Read Thado Chin Danbu 10 Bible Online

Danbu 10 - Thado Chin bible

Danbu 10

¹Hiche laichun Pakaiyin kahenga, Amasa-a bangin songpheng ni khengin lang, molsang chunga kaheng lama hungtouvin lang, thing thingkhong khat semin.

²Chule nangin nasechip songphenga kisun thucheng hochu songpheng teni chunga chu kasutding, chule hichu thingkhong sunga nakoiding ahi, ati.

³Chuin Shittim thingin thingkhong kasemin, chule amasa bangin songpheng ni kakhengin, chule songpheng teni chu kakhutna choipumin molsanga chun kakal toutai.

⁴Chuin songpheng chunga chun akisun masa bangin, khoppi nikho-a molsanga meikong lah-a kona Pakaiyin naheng uva asei thupeh som chu asunin; chule hichu Pakaiyin keima eipetai.

⁵Chuin kaki heijin molsanga konin kahung kumlhan, songpheng chu kasem thingkhong sunga chun kakhumin; Pakaiyin eithupeh bangin chua chun aumjing tan ahi.

⁶ Chuin Israel chate chu Jaakan chate kho Beeroth'a konin Mosera alhungun; chua chun Aaron athin, chumun mama-a chun avui taovin; chule ama khelin achapa Eleazer'in thempu tohmun lhachana chu atongtai.

⁷Chua konchun amaho Gudgodah'a alhungun, Gudgodah-a konin vapi twiho umna gam Jotbath alhungun ahi.

⁸ Hiche laichun Pakai kitepna thingkhong puding le, Pakai angsunga dinga lhachana tong dingin, chule tunichan geija amin phatthei boh dingin Pakaiyin Levi phung chu achom khenin ahi.

⁹Hijeh-a chu Levi'n asopite lah-a chan jong, gou jong aneilou ahi; Pakai na Pathen'un athupeh banga, Pakai chu agoulo hija ahi.

¹⁰ Chuin phat masa-a bang chun nisomli le jan somli molsanga chun kaumin; chule hichepet jong chun Pakaiyin eingaipeh-a, Pakaiyin nangho nasumang tapouvin ahi.

¹¹Chuin Pakaiyin kahenga, Kipatdoh-in, Apu apateu pehdinga kaki hahsel na gamchu alutnuva agalo theina diuvin, mipi ho chu lamkaijin, eiti.

¹²Chule tun, Israel, Pakai na Pathen'in nanga kona angeh chu ipiham, Pakai na Pathen chu naginna, alampi jouse-a najuija, ama nangailutna, nalung pumpi le nathaneina pumpi-a Pakai na Pathen najena,

¹³Naphat theina dinga tunia kathupeh, Pakai thupeh hole achonna dan kisunho nanitding hi hilouham?

¹⁴Veuvin, van le vanho jouse van, chule leiset le asunga umjouse jonghi Pakai na Pathen uva ahi.

¹⁵Ahinla napu napateu ngailut ding bou chu Pakai lunglhaina ahin, amaho nunga achilhahteu, nangho jeng jong tunia nahinao bangahi mijouse chungvuma nalhenu ahi.

¹⁶Hijeh chun nalungsung chep tanun lang, louchal tahih-un.

¹⁷ Ajehchu Pakai na Pathen'u hi pathenho Pathen, pakai ho Pakai, Pathen loupitah, hat chungnung, tijat umtah, mihem mai velou le, lepthol lalou ahi.

¹⁸Aman paneilou le meithai thu dihtah-in atanin, gamdangmi nehding le vonding apen angailun ahi.

¹⁹Hijeh chun nanghon gamdangmi ngailuvin; ajehchu nangho jong Egypt gama gamdangmi nanahiu ahi.

²⁰Nangman Pakai na Pathen nagin ding; ama najena, ama-a nabe ding, chule amina nakitep ding ahi.

²¹Amachu navahchoi dingpa ahin, chule namit teni-a namu hiche thil loupile tijat umtahho nangma dinga ana bola na Pathen chu ahi.

²² Napu napateu chu Egypt gama mi somsagi toh anachesuh-un; chule tun Pakai na Pathen'un natamdanu chu van'a ahsi ho banga tamin nasemtaove.