Read Thado Chin Luke 6 Bible Online

Luke 6 - Thado Chin bible

Luke 6

¹ Chuin ahitin ahi, amasa kichaijou anichanna cholngah nin changlei lai ajotnin ahile, aseijuiten changvui asih-un, akhutnun anoijun aneuvin ahi.

²Chuin Pharisai ho kimkhatnin, Cholngah ni-a bol ngailou ibola nabol uham? ati.

³ Chuin Jesu'n adonbutnin, ajah uva, Nanghon David le aloihon agil akel phat uva abolu chu nasim khah louvu ham?

⁴ Ama Pathen in'a alutnin, thempu tailou adangin aneh ngailou vetsahna changlhah chu alan, anen, chule aloiho jong apen ahi, ati.

⁵Chuin aman ajah uva, Mihem Chapa chu cholngah ni Pakai ahi, ati.

⁶Chuin ahitin ahi, cholngah ni chom khatnin ama kikhopna in'ah alutnin thu ahilin; chule hia chun akhut jet lang ngoi mi khat aumin ahi.

⁷Chuin danthu sunho le Pharisai ho chun ahehsetna ding amu theina dingun, cholngah ni-a aboldam em, aboldam hih em tin achang lhiuvin ahi.

⁸Ahivangin aman alungthimu chu ahen, akhut langngoipa jah-a chun, Kipatdoh-in alaija hung dingdoh-in, ati.

⁹Chuin Jesu'n amaho jah-a, Keiman thudoh khat neijung kate; cholngah ni-a apha bol angaiha, ase bol angaiham? Lhagao huhhing angaiha, suhmang angaiham? ati.

¹⁰Chuin aman amaho chu abonchauvin ave kimvelin, akhut lang ngoipa jah-a chun, Nakhut lhangin, ati. Chuin aman alhangin ahile akhut chu alangkhat bangin adamtan ahi.

¹¹Ahin amaho athangtom tuntun jengun, Jesu chunga ipi bolding ham akihoutoh pantaovin ahi.

¹²Chuin ahitin ahi, hiche lai chun ama taona mang dingin molchunga akaldoh-in; jan khovah-in Pathen henga tang louvin ataovin ahi.

¹³Chuin khovah phatnin aseijuite akouvin; chuin alah uva somleni alhengdoh-in, amaho chu aminu jong solchah asahtan ahi.

¹⁴Peter asah Simon, chule asopipa Andrew, Jacob le John, Philip le Bartholomew,

¹⁵Mathew le Thomas, Alphaeus chapa Jacob, Zealot atiu Simon,

¹⁶Jacob naopa Juda, chule ama matsah-a pang Judas Iscariot, hicheng chu ahiuve.

¹⁷Chuin amaho chutoh ahung kumlhan, jangcham-ah adingun, aseijui honkhat toh, Juda gam jousele Jerusalem'a kon, Tyre le Sidon gama twikhanglen panga kon mipi atama tam, athu ngai dingle ahiveiju kiboldam dinga hungho;

¹⁸Chuin lhagao boh suhgentheina aumnaova kona boldama umho toh ahin ahi.

¹⁹Chuin ama-a kona thilboltheina ahung potna abonchauva aboldam jeh chun, mipi chun abonchauvin ama chu tohkhah agouvin ahi.

²⁰Chuin ama akhodah-in aseijuite aven, Mivaichateho anunnom nahiuve; ijeh-inem itile Pathen lenggam chu nangho-a ahi.

²¹Tu-a gilkelteho anunnom nahiuve; ijeh-inem itile nangho nava dingu ahi. Tu-a kapteho anunnom nahiuve; ijeh-inem itile nanui dingu ahi.

²² Mihem Chapa jala min nahotbol uva, chule nachom khenuva, nahou setnuva, chule michonse tia naminu apaidoh tengule anunnom nahiuve.

²³ Hiche ni chule thanomun, kipah-in kichomum; ijeh-inem itile veuvin, van'a nasan dingu kipaman atame; ijeh-inem itile apu apateuvin jong themgaoho chutobang ma-a chu anabolu ahi.

²⁴Amavang mihaosa ho, ada nahiuve! Ijeh inem itile nanghon lungmonna alhinga naneiju ahitai.

²⁵Nangho tu-a oivaho ada nahiuve! ijeh-inem nangho nagil keldiu ahi. Nangho tu-a nuiho ada nahiuve! ijeh inem itile nangho nalunghem dingu chule naka dingu ahi.

²⁶Mi jousen na-ochat uva naseiphat tengule ada nahiuve! ijeh-inem itile apu apateuvin chutima-a chu themgao lhemho anabolu ahi.

²⁷Amavang keiman kathu ngaiho jah-a kasei ahi, Nanghon namelma teu chu ngailuvin; nahoteu chu phatbolun;

²⁸Nagaosapteu chu phatthei boh-un; nataitom teo dingin taovun.

²⁹Nabengphe langkhat benga chu langkhat jong dopeh-in; chule naponlen min nalahpehle nasangkhol jong alah ding it hih-in.

³⁰Nahenga thumchan chu pen; chule nanei nalah peh-a chu thum kit ta hih-in.

³¹ Min nangho iti nabol leu nadeijum, nanghon jong chuti chun bolun.

³²Nanghon nangailu teo jeng nangailut uva ahile, ipi pachat nachan dinguham? Ijeh-inem itile michonseho jengin jong angailuva chu amahon angailuvin ahi.

³³Chule nanghon nadinguva phaho jengseh phatna ding bolleu chun, ipi pachat nachan dinguham? Ijeh-inem itile michonse hon jong achuti bolun ahi.

³⁴Chule lemu kit dinga nakinepna hou jengseh henga peleuchun ipi pachatna nachan dinguham? Ijeh-inem itile michonse hon jong michonseho hengah ajatma mu kit dingin apejiuvin ahi.

³⁵Nangho vangin namelma teu chu ngailuvin, aphatna dingu bolun, chule mu kit ding kinemlel louvin peuvin; chutile tohphat man nasan dingu len ding, chule Chungnung pen chate nahi dingu ahi. Ijeh inem itile ama kipaje helou le miphalouho ahepin ahi.

³⁶Hijeh chun na-Pau mikhoto bangin, nanghon jong mi khotouvin.

³⁷Chule mi oimo hih-un, chutile nangho oimo-a naum lou dingu ahi; mi themmo chansah hih-un, chutile nangho jong themmo nakichan lou dingu ahi; mi ngaidamun, chutile nangho jong naki ngaidam dingu ahi.

³⁸Nanghon peuvin, chutile nangho jong nakipe dingu ahi; phatah-in tentin, sonchahkheh intin, lohchah kheh-in tin, letsetna na-op uva nasunpeh dingu ahi; ijeh-inem itile nanghon nate bang banguva chu nangho kitepeh ding nahiuve, ati.

³⁹ Chuin aman amaho jah-a thulem khat aseijin, Mitchon mitcho apui thei ngaijem? Ani lhona kokhuh-a lhalut lhonta lou dingham?

⁴⁰ Ahilpa sangin aseijui achungnung jopoi. Athep chamkim teng vangle ahilpa toh akibang bouve.

⁴¹Chule ibola nasopi mitna bohthem um chu navetna, nangma mitna thingtum umchu hedoh louva nahim?

⁴²Chule nangman nangma mitna um thingtum chu mu louva, nasopi jah-a, Sopi, namitna bohthem um chu neilahdoh sah-in, iti nati theiham? Vo miphalhem, nangma mitna um thingtum chu kilahdoh masah-in, chutengle nasopi mitna um bohthem lahdoh ding chu namuchen ding ahi.

⁴³Ijeh-inem itile thingphung pha-a aga phalou agajipoi, thingphung phalouva jong aga pha agajipoi.

⁴⁴ Thingphung jouse aga-a kihe-a ahi. Ijeh-inem itile min ling phung-ah theichang aloujipoi, lingboh-a jong lengpiga aloujipoi.

⁴⁵ Miphan alung sung thilkholna pha-a konin thilpha asodoh-in; chule miphalouvin alung sung thil kholna phalouva konin aphalou asodohjin ahi; ijeh-inem itile alung sunga aletset teng akamin aphondohji ahi.

⁴⁶Chule nangho kasei thua la chon louva ibola Pakai, Pakai, neitiu ham?

⁴⁷Koi hijongle kahenga hunga, kathusei ngaija, chule bola chu, ama chu koi tobang ham keiman nangho vetsah-unge.

⁴⁸Ama chu in sa-a, thuhtah-a lei laija, chule abul songpi chunga phut tobang ahi: chuin twisang ahung lenin, chule luidung asoh-in, in chu hasuh-in asun ahile, guntah-a kisa ahi jeh chun asulhu joutapon ahi.

⁴⁹Ahin ja chu jana-a ahia bol louva vang chu, abul beija lei chunga in sa tobang ahi; luidung asoh-in, hasuh-in asun ahile hiche in chu alhupai jengtan ahi; hiche in chu aset anasa lheh jengin ahi.