Read Thado Chin Luke 9 Bible Online

Luke 9 - Thado Chin bible

Luke 9

¹Chuin aman somleni ho chu akou khomin, thilhaho jouse chunga thuneina le nat boldamna thahat apen,

²Pathen lenggam thu hil lhangle dingle adamlouho boldam dingin asolin,

³ Ajah uva, Nakhol jinnauva dingin imacha keng hih-un, tenggol hihen, sakhao hihen, changlhah hihen, chule sum hijongle kiken hih-un; sangkhol thoni jong nei hih-un;

⁴Nalut lutnau in'a chun umun, chule chua kon chun potdoh-un.

⁵Chule nalhunsah lounao chanuva chu, chuche kho-a kona napotdoh tengule, amaho douna hettohsahnan nakengphang uva leivui thinglhau vin, ati.

⁶Chuin amaho acheuvin, akho kho-a Kipana Thupha ahillhangun, adamlou aboldampeh taovin ahi.

⁷ Hichun Herod gamvaipopan thil kibol jouse chu ajan, alunggim lhehtan ahi. Ajeh chu mi abangin, John athia kona thoudoh kit ahi, atiuvin;

⁸Abangin, Elijah hung kilah ahi, atiuvin; adangse vang chun, Malaija themgaoho lah-a khat thoudoh kit ahi, atiuvin ahi.

⁹Herod'in, Keiman John lu katantan, ahinla hiche athu kajah hi hoi koiham? ati. Hichun ama mu atuptan ahi.

¹⁰Chuin solchah ho chu ahung kile kitnun, athilbol chengseu chu ama jah-a aseijun ahi. Chuin aman amaho chu apuijin, Bethsaida atiu khopi mun thip khatna amaho changseh apotdoh taovin ahi.

¹¹Ahivangin mipin hichu ahet phat uvin, anung ajuijun; chuin aman amaho chu anasangin, chuin ajah uva Pathen gam thu aseijin, chule boldam ngaiho chu aboldamtan ahi.

¹²Chuin nilhum kon ahitan; hichun somleni ho chu ahungun ajah-a, Mipi hi acheuva khoho le loujao dunga genale anneh agakihol theina dingun soltan; ijeh-inem itile hikoma eiho gamthipma um ihiuve, atiuvin ahi.

¹³Ahin aman amaho ajah-a, Nanghon nehding peuvin ati. Chuin amahon jah-a, Kacheuva hiche miho jouse dinga hi neh kagachoh ngal louvule, keihon changlhah pheng nga le nga ni kalval kaneipouve, atiuvin ahi

¹⁴Ijeh-inem itile amaho chu mi sangnga jen hiuva ahi. Chuin aman aseijuite jah-a, Amaho chu somnga cheng chengin aloi loijin tousah-un, ati.

¹⁵Chuin amahon achuti bolun, abonchauvin atousah-un ahi.

¹⁶Chuin changlhah pheng nga chule nga chu alan, van lam aven, hiteho chu phatthei aboh-in, ahehbal balin; chuin mipi anga chu luipeh dingin aseijuite thu apen ahi.

¹⁷Chuin amahon aneuvin, abonchauvin avasoh keijun, chuin anehmoh-u anong chengse paipeh somle paipeh ni alohdoh-un ahi.

¹⁸Chuin ahitin ahi, ama achanga atao petnin, aseijuiho akomah aumun; hichun aman amaho chu adongin, Mipi ho hin keima hi koi ahi eitiuvem? ati.

¹⁹ Chuin amahon adonbutnun, John Baptist ahi atiuve; abang vangin Elijah ahi atiuvin; chule adangsen, Malaija themgaoho lah-a khat thoudoh ahi tin aseijuve atiuvin ahi.

²⁰ Chuin aman amaho jah-a, Nanghonla koi ahi neitiuvem? ati. Chuin Peter'in adonbutnin, Pathen Khrista chu, ati.

²¹Ahivangin aman amaho chu hichu koima jah-a asei louna dingun hakhamin akhamchah-in;

²²Ajah uva, Mihem Chapa chun thil tamtah athoh-a, chule vaipo upaho le thempu pipuiho, chule danthu sunho pampaija uma, chule kithat tei ding, chule ni thum nile kaithouva umtei ding ahi, ati.

²³ Chuin aman abonchau jah-a, Koi hile kanung eijui noma chu ama kingaitom hen, niseh-in athingpel kiput hen lang kanung hinjuihen.

²⁴ Ijeh-inem itile koi hile ahinna huhhing noma chun achan ding; amavang koi hile keima jala ahinna chana chun ahuhhing ding ahi.

²⁵Ijeh-inem itile min vannoi leiset apumpin neihenlang, ama kisumanghen ahiloule paidoh-in umtale, ama dinga ipi phachom dingham?

²⁶Ijeh-inem itile koi hijongle keima le kathu jachat chanchu, Mihem Chapan ama loupinale, Pa loupina, chule vantil thengteho loupina-a ahung tengle, amapa chu ajachatpi ding ahi.

²⁷Amavang tahbeh-a kaseipeh nahiuve, Hikoma dingho kimkhat hi, Pathen lenggam amu kahseuva, thina tepkha lou ding aumuve, ati.

²⁸ Chuin ahitin ahi, chucheng aseikal ni get jen jouvin Peter toh, John toh, chule Jacob toh apuijin, atao dingin mol chunga akaltouvun ahi.

²⁹Chuin ama ataopetnin, amaiso akikhelin, chule aponsil abanin abangin, aval lahlah jengin ahi.

³⁰Chuin veuvin, mi nin akihoupin; amani chu Mosi le Elijah ahi lhonin,

³¹Loupia hung kilah lhona, Jerusalem'a thina athoh chai ding thu chu asei lhonin ahi.

³²Hichun Peter le aumpiho chu a-imutsoh ngui ngui jengun, ahivangin hah jengin aumun, aloupije le akoma ding miteni chu amuvin ahi.

³³Chuin akikhenpi lhona akoma kona achedoh pet lhonin, Peter'in Jesu jah-a, Pipu, hikoma i-umu hi eiho dingin anome; chule lhambuh thum songung kate, khat nangma ding, khat Mosi ding, chule khat Elijah ding, atin; ipi asei ahijong ahepon ahi.

³⁴Chuin aman chucheng asei pet chun, mei lhang khatnin amaho chu ahinlekhun; chuin amaho mei lah-a alutnu chun akichauvin ahi.

³⁵ Chuin mei lah-a kon chun aw ahung gingdoh-in, Hiche hi ka-Chapa deitah ahi; athu ngaijun, ati.

³⁶Chuin awgin akichai phat chun, Jesu achangin akimutan ahi. Chuin athipbeh-un, chulai chun athilmu-u chu koima jah-a asei pouvin ahi.

³⁷Chuin ahitin ahi, akit ni-a mol chunga kona akumsuh phatnun, mipi atama tamin analam touvin ahi.

³⁸Chuin veuvin, mipi lah-a kon chun mikhatnin ahin samin, Houhil, nahenga katao ahi, kachapa hi ven; ama hi kachapa changkhatseh ahi;

³⁹Chule vetan, lhagaovin amanjin, phulou helouvin apengjahjin, chule aheh lhujin ahile achilphon akaijin, asuheh jin, lhakang manlouvin amavo jingin ahi.

⁴⁰Chule anodoh dinga naseijuite henga kataole, amahonla anodoh joupouvin ahi, ati.

⁴¹Chuin Jesu'n adonbutnin, Vo tahsanna nei lou khanglamvai mite, nakom uva itihchan kauma, chule kakhongai ding nahiuvem? Nachapa chu hilama hinpuijin, ati.

⁴²Chuin ahung petnin thilha chun ahehlhun, nasatah-in aveingoi jengin ahi. Ahivangin Jesu'n lhagao boh chu aphoh-in, chuin chapang chu aboldamin apa apetan ahi.

⁴³Chuin miho jouse chun Pathen thilboltheina loupije chu kidang asa lheh jengun ahi. Chutia chu athilbol jouse chu kidang asah pettah-un Jesu'n aseijuite jah-a chun,

⁴⁴Hicheng thuhi nana sunguvah lutsah-un, ijeh-inem itile Mihem Chapa chu mihemte khutna kipedoh dingkon ahi, ati.

⁴⁵Ahivangin hiche athusei chu ahedoh pouve; ijeh-inem itile amahon ahetdoh louna dinguva, amaho-a kona ki-ima ahin; chule hiche athusei chu ipi aseina ham doh dingla akichauvin ahi.

⁴⁶ Chuin alah uva koipen chu alenpen ahidem tin kinelna aumtan ahi.

⁴⁷Ahivangin Jesu'n alunguva chuche angaitou chu ahen, chapang neocha khat alan, akoma adinsah-in,

⁴⁸ Ajah uva, Koi hijongle hiche chapang neocha hi keima mina sanga chun keima eisan ahi; chule koi hijongle keima eisanga chun eihinsolpa asan ahi. Ijeh-inem itile nalah uva aneopen chu alen ahi, ati.

⁴⁹Chuin John'in adonbutnin, Pipu, mi khat namina thilha nodoh kamuvin, chuin nangma kajuiju eijuipi lou jeh-un kakham taove, ati.

⁵⁰Ahin Jesu'n amaho jah-a, kham hih-un, ijeh-inem itile koi hijongle eidoulou tapouvu chu eiho lamma pang ahi.

⁵¹Chuin ahitin ahi; ama lahtouva aum ding phat alhin konin, Jerusalem'a che dingin amai angat changmelin,

⁵²Amasangah thangkou asol masan; chule amaho acheuvin ama dinga gotsa anakoipeh dingin, Samaria miho kho khatnah aluttaovin ahi.

⁵³Ahivangin ama Jerusalem'a che dinga amai angat jeh chun, amahon anasang tapouvin ahi.

⁵⁴ Chule asolchah teni, Jacob le John nin hichu amulhon phatnin, Pakai, Elijah'in anabol banga, van'a kona meikong ahung lhah-a amaho hi akahvamna dingu thu peleuveng nalung ham, ati lhone.

⁵⁵Ahivangin ama akiheijin amani chu aphoh-in, ajah lhonna, Itobang lhagao neija nahi nakihet lhonpoi;

⁵⁶Ajeh chu Mihem Chapa hi mihemho hinkho sumang dia hung ahipon, ahuhhing diuva hunga joh ahibouve, ati. Chuin kho choma ache taovin ahi.

⁵⁷Chuin lampia ache petnun mikhatnin ajah-a, Pakai, Nachena chan-ah juijinge, ati.

⁵⁸Chuin Jesu'n ajah-a, Sial hon ko aneijun, chunga leng vachaten jong buh aneijun, Mihem Chapa vangin alu ngapna mun aneipoi, ati.

⁵⁹Chuin aman achom khat jah-a, neijuijin, ati. Ahin aman, Pakai, amasan kache-a kapa kagavuina ding thu neipen, ati.

⁶⁰Hichun Jesu'n ajah-a, mithihon amithiu kivuinao vinte; nangma chenlang Pathen gam thupha gahil lhang letan ati.

⁶¹ Achom khatman jong, Pakai, keiman nanung juijinge, amavang amasan ka-inkote kaga lhahna dingin neilhan, ati.

⁶²Jesu'n ajah-a, Mi koi hile langkon tuhta-a, kiheija anunglam vea chu Pathen lenggama hoi ahipoi, ati.