi.

³⁴ Chuin Jesu'n, Pa, amaho hi ngaidamin; ijeh-inem itile amahon abolu hi ahepouve, ati. Chuin avangphapha changhen tin vang akiveuvin aponsil chu akihom taove.

³⁵ Chule miho chu adingun ave jingun ahi. Chuin alah uva um vaipohon chun anelpeh-un, Midang bon huhhing-a chu; Pathen lhen Christa chu ahile, ama kihuh hinghen, atiuve.

³⁶ Chuin sepaiho jong chun totnop nan aneijun, akoma ahungun, lengpiga twi thuh apeuvin;

³⁷Juda te lengpa nahile kihuh hingin, atiuvin ahi.

³⁸Chule ama hi JUDA TE LENGPA AHI, tia Greek, Latin, chule Hebrew paova kisun hetsahna achung vumah aumin ahi.

³⁹Chuin akikhaija khang gilou teni khat chun ajonhouvin, Nangma Christa chu nahile nangma kihuh hingin lang keini jong neihuhhing lhontang, ati.

⁴⁰Ahivangin khatpa chun ama chu adonbutnin aphoh-in, Talent thakhat namat khom jenga jong, nangman Pathen jeng jong nagin louham?

⁴¹Eini hi talent man ding dol mong ihi; ajehchu ithilbol manbou ikisan ahi: hichepa vanghi ima suhset neilou ahi, ati.

⁴²Chuin aman Jesu henga, Pakai nalenggam ma nalhun teng neihe jingin, ati.

⁴³Chuin Jesu'n amapa jah-a, Tahbeh-a kaseipeh nahi, Tunia gam loupi-a [2] keimatoh i-um khom ding ahi, ati.

⁴⁴Hichu nidan gup don ahin, chua pat chun nidan ko geijin gam jouse chunga thim ahung jingin;

⁴⁵ Nisa athimtan, chule houin'a pondal len chu alailunga akeh lhan ahi.

⁴⁶ Chuin Jesu'n aw gingtah-in asamin, Pa, nakhutna kalhagao kapedoh-e, atin atantai.

⁴⁷Chuin sepai jalamkai chun thil soh umchan chu amun phatnin, Pathen avahchoijin, Hichepa hi michonpha tahbeh mong ahi, ati.

⁴⁸Chuin vetchah chu ve dinga hung khom mipi ho chun thilsoh umchan chengse chu amuvin, a-op beng bengin akinungle taovin ahi.

⁴⁹ Chule akihetpiho le Galilee gama kona ahin kilhonpi numei ho jong chu galkanga adingun, chuti thilsoh hochu amu jingun ahi.

⁵⁰Chuin, veuvin, houvai poloi lah-a chun amin Joseph atiu mikhat aumin; amachu miphatah le chonphatah ahi.

⁵¹Aman amaho kihousomna le thilbol chu ajop pon ahi. Amahi Judah ho khopi Arimathea kho-a kon ahin, chule Pathen gam ngah jinga um ahi.

⁵²Hiche mipa hi Pilate henga ahungin, Jesu long chu athumtai.

⁵³Chuin along chu alalhan, tupat pon nemin atomin, amasanga koimacha koikhahna lou song kilai lhan sunga chun alupsahtan ahi.

⁵⁴Hiche ni chu kigot ni ahin, chule cholngah nikho jong anaitan ahi.

⁵⁵Chuin Galilee'a kona ahinlhonpi numei ho chun anung ajuijun, lhanle along chu iti akoiju agaveuvin ahi.

⁵⁶ Chuin amaho kinungle uvin, lounam le thao namtui akigot uvin; chule danthupeh dungjuijin cholngah nin akicholngah-un, ahi.