Read Thado Chin Luke 4 Bible Online

Luke 4 - Thado Chin bible

Luke 4

¹Chuin Jesu Lhagao Theng dimsetnin Jordan'a konin akilen, chule Lhagaovin gamthipmah apuijin,

²Nisomli diabol lhep patepmin aumin ahi. Chule hiche phat sunga chu imacha ne lou ahin; chule chuche alhin phatnin agil akeltan ahi.

³Hichun diabol'in ajah-a, Nangma Pathen Chapa nahile, hiche song hi changlhah asona dingin thu pen, ati.

⁴ Chuin Jesu'n adonbutnin, ajah-a, hitin akisune, mihem changlhah jenga hing louding ahi, Pathen thu chengsea joh hingding ahi, ati.

⁵Chuin diabol'in molsang tah chunga apuitouvin, mitphet kah louvin vannoi leiset gam jouse avetsahtan ahi.

⁶Chuin diabol chun ajah-a, hicheng jouse chunga thuneina le aloupina nangma penge; ijeh-inem itile keima eikipedoh-a ahitan; kapeh nomnom kapeh ahi.

⁷Hijeh chun neihouva ahile aboncha nanga hi ding ahi, ati.

⁸ Chuin Jesu'n adonbutnin, ajah-a, kanunglama chen, Satan: ijeh-inem itile, hitin akisune, nangman napakai, na-Pathen chu houvinlang ama jengbou jennin, ati.

⁹Chuin Jerusalem'a apuijin chule houin tingvuma adinsah-in; chuin ajah-a, Pathen Chapa nahile, hichea konhin nangma kichomlha jengin.

¹⁰ Ijeh-inem itile, Aman nangma chungchanga avantilho nachang dingin thu pentin,

¹¹ Chule amahon akhutnuva nadop dingu ahi, achutiloule songah nakeng kisuh khah-in nate, tin akisune ati.

¹² Chuin Jesu'n adonbutnin, ajah-a, Nangman Pakai na-Pathen chu lhem patep hih-in, tin akiseije, ati.

¹³Chuin diabol'in alhep patepna chengse achaisoh phatnin, chomkhat dingin ama chu adalhatan ahi.

¹⁴Chuin Jesu Lhagao thahatnin Galilee'a akilekit tan; hichun akimvel gamtina chun athu akithangtan ahi.

¹⁵Chuin akikhopnao in tinah ahillen, mi jouse pachat-in aumtan ahi.

¹⁶Chuin aseilet dohna Nazareth kho-a ahungin; chuin achon ngaibangin cholngah nin kikhopna in'ah alutnin, sim dingin adingtan ahi.

¹⁷Chuin Isaiah themgao lekhabu apeuvin ahi. Chuin aman lekhabu chu aphongin ahile, hitia kisun laitah amudoh-in ahi:

¹⁸ Pakai Lhagao chu kachunga aume, ajehchu aman keima mivaichaho jah-a kipana Thupha hillhang ding, alung naho damsah ding, sohchangho jah-a lhadohna thu phongdoh ding, mitcho ho khomusah dinga, suhnemna umho lhadoh dinga,

¹⁹Pakai lahthei kum seiphong dinga, thao einu ahi.

²⁰Chuin aman lekhabu chu akhupmin, lhachale khutna ape kitnin, atoutan ahi. Hichun kikhopna in'a mi jousen ama jeng amit lhuh chehtauvin ahi.

²¹Chuin ajah uva, Hiche Pathen lekhabu thuhi tuni hin nanakhang sunguvah aguilhung tai, tin asei pantan ahi.

²²Hichun abonchauvin ama chu aseiphaovin, chule akam sunga soh lungsetna thu chu kidang asa lheh jengun; Hiche hi Joseph chapa hilouham? atiuvin ahi.

²³Chuin aman amaho jah-a, Nanghon, Louthem nangma kiboldamin: Capernaum'a nathilbol kajah chengseu chu hikomah nangma gama jong hin bolin, ti thuchih hi kajah-a nasei tei dingu hina hi, ati.

²⁴ Chuin aman aseikitnin, Tahbeh-a najah uva kasei ahi, Themgao koima ama gam sungah min ajop ngaipoi.

²⁵ Ahivangin tahbeh-a najah uva kasei ahi, Elijah nikho laija van akikha-a, kum thumle lha gup gam jouse-a kel alhah chun, Israel lah-a meithai tamtah aumin ahi;

²⁶ Ahin adang koima henga Elijah kisol louvin, Sidon gama Zerapath kho-a meithainu henga akisol bouvin ahi.

²⁷ Chule Elisha'n themgao phatlai chun, Israel lah-a aphah tamtah aum nan; ahinla Syria mi Naaman tilou, adang koima kiboldamtheng aumpoi, ati.

²⁸Chuin amahon thu chucheng ajah phatnun, kikhopna in sunga mi jouse chu alunghang behseh jengun,

²⁹Akipat doh-un, khosunga kon chun asondoh-un, abungbua sotlhah dingin akho chennao koldeh lama chun apuitaovin ahi.

³⁰Ahivangin akah uva akihehdoh-in achemang tan ahi.

³¹Chuin ama Galilee gama khopi khat Capernaum'a achesuh-in, chule cholngah nin miho ahiltan ahi.

³² Chule thunei tah-a thu asei jeh chun, athuhil chu kidang asa lheh jengun ahi.

³³Chuin kikhopna in'a chun lhagao boh vop mikhat aumin; chuin ama chun aw sangtah-in asamin,

³⁴Neidalhao vin! Vo Nazareth Jesu, nangle keiho ikimatnao i-um em? Eisumang uva hunga nahim? Nangma koi nahi kahenai; Pathen Mitheng chu nahi, ati.

³⁵Chuin Jesu'n ama chu aphoh-in, Thipmin, ama-a kon chun hung doh-in, ati. Chuin thilha chun ama chu alaijuvah ahehlhun, suna louvin asunga konin ahung potdoh tan ahi.

³⁶Hichun abonchauvin kidang asa lheh jengun, amahole amaho akihouvun, hiche hi ipi thuham? Ijeh-inem itile thuneitah le thahat tah-a lhagao bohho thu apehle, amaho ahung potdoh jenguve, atiuvin ahi.

³⁷Chuin chuche vel gama khotinah athu athangtan ahi.

³⁸Chuin akipatnin, kikhopna ina kon chun apotnin, Simon in'a aluttai. Chuin Simon nupanu chu hatah-a khosih-a na ahin; amanu ding chun athumpeh taovin ahi.

³⁹Chuin ama akomah adingin, akhosih chu aphoh-in ahile, alhatan ahi. Chuin amanu athoudoh paijenin, amaho jenlen apangtan ahi.

⁴⁰Chuin nisalhum konin, hivei chomchom veija ana damlou neiho chun amaho chu akoma ahin puijun; chule aman achung cheh uva akhut angamin, aboldam gamtan ahi.

⁴¹Chule thilhaho jong chu mi tamtah-a konin apotdoh-un, Nangma Pathen Chapa Christa nahi, tin asamun ahi. Chuin aman amaho chu aphoh thipmin, amahon ama Christa ahi chu ahet jeh-un, thu aseisah tapon ahi.

⁴²Chuin kho avah, phatnin apotdoh-in gamthip munah achetan; chule mipi chun aholun, ahenga chun ahungun, amaho adalhah louna dingin alho taovin ahi.

⁴³Ahivangin aman amaho jah-a, Keiman kho dang danga jong Pathen lenggam Kipana Thupha kahil lhangle ding ahi; ijeh-inem itile hiche dinga chu hinkisol kahi, ati.

⁴⁴Hichun Galilee gama kikhopna in tinah thu ahilhanglen ahi.