Read Thado Chin Luke 7 Bible Online

Luke 7 - Thado Chin bible

Luke 7

¹Chujouvin aman miho jah-a asei ding thu jouse aseisoh phatnin, Capernaum'a aluttan ahi.

²Chuin sepai jalamkai khat asohpa deitah hatah-in anan, athikon ahitai.

³Chuin aman Jesu thu umchan ajah phatnin, ahengah Juda mi upaho asolin, ahunga asohpa chu ahung damsah dingin angehtan ahi.

⁴Chuin amaho chu Jesu heng alhunun, pontho tah-in ataovun, Ama hi hiche hi nabolpeh-a lomtah ahi;

⁵Ijeh-inem itile aman ivaipiu hi angailu lheh jengin, amatah-in kaki khopnao in jong hi eisahpeh-u ahi, atiuvin ahi.

⁶Chuin Jesu amaho chutoh alhontai. Chuin inkom ageijin jalamkai javaipo chun agolho asolin, Jesu jah-a, Pakai, nangma hung kisugim hih-in: ijeh-inem itile nangma ka-in sunga nahung lut ding chu keima chutia kilom kahipoi.

⁷Chutichu ahin keima jong nangma henga hung dinga kilomim kakingaito poi; thu chengkhat jengcha seijin, chutile kasohpa dam jeng ding ahi.

⁸Ijeh-inem itile keima jong mi thuneina noija um kahin, keima noija sepaiho aumin; chule keiman khatpenpen chu, Chen, katile, achen; achom khat, Hungin, katile ahungin: chule kasoh jah-a, Hiche bolin, katile, aboljin ahi, ati.

⁹Chuin Jesu'n thu chucheng ajah phatnin, ama chu kidang asan adatmon, anungjui mipi jah-a chun, Keiman nangho jah-a kasei ahi, Israel lah jenga jong hitobang tahsan len kamukhapoi, ati.

¹⁰Chuin asolteho chu a-in'a akile kitnun ahile, adammoa um sohpa chu damin amutauvin ahi.

¹¹Chujou jou chun Nain atiu kho khatna achen, aseijuite le mipi nasatah khattoh alhonin ahi.

¹²Chuche kho kotpi phung ageijun, veuvin, mithi khat ahung kipun, ama chu anu chapa changkhatseh ahin, amanula meithai ahin; akhoho mi tamtah-in alhonpiuvin ahi.

¹³Chuin Pakaiyin amanu chu amu phatnin, alung ase behseh jengin, Kap hih-in, ati.

¹⁴Chuin aman anaijin thilong kong chu athamin ahile, apuho chu adingtauvin ahi. Chuin aman, Gollhang, thouvin kati nahi, ati.

¹⁵Chuin athipa chu atou doh-in, thu asei pantan ahi. Chuin aman amapa chu anu apetan ahi.

¹⁶Chuin abonchau chunga kichatna alhung tan; Ilah uva themgao chungnung khat asohdoh-e; chule Pathen'in amite aviltai, atiuvin Pathen avahchoi taovin ahi.

¹⁷Chuin Judah gam jouse-a le akimvel gam jouse-ah achungchang thu chu athangdoh sohtan ahi.

¹⁸Chuin John seijuiten chuti thu jouse chu ajah-a aseijiuvin ahi.

¹⁹Chuin John'in aseijuite mi ni akouvin, Jesu hengah asolin, Ahung dinga chu nang nahi mong hinam? Ole achom dang khat kanga dinguham? agati sah-e.

²⁰Chuin mite ni akom alhun lhonin, John Baptist-in, Ahung dinga chu nangma nahi mong hinam? Ole achom dang khat kanga dinguham? tia nahenga eihinsol lhon ahi, ati lhone.

²¹Hiche pettah-a chu Jesu'n anaho, hiseveiho, chule lhagao gilou vop tamtah aboldama, chule mitcho tamtah lungset tah-a kho amusah ahi.

²² Chuin Jesu'n adonbutnin, ajah lhonah, Che lhoninlang nathilmu chengse lhon le nathujah chengse; Iti dana mitchon kho amu-a, elbaijin lam ajotna, miphah damtheng sah-a auma, chule na-ngongin kho ajah-a, mithisa kaithouva auma, chule mivaichate Kipana Thupha kiseipeh-a hitam John jah-a gasei lhonin.

²³Chule koi hijongle keija kipal lhuhna kom nei lou chu anunnom ahi, ati.

²⁴Chuin John thupo ho chu apotdoh phatnun, aman mipi jah-a chun John thudol asei panin, Ipi ve dinga gamthipma chu nachedoh-uham? Huijin peng amut lingham?

²⁵Achutile, ipi ve dinga ba chedoh nahiuvem? Ponnem kisil miham? Veuvin, lultah-a kivonhole nomsa tah-a umho khu lengho inpi-a um ahiuve.

²⁶Ahile, ipi ve dingaba nachedoh-uham? Themgao ham? Tahbeh-a kaseipeh nahiuve, themgao sanga chungnungjo ahi.

²⁷ Keiman kasottol nama sang-ah kasole, aman namasanga sang nalampi asem ding ahi, tia kisun chu ama hi ahi.

²⁸Nangho jah-a kasei ahi, Numei sunga peng lah-a John Baptist sanga lenjo aumpoi; ahinla Pathen lenggama aneojo chu ama sangin alenjoi, ati.

²⁹ Chuin athusei ja-a mi jouse le kaidongho, John baptize chansah-a baptize changho chun, Pathen chu them achanun adihsahtauve.

³⁰Ahin Pharisai ho le danthu themho vang chun, ama chansah-a baptize chang louvin, Pathen'in amaho chunga alunggot chu apaidoh taovin ahi.

³¹Chule Pakaiyin, Tukhanga miho hi ipitoh katekah tadem? chule ipi toh kilou uvam? ati.

³²Amaho chu chapang kaithel tolla touva, khatnin khat kou-a, ajah-a, Kuli kamutpeh ule nalam hih-un; kakau lela nakap pouve, tiho tobang ahiuve.

³³Ijeh-inem itile John Baptist ahungin, changlhah ne lou lengpitwi donlou ahin; nanghon, Ama chu thilhavop ahi, nati uve.

³⁴Mihem Chapa ahungin, anen chule adonin ahile, nanghon, Veuvin, nehhat le ju lop, kaidongho le mi chonseho jol le gol, nati uve.

³⁵Ahinla chihna chu achate jousen athem chansah uvin ahi, ati.

³⁶Chuin Pharisai ho khatnin ama chu an nehpi dingin akouvin; chuin ama Pharisai pa in'a chun alutnin, an nedingin atoutan ahi.

³⁷ Chuin veuvin, hiche khopi sunga um numei chonse khatnin Pharisai pa in'ah annen atouve ti ahet phatnin, songval bom khat thao namtui ahin choijin;

³⁸Anungah akengphang bulah adingin akapmin, akengphang chu amitlhin akotsah-in, aluchanga asam chun atheh ngim pantan, chuin akengphang chu achopmin thao chu anutan ahi.

³⁹Chuin an ne-a kou-a Pharisai pa chun hichu amun, alungthima, Hiche mipa hi themgao ahin, hiche atongkha nu hi koi ahi le itobang numei ahi hetahta, amanula chonse ahin, ati.

⁴⁰Chuin Jesu'n ama chu adonbutnin, ajah-a, Simon najah-a sei ding thukhat kaneije ati.

⁴¹Aman, Houhil seijin, ati. Sumpahom mikhatnin sumba mi ni aneijin; khatpan dangka ja nile somnga abatnin, khatjopan somni le nga abat ahi.

⁴²Chuin amanin asahna ding anei lhon lou phatnin, ani lhonin angaidam tai. Chuti ahileh koijoh chun ama ha ngailutjoh lhonintem? ati.

⁴³Simon'in adonbutnin, Kei ngaiton atam ngaidamjoh chun, ati. Chuin aman, natan dih-e, ati.

⁴⁴Chuin numeinu lama chun akiheijin, Simon jah-a, Numeinu hi namu-em? Na-in'ah kahung lutnin nangman kakeng silna ding twi neipepoi, amanu vang hin amitlhin ka kengphang asukotnin, asamin atheh ngime.

⁴⁵Nangman chopjong neichop poi, amanu vang hin kahung lut tila pat ka kengphang chop atangpoi.

⁴⁶Nangman kalu thao neinu pehpoi, amanu vang hin ka kengphang thao namtui anui.

⁴⁷Hiche jeh-a chu kasei ahi, Amanu chonsetna tamtah akingaidam jeh-a hatah-a angailut ahi; amavang ngaidam lhom chun angailu lhomjin ahi, ati.

⁴⁸Chuin numeinu jah-a chun, Nachonset ngaidam ahitai, ati.

⁴⁹Hichun a-ankong um piho chun, Chonset ngaidam ama hi koi hingana? akitiuvin ahi.

⁵⁰Chuin aman numeinu jah-a chun, Natahsanin nahuhhing ahitai; lungmong tah-in chetan, ati.