Read Thado Chin Danbu 1 Bible Online

Danbu 1 - Thado Chin bible

Danbu 1

¹Hiche thuho hi Mosi'n Israelte jouse henga Jordan gal gamthip hilam sang, twipisan gal Paran le Tophel, Laban le Hazeroth, chule Dizahah kikah phaichama asei ahi.

²(Seir molsang lampi jotna-a ichele Horeb'a pat Kadesh-barnea gei chu nisomle nikhat lam ahi.)

³Chuin kum somli lhin na-in ahitin ahi, lhasom le lhakhat lhina, chuche lha nimasa nichun, Pakaiyin amaho peh dinga ahenga athupeh jouse dungjui chun Mosi'n Israel chate henga aseijin,

⁴ Hichu Heshbon'a cheng Amor lengpa Sihon le, Edrei sunga Astaroth'a cheng Bashan lengpa Og atha jou ahi.

⁵Moab gam sung Jordan pang hilam sanga, Mosi'n hiche danthu hi aphongdoh panin, hitin ati.

⁶Pakai i-Pathen'un Horeb molsanga chun ijah uva aseijin, Nangho hiche molsanga nachamsot behseh taove:

⁷Kiheijun lang, nakholjin ban jom taovin, chule Amor mite molsang le akom naija um mun jouse-a, phaichama, thinglhanga, dama, lhanglama, chule twilen panga, Canaan mite gama, chule Lebanon gei, twipi, Euphrate vapi geijin cheovin.

⁸Veovin namasanguva gam kakoi peh uve; Pakaiyin napu napateu Abraham, Isaac, Jacob henga pehding le amaho nunga achilhahte peh dinga ana kihahsel nagam chu galo taovin.

⁹Chule hiche laichun naheng uva kana seijin, Keiman kachang seh-in nangho napojou pou vinge;

¹⁰Pakai na Pathen'un nangho napunsah taovin, chule veuvin, tunvang natam danu chu van'a ahsi ho jatjen nahitaove.

¹¹(Napu napateu Pakai Pathen'u chun athutep bangin tu-a sanghin ajat sang khatnin napunsah beu henlang, phatthei naboh-u hen.)

¹²Kei changseh in naboinao, napohgih-u, nakiphin nao iti kapohjou dingham?

¹³Nanghon naphung sunguva michingho, ahethemho, chule mihet ho lhengdoh unlang, keiman amaho chu nachung uva vaihomin seminge, tin kanaseijin ahi.

¹⁴Chule nanghon, Nangman naseiho hi keihon kabol dinguva pha ahi, tin neidonbut un ahi.

¹⁵Hijeh chun keiman naphung pipuihou, michingho, mihet ho chu kalheng doh-in, nachung uva vaihomin kapansah-in, sangkhat chunga, jakhat chunga, somnga chunga, chule somkhat chunga lamkai dingleh, naphung sunguva vaipon kapansah tan ahi.

¹⁶Chule hiche laichun keiman nathutan vaihomhou chu thu kanapen, ajah uva, Nasopi ho kah-a aboina hou chu ngaipeh unlang, mijouse leh asopipa kikah, ahiloule nalah uva um gamdangmi kikah-a chun chonphat na-in thu tanun.

¹⁷Thutan na-a maipha navetlou dingu; amavang alen thu nangai banguva aneo thujong nangaidiu; mihem maija kichatna naneilou dingu ahi; ajehchu thutanna chu Pathen'a ahi. Chule nangho dinga thuhahsa behsetho chu kaheng hinlhutnun, keiman ngailha nange, tin kana seijin ahi.

¹⁸Chule hiche laichun keiman naboldiu jouse kana thupeh jiuvin ahi.

¹⁹Chuin Pakai i-Pathen'uvin thu einapeh bangun, Horeb molsanga kon ikipatdoh-un, Amor mite molsang lampia namu-u gamthip lentah le gimneitah jouse chu ijot lhung keijun, chuin Kadesh-barnea iga lhung taove.

²⁰Chuin keiman naheng uva, Nangho Pakai i-Pathen'uvin eipehnao Amor mite molsang chu nalhung taove.

²¹Veovin, Pakai na Pathen'un namasanguva gamchu nakoipeh uve. Chetou vinlang napu napateu Pathen'in naheng uva aseibangin galo jengun; kicha hih-un, lungjong lungthoi hih-un, tin kanaseijin ahi.

²²Chule amitakip kahenga nahungnaijun, kajah-a, Keihon imasanguva mi solung ting, amahon gam chu gakhol toh-uhen lang, ipi lampia ichetou uva, ipi khopi-a ilut diuham? tithu hinpo hen, nati uvin ahi.

²³Chule akisei chun eilung lhaisah lheh-in; chuin keiman nalah uva mi somleni, phung khatna mikhat cheh kalheng doh-in ahi.

²⁴Chuin amaho akiheijun, molsang lama chun akal touvun, Eshcol phaichama ahungun, akholle taovin ahi.

²⁵Chule amahon agamga akhutnun ahin loh-un, ihenguva ahin pohsuh peh-un, chule thu ahinpouvin, Pakai i-Pathen'un eipeh-u chu gampha ahi, atiuve.

²⁶ Achuti vangin nangho chetou ding nanom pouvin, Pakai i-Pathen'u thupeh chu nadou jouvin ahi.

²⁷Chule napon in sunguva naphun chelun, Pakaiyin eithet jeh uva suhmang dinga Amor mite khutna pehlut dinga, Egypt gama kona eipuidoh-u ahi.

²⁸Hoilama ichetou diuham? Isopihou vin, Miho chu alentheijun, eiho sangin asang jouvin, khopi hochu alentheijin, van geija pal akikho touvin ahi; chukal valin chua chun Anakim chapate kaga mu uvin ahi, tin ilungu asudoijun ahi, nati uve.

²⁹Chujouvin keiman najah uva, Amaho chu ginghih-un, kijong kicha hih-un.

³⁰Namasanguva che Pakai na Pathen'u chun namitmu tah uva Egypt gama nangho dinga nabolpeh hou jouse dungjuijin gal satpeh naovin nate.

³¹ Chule gamthipma min acha apoh banga, Pakai na Pathen'un hiche munhi nalhun kahseuva, lampi jouse-a iti napoh-u ham chu namu taove.

³² Ahin hichan geihin jong Pakai na Pathen'u chu natahsan pouvin;

³³Naponbuh son nadiu mun holdohpeh dingle, nachenao lampi musah dinga, jan le meikonga, sunle meilhanga namasang uva chepa chu natahsan deh pouve.

³⁴ Chuin Pakaiyin nathu seiju ajan, alungsatan, akihah selin, hitin ati.

³⁵Tahbeh-a hiche khang gilou mite khatchan jong napu napateu pehdia kahah selna gampha chu amulou heldiu ahi.

³⁶Jephunneh chapa Kaleb tailou: aman hichu amuding, chule agachotsa gam chu amale achilhahte kapeh ding ahi; ajehchu aman Pakai chu ajuikim helin ahi, ati.

³⁷Nangho jal-in Pakai chu keichunga alung hangin, Nangma jengjong chumuna chu nalut louding ahi.

³⁸Ahin namasanga ding Nun chapa Joshua, amachu lutding ahi. Ama chu tilkhouvin; ajehchu aman hiche gam chu Israel alosah ding ahi.

³⁹Chukal valin, Anchah dingbep ahi natiu nachasen houleh, chuche laija sele pha hekhen loulai nachateo hochu chua lut dingu, chule keiman kapeh-a, amahon alo dingu ahi.

⁴⁰Ahin nangho vang kiheijunlang, twipisan lampi gamthip lama nakholjin ban jom taovin, ati.

⁴¹Chuphatnin nanghon nei donbutnun, kahenga, Pakai dounan kachonse taove, Pakai ka Pathen'un eithupeh jouseu dungjuijin chetaoving ting, galsatnu vinge, nati uve. Chuin amitakip min agalvon nakivoncheh phatnun, thinglhang lama kaldin phasademin na-umtaove.

⁴²Ahin Pakaiyin kahenga, Chetou hih-un, chule galjong gasat hih-un; ajehchu keima nalah uva kaumpoi: achutiloule nagalteu masanga gal lel getnun nate, tin seipeh-in eiti.

⁴³Hijeh chun najah uva kaseipeh-un; chule nanghon nangai pouvin, ahin Pakai thupeh dounan nagolkeh-un, hangtah-in thinglhang lama nakaltou taove.

⁴⁴Chuin hiche molsanga cheng Amor mite chu nangho dou dingin ahungkon doh-un, khoihon mi adel bangin nahin delun, Seir gei le Hormah geijin nathatnun ahi.

⁴⁵Chuin nahung kileuvin, Pakai masanga nakap-un; ahinla Pakaiyin na-aw-u nangaipeh pouvin, anakhang jong nasunpeh pouve.

⁴⁶Chuti chun chuche mun'a nagasuhmangu nikhoho dungjuijin Kadesh mun'a nisot tah naum denun ahi.