Read Thado Chin Luke 8 Bible Online

Luke 8 - Thado Chin bible

Luke 8

¹Chuin ahitin ahi, hiche joujou chun, ama khopile khoneo tinah avahlen, Pathen gam Kipana Thupha apolen ahillhanglen; somleni ho chu akomah aumun;

² chule numei phabep, lhagao gilou vop kiboldam le anat kiboldamho toh ahiuve. Amaho chu Magdalene atiu Mariam thilha sagi potdohnanu toh,

³chule Herod neiching Chuza inneipi Joanna toh, Susanna toh, chule numei dang tamtah toh ahiuvin; amaho chun amaho neija konin ama ajenun ahi.

⁴Chuin mipi tamtah ahung kikhom khomun, khotina konin miho ahenga ahung ahungun, aman thulemin thu aseijin;

⁵Muchi thepa muchi then achen, athe atheleh abang lamsih-a achun ahile min kengin achotphan, chule chunga leng vachaten alohgamtan ahi.

⁶Abang songlheo chungah achun; chuin akedoh doh-in, jung akholou jeh-in agop paitan ahi.

⁷Chule abang ling lah-a achun; chuin lingho chutoh akhanthan adeplih taovin ahi.

⁸Chule adang leipha laijah achun, akhangin, ajat jakhat agatan ahi ati. Chuin thu chucheng aseijin, Angaina ding nakhang neijan ngaihen tin asamin ahi.

⁹Chuin aseijuiten, Hiche thulem chu i-kiseina ham? tin adongun ahi.

¹⁰ Chuin aman, Pathen lenggam thuguh chu nahet dinguva kipe-a nahitaove; midangho dinga vang, vet chu avetnuva amuloudiu, jah chu ajah uva ahet louna dinguva thulema kisei ahi.

¹¹Thulem chu athu hiche ahi: Muchi chu Pathen thu ahi.

¹²Chule lamsih-a ho chu, athu jaho ahiuve, chutengle amahon atahsan daova chule asochat louna dingun diabol ahungin, alung sunguva thu chu alahmang pehjin ahi.

¹³Chule songlheo chungaho chu athu ajah-a, thanom tah-a joppaiho ahiuve; amahon jung aneipouvin, chomkhat atahsanun, chule lhepna aum tengle apul lhagamji taove.

¹⁴Chule ling lah-a chuho chu hiche ahi, athu ajah nungle acheuvin, hinlai khankho lungkhamna, haona, nopsahna chun adeplihjin, aga bulhingji tapouve.

¹⁵Chule leipha laija chua chu, thu chu ja-a, lung kituptah le phatah-a tuh detna, thohhat na-a ga sohdoh jiho chu ahi.

¹⁶ Chule koiman meivah avah-in belin akhukhum jipoi; jalkhun noija jong akikoi jipoi; alut chanin vah amu theina dingun atunna chungah atungji bouve.

¹⁷ Ijeh-inem itile kiphong lou dinga imacha ki-ima aumpoi, chule hetdoh lou ding le kilangdoh lou ding akiselguh imacha aumpoi.

¹⁸ Hijeh chun iti nangaijum chingtheijun; ijeh-inem itile koi hijongle aneija chu kipehbe ding; chule koi hijongle anei louva chu aneija angaito chasun jong chu ama-a kona kilahpeh ding ahi, ati.

¹⁹Chuin anu le asopite ahungun, ahinla mipi jeh chun akom alhung theipouvin.

²⁰Chuin ajah-a, Nanule nasopite inpoa adingun, nangma namu nomui, tin aseipeh-un ahi.

²¹Ahin aman adonbutnin, amaho jah-a, Kanule kasopite hicheho, Pathen thu ngaija bolteho hi ahiuve, ati.

²²Chuin ahitin ahi, chulai chun ni khat aseijuite toh kong-ah atouvin; chuin aman amaho jah-a, dil gallang khatna galkaiju hite, ati. Chuin kong alhaovin akitol taovin ahi.

²³Ahin akitol petnun ama a-imutan; chuin dila chun khopihui ahung nungin ahile akongu chu twi adim dehdeh jengtan, amaho setto kichatah-in aumtaovin ahi.

²⁴Chuin amaho ahenga acheuvin, asukhangun, Pipu, Pipu, athigam kahitaove, atiuve. Chuin ama ahung khangin huipi le twikinong chu aphoh-in; hichun hiteni chu atanghel gelin, athiphel tan ahi.

²⁵Chuin aman ajah uvah, hoibaham natahsanu? ati. Chuin amaho akichauvin, kidang asauvin, khatnin khat jah-a, Hichepa hi itobang mi ham! Huile twi thu apen ahile, athun anung jeng lhone, akitiuvin ahi.

²⁶Chuin Galilee gal ajontah-a um, Gerasene gam alhungun ahi.

²⁷Chuin ama kong'a kona leichung agah chot chotnin, khopi-a kon mikhatnin atoh-in; ama chu sottah thilha vop, apon apona sil lou, in'a jong umlou, lhankhuh lah jenga um ahi.

²⁸Ama chun Jesu amu mun, a-ao san, a-angah aboh khupmin, aw sangtah-in, Vo Jesu, Chungnung pen Pathen Chapa, nangle kei ipi ikimatna umam? Nahenga katao ahi, keima neibolgim hih-in, ati.

²⁹(Ajehchu aman mipa-a kon chun hung doh-in tia lhagao boh chu thu apeh ahi. Ijeh-inem itile ama chu tamtah vei amat matchetji ahi: chule ama chu thihkhao le bula ahenjiu ahin, ahivangin aman akihennaho chu aphutanjia, thilhan gamthipmah apuimangji ahi).

³⁰Chuin Jesu'n ama chu adongin, Namin ipiham? ati. Chuin aman, Janel kahi, ati; ijeh-inem itile asunga chu thilha tamtah lut ahi.

³¹Chule Aman amaho chu leinoi lama asol lounadin thilhaho chun Jesu henga angeh taovin ahi.

³²Chule chukom molsang dunga chu vohcha hon atama tam lha-a ahin; thilhaho chun chucheho lah-a alut theina dingun angeh-un ahile; aman alutdiu aphalpeh tan ahi.

³³Chuin thilhaho mipa-a kon chun ahung potdoh-un, vohchaho sunga chun alut taovin ahile, vohhon chu halhaijin alhaijun, kolah alhai lhauvin, dil'a alha lutnun athigam taovin ahi.

³⁴Chuin vohcha vah hon hiche thusoh umchan chu amu phatnun ajamun, khopi sunga le loujaovah agaseijun ahi.

³⁵Chuin ipi thusoh hitam tia ve dingin ahung potdoh-un; chuin Jesu kom ahung lhungun, thilha potdohna mipa chun pon akisila, chule lunglima Jesu kengphang koma atou amuvin, akicha lheh jengun ahi.

³⁶Chuin amuho chun thilha voppa chu iti kihuhdoh ahi chu amaho jah-a aseijun ahi.

³⁷Chuin Gerasene gam vela miho jousen, akomuva kona achedohna dingin ahenga ataotauvin ahi; ijeh-inem itile amaho chu kicha behseh jenguva ahi.

³⁸Chuin ama kong'a alutnin, akile kittan ahi. Ahin thilhaho potdohnapa vang chun ama koma umding athumin;

³⁹Ahivangin Jesu'n, Na-in lama chenlang Pathen'in nangma itobang thil loupi nabol peh-em, hichu gaseilen, tin asolin ahi. Chuin akipatdoh-in, Jesu'n thil lentah abolpeh chu khopumpi jah-a lhang phongtah-in asamletai.

⁴⁰Chuin ahitin ahi, Jesu akile kit chun, mipin kipah tah-in ana lamtouvin ahi; ijeh-inem itile amaho abonchauva ama ngah jinga anaum ahiuve.

⁴¹Chuin veuvin, amin Jairus kiti mi khat ahungin, chule ama chu kikhopna in vaihom ahi; chuin ama chu Jesu kengphang bulah alhun, a-in'a hung dingin ataotan ahi;

⁴²Ijeh inem itile ama chun chanu changkhatseh aneijin, kum somle kum nibep ahin, amanu chu athi koncha ahi. Ahin achen ahile mipi chun atom lellul jengun ahi.

⁴³Chuin numei khat kum somle kum ni athi long, louthem ho kijensah na-a anei jouse sumang, khatchan jong aboldam jou lounu chu,

⁴⁴anung lama ahungin, apon mongkai athamin ahi: chuin chupettah chun athi lon chu atangpai jengtan ahi.

⁴⁵Chuin Jesu'n, koiham eithama? ati. Chuin koimachan kei kahi atilou phatnin, Peter le akoma umhon, Pipu, mipin natoma chule naneh chintouva, iti dana koiham eithama? natiham, atiuve.

⁴⁶Ahivangin Jesu'n, Koiham khatnin eithame; ijeh-inem itile keija kona thilboltheina thahat potdoh-a chu keiman kahei, ati.

⁴⁷Chuin numeinu chun, Ki-imthei kahipoi ti ahen, kihot pumpumin ahungin, a-angah aboh khupmin, ijeh-a ama atham ahi chule chupet tah-a adampaihel chu mi jouse ang sungah aseitan ahi.

⁴⁸Chuin aman amanu jah-a, Chanu, lhamong tah-in umin, natahsanin nadamsah ahitai; lung mongin chetan, ati.

⁴⁹Aman hiche thu chu aseina laijin, kikhopna in vaihompa in'a kon chun mi khat ahungin, ajah-a, nachanu athitai; houhil chu cholsah hih-in, ati.

⁵⁰Ahivangin Jesu'n hichu ajan, adonbutnin olmo hih-in, tahsanpou poutan; chutile amanu hingdoh ding ahi, ati.

⁵¹Chuin in alhun phatnun aman Peter, John, Jacob chule chapangnu nule pa tailou adang koima alutsahpon ahi.

⁵²Chule miho jouse chun amanu chu akauvin, a-op abeng bengun ahi; ahin aman, nangho kap hih-un; ama athia ahipoi, a-imu ahibouve, ati.

⁵³Chuin athitai ti ahet jeh-u chun, ama chu anuisat taovin ahi.

⁵⁴Ahinla aman amaho chu apotdoh sah-in, amanu chu akhutnin atuh-in akouvin, Boinu, thouvin ati.

⁵⁵Chuin alhagao ahung kile kitnin, chupettah chun athoudohpai jengtan ahi; chuin aman amanu chu neh ding peuvin, tin thu apetai.

⁵⁶Hichun anu le apa chun kidang asa lheh lhonin; ahivangin aman hiche thil kibol chu koima jah-a aseilhon louna dingin akham chahtan ahi.