Read Thado Chin Luke 5 Bible Online

Luke 5 - Thado Chin bible

Luke 5

¹ Chuin ahitin ahi, mipin Pathen thu ngaidinga aneh chinto jeh-un, ama Genesaret dillen panga adingin ahi.

²Hichun aman dillen vaokama chun kong ni amun; ahivangin nga manho chu anapotdoh uva, alennu anasopmu ahi.

³Chuin ama Simon kong joh-a chun alutnin, kong chu vaokama kona themkhat atollut din asolin, chuin atouvin, kong'a chun apangin mipi chu thu ahiltan ahi.

⁴Chuin athusei angah phatnin Simon jah-a, lithuhlam jonin, nga man dingin nalen seplhan, ati.

⁵ Chuin Simon'in adonbutnin, Pipu, jan khovah keijin kabolun, imacha man louhel kahiuve; ahivangin nangma thusah-in len gahsep lhange, ati.

⁶ Chuin chutia abol phat chun, nga atama tam akhukha taovin; alennu chu akeh jengin ahi.

⁷Chuin amahon kong choma um akikoppiho chu hunga ahung hu dingun agahjap taovin ahi. Chuin ahungun akong nin asung dimun ahile alhalut dehdeh jengin ahi.

⁸Ahin Simon Peter'in hichu amun, Jesu khophang bula aboh khupmin, Vo Pakai, kakoma konin chedoh-in; ijeh-inem itile keima mi chonse kahi, ati.

⁹Hiche anga matnu chu amale aloiten kidang asah behseh jeh-u ahi;

¹⁰Chule Simon kikoppi Zebedai chapate ni Jacob le John jong chun kidang asa lhonin ahi. Chuin Jesu'n Simon jah-a, Kicha hih-in; tua pat mihem mana napan ding ahitai, ati.

¹¹Chuin amahon akongu vaokama ahintoldoh phatnun, abonchan adalhauvin anung ajuitaovin ahi.

¹²Chuin ahitin ahi, ama khopi khatna aumpetnin, veuvin, mi khat apumchanga phah aumin; chuin Jesu amu phatnin tolla aboh khupmin, Pakai, nalung ahile neidam thengsah thei ahi, tin ataotan ahi.

¹³Chuin aman akhut alhangin, athamin, Kalung ahi, damthengtan, ati. Chupettah chun aphah chu apha paihel jengtan ahi.

¹⁴ Chuin aman koima jah-a asei louna dingin akhamchah-in, Chenlang thempu gakimusah-in, chule nakibol damtheng thu dol chu amaho hettohsahnan, Mosi thupeh dungjuijin thilpeh ding dol chu gapetan, ati.

¹⁵Achuti jeng vangin ama thu dol akithang chehjengin; mipi atama tam athu ngai dingle anat kiboldam dingin ahung kikhomun ahi.

¹⁶Ahin ama chang gamthip muntin-ah achomin achedoh-in, agataovin ahi.

¹⁷Chuin ahitin ahi, hichelai chun nikhat thu ahil petnin, Galilee gama khoho le Juda gama khoho-a kon, chule Jerusalem'a kona hung Pharisai ho le danthu hilteho chu akoma atouvun ahi; chule mi boldam dingin Pakai thilboltheina chun ama aumpi ahi.

¹⁸Chuin veuvin, mihon mi langthi khat ajalkhun pumin ahinpuvin; amahon ama chu put lutna, a-anga koi dingin agouvin ahi.

¹⁹Chuin mipi jeh-a aput lutna ding kom amu lou phatnun, in chunga akaldoh-un, in chungkhu chehpheng vangkah-a chun alupna pumin alailunguva Jesu ang sungah agah khailhauvin ahi.

²⁰Chuin atahsanjeu chu amun, aman, Mipa nachonset naho kingaidam nahitai, ati.

²¹Chuin danthu sunhole Pharisai hon, Taitomna thuseipa hi hoi koiham? Pathen tailou chonset ngaidam thei koiham? tin agel pantaovin ahi.

²²Ahin agelu chu Jesu'n ahen, adonbutnin, ajah uva, Nalunguva ipi nagelu ham?

²³Nachonset naho kingaidama ahitai kitile, Thouvin lamjotnin ti hoijoh seibai jo-am?

²⁴Ahoi hita jongle leiset chungah Mihem Chapan chonset ngaidamna thahat aneije ti nahetna dingun,(langthipa jah-a chun,) Thou vin; nalupna kilah inlang, na-in'a chetan kati nahi, ati.

²⁵Chuin hiche pettah chun ama a-angsung uva athoudoh paijin, alupna chu akilah-in, Pathen vahchoi pumin a-in lama achetan ahi.

²⁶Hichun kidang asa lheh jengun, Pathen avahchoijun, Tunin thil kidangtah imuve, atiuvin akicha behseh jengtaovin ahi.

²⁷Chuin hiche jou chun ama apotdoh-in ahile, amin Levi atiu kaidong khat, kaidonna mun'a atou amun, ajah-a, Kanung hinjuijin, ati.

²⁸Chuin aman ijakai adalhan akipatdoh-in ajuitan ahi.

²⁹Chuin Levi chun ama vahnan a-in'ah golvah loupitah abolin; chule hia chun kaidongho le midang tamtah-in amaho chu ankong aumpiuvin ahi.

³⁰ Chuin Pharisai ho le alekha sunteu aseijuiteho chunga aphunun, Ibola kaidongho le chonse hotoh nanehkhom nadon khomuham? atitaove.

³¹Chuin Jesu'n adonbutnin, Ati damten louthem angaipouve; a damlouten bou angaijui.

³²Michonpha te kou-a hung kahipoi; alung heina dinguva michonse te kou-a hungjoh kahibouve, ati.

³³Chuin amahon ajah-a, Ipidinga John seijuiten an angol matchet jiuva, tao jong taojiuva chule Pharisai hon jong chuti boljiuva, nangma nungjui hon aneh uva adonjiu ham? atiuvin ahi.

³⁴Chuin Jesu'n amaho jah-a, Moulang chun aumpi laiseuva, aloite chu an na ngolsah thei ngaijum?

³⁵Amavang moulang chu akomuva kona akipuimang ni hung lhung ding ahi, chuche nile an angol dingu ahi, ati.

³⁶Chuin aman ajah uva thulem khatma aseijin, Koiman ponthah halchu ponluija abeh ngaipoi; chuti bolle athah chun asuhset ding; chule athah-a kona alah ahal jong chu alui chutoh kitoh lou ding ahi.

³⁷Chule koiman lengpitwi thah savun peng luija akhum ngaipoi; ichuti bolle, atwi thah chun apeng chu tumkeh intin, atwi jong long jalintin, peng jong mang ding ahi.

³⁸Lengpitwi thah chu peng thah-a khum ding ahibouve; chutile ania kikhehtup jia ahi.

³⁹Lengpitwi lui dona chun koiman athah don ding agopoi; ijeh-inem itile, Aluibou atuije, ati.