Read Thado Chin Luke 24 Bible Online

Luke 24 - Thado Chin bible

Luke 24

¹Tun hapta nikho masapen jingpi matah-in agotsao thil namtui chu akichoijun, lhan lama chun midang phabep khat to lhonin ahungun, ahi.

²Ahin lhankotna kona song chu tahdohsa anaum agamuve.

³Chuin asunga alutnun ahile, Pakai Jesu long chu agamu tapouve.

⁴Chuin ahitin ahi, chuche jeh-a alungdon pettah-un, veuvin, pon avala val lahlah kisil mi ni akomuvah ahung ding lhonin;

⁵Hichun amaho tijatah a akunchah pettah-un, chuche mite ni chun ajah uvah, Athiho lah-a ibola ahinga nahol uham?

⁶ Ama hikoma aumtapoi, athoudohtai. Aman Galilee gama aum laija najah uva asei,

⁷Mihem Chapa hi michonseho khutna pehdoh-a umtei ding, chule thingpel'a kikhenbeh ding, chule nithum nileh thoudoh kit tei ding ahi, ati chu geldoh-un, ati lhone.

⁸Hichun amahon athuseiho chu ageldoh-un,

⁹Chuin lhana kon chun akileuvin, thu chucheng chu somlekhat le adangho jah-a agaseijun ahi.

¹⁰Hicheng thu chu solchah ho jah-a gaseija chu Magdalene Mariam, Joanna, Jacob nu Mariam, chule numei danghotoh ahiuvin ahi.

¹¹Ahivangin athuseiju chu amahon moh thu maimaijin anangaitou vin, ana tahsan pouve.

¹²Ahivangin Peter akipatdoh-in, lhan lama chun alhai jel-in; chuin akunsuh-in, agahven ahile tupat ponho sehseh aum chu amun, thilsoh umchan chu kidang sapumin akile tan ahi.

¹³Chuin, veuvin hiche nitah chun alah uva mi ni Emmaus kho-a ache lhonin; hichu Jerusalem'a kona ching somgup ahi.

¹⁴Amani chu chuche thilsoh umchan jouse thudol akihoulim lhonin ahi.

¹⁵Chuin ahitin ahi, amani akihoulim lhona akidohto pet lhonin, Jesu tah-in ahinnai lhonin, amani chutoh alhonin ahi.

¹⁶Amavang amanin ahet lhon louna dinga amit lhon kiphel-a ahi.

¹⁷Chuin aman ajah lhona, Nalamjot pum lhona khat le khat ipi thu kihoulim nahi lhona, nguichet nahi lhonham? ati.

¹⁸Chuin khatjoh amin Cleopas atiu chun adonbutnin, Jerusalem'a kholjin tulai thusoh umchan helou nangma changsehbou nahim? ati.

¹⁹Chuin aman amani jah-a, Ipi thu ham? ati. Chuin amanin, Pathen le miho jouse mitmu-a athu-a le athilbola themgao thahat neitah Nazareth Jesu chungchang,

²⁰Thempu pipuiho le kavaipo houvin tha dinga thu alhuhsah dinga apehdoh uva, thingpel'a athau thudol ahi.

²¹Keihonla ama chu Israelte lhatdoh dinga kakineppiu ahi: ahin hicheng tailou chun, chuti thilso-a pat tuni hi anithum ni ahitai.

²²Chujongle kaloi lah uva jingpi matah-a alhan lama gache-a numei phabep khatnin eilungdon sah-ui;

²³Amahon along agoholmo phatnun, ahung kileuvin, Keihon vantil kamuvin, ama chun, Ama ahing kit tai atie, ahung tiuve.

²⁴Chuin kaloi lah uva phabep khat lhan lama agacheule, numei ho sei bangbang chun agamuvin; ama agamu pouvin ahi, ati lhone.

²⁵Chuin aman ajah lhonah, Vo lungthimbei, themgaoho thusei jouse tahsan ding lung ngongkai ho:

²⁶Christa chun hicheng gim genthei chu athoh sohkeija, chule aloupina-a lut ding mong hilouham? ati.

²⁷Chuin Mosi'a patle themgaoho jouse-a patnin Pathen lekhabu pumpi-a ama thudol kisun jouse chu amani ahilchentan ahi.

²⁸Chuin achena dingu khokom ageijun, ama akala chepai ding bang akisai.

²⁹Chuin amanin alho lhonin, Keinitoh umnao hite; ni asaujo achetan; nilhahkon jong ahitai, ati lhone. Chuin ama amanitoh umdingin aluttan ahi.

³⁰Chuin amanitoh an nedingin atouvin, aman changlhah alan phatthei aboh-in, chuin aheh balbalin amani chu apei.

³¹Hitah chun amit lhon avah-in, ama chu ahedoh lhontan; chuin ama amitmu lhona konin amangtan ahi.

³²Chuin amani chun khatnin khat jah-a, Lampi dunga eiki houlimpi lhona Pathen lekhabu thu eihilchen lhona chu ilung soulahlah jeng hih-am? akitito lhone.

³³Hiche pettah chun akipat lhonin, Jerusalem lama akile lhonin, chule chukoma somlekhat le aumpiho mun khatna anaum khomu agatoh lhonin;

³⁴Amahon, Pakai athoudoh tahbeh mongtai; chule Simon akimusah-e, anatiuve.

³⁵Chuin lam dunga thu umchan le changlhah ahebala amanin ahetdoh lhon, imajouse chu amanin jong asei lhonin ahi.

³⁶Thu chucheng asei pettah-un, Jesu alailung uvah ahung dingin, Nachung uvah lungmon umhen, ati.

³⁷Ahivangin amahon thilha kamu ahi tin angaitouvin, akichauvin atija lheh jengui.

³⁸Chuin aman ajah uva, Ibola lung olmoa nahiuvem? Chule ibola nalunguva ginchatlel sohham?

³⁹Kakhut kakeng veuvin lang heuvin, keima kahibouve; neithamun lang veuvin; ijeh-inem itile keima neimu bangu hin lhagaovin gu le phe aneipoi, ati.

⁴⁰Hitichun aseijin, akhut akeng avetsahtan ahi.

⁴¹Ahivangin akipa jeh uva chuche-a jong atahsan lou laijuva alungdon pettah-un, aman ajah uva, Hikoma hi nehding ima them naneijum? ati.

⁴²Chuin amahon nga kikang halkhat le khoibal khat apeuvin ahi.

⁴³Chuin aman alan a-ang sunguvah anetai.

⁴⁴Chuin aman ajah uva, Keima nang hotoh iumkhom laijuva Mosi danthua, themgaoho lekhabua, chule Labu-a, keima thudol kisun jouse guilhung sohkei ding ahi tia najah uva kasei chu hiche ahi, ati.

⁴⁵Chutah chun Pathen lekhabua chu ahetdoh theina dingun alungu ahonpeh-in,

⁴⁶Chule ajah uva, Hitin akisune, Christa chun gimle genthei athoh-a, anithum nileh athi lah-a kona athodoh kit ngai ahi:

⁴⁷Chule Jerusalem'a kipan chitin namtin jah jouse-a ama mina lungheija chonset suhbeina kihil lhang ding ahi.

⁴⁸Hichengse chu aboncha ahetoh nangho nahiuve.

⁴⁹ Chule, veuvin, ka Pa thutep chu keiman nangho chunga kahinsol lhah ding ahi; amavang chunga kona thahat na-a nakivon masangseuvin, Jerusalem khopi-a hin um jengun, ati.

⁵⁰ Chuin aman amaho chu Bethany khokeng geijin apuidoh-in, akhut ajahdoh-in, amaho chu phatthei aboh-in ahi.

⁵¹Chuin ahitin ahi, chutia phatthei aboh pettah chun, amaho chu akikhenpin, chuin van'a lahtouvin aumtai.

⁵²Chuin amahon ama chu ahouvun, kipah thanom tah-in Jerusalem'a ahung kile taovin;

⁵³Chule houin'a Pathen vahchoi le vangboh-in aum jomjing taovin ahi. Amen.