Read Thado Chin Danbu 11 Bible Online

Danbu 11 - Thado Chin bible

Danbu 11

¹Hijeh-a chu nangman Pakai na Pathen chu na ngailutna, aman nanganse na ho, achona dan kisunho, athutanna ho, chule athupehho nanit jingding ahi.

²Chule tunikhon heuvin, ajehchu Pakai na Pathen'u gimbolna, aloupina, akhut thahat, chule aban jahdohna hekhalou le mukhalou nachateo henga thu kasei ahipoi;

³ Chule Egypt mite lailung tah-a Egypt lengpa Pharaoh chung le agamsung pumpi-a athilkidang bol ho le anatohho,

⁴ Egypt sepai ho chung le asakol hou chung, chule akangtalai chunga anabol ho, amahon nahin nungdel naova twipisan iti achupsah-u, chule iti dana Pakaiyin amaho tunigeija asuhmang ham,

⁵Chule hiche munna nahunglhun kahseuva gamthipma chu naheng uva ipi abol,

⁶ Chule Reuben chapa Eliab chapateni Dathan le Abiram chunga ipi abol, leisetnin akam iti ahinkah-a amaho le a-insungu pumpi, chule apon inhou le Israelte lah-a anei jouseu aval lhum ham ti hekhalou le mukhalou nachateo henga thu kasei ahipoi.

⁷Ahin nangho mitnin vang Pakai thilbol loupiho jouse chu amun ahi.

⁸Hijeh-a chu nahat theijuva, lodinga nachennao gam chu nagalo theina dinguvin, keiman tunia kathupeh, dan thupeh ho jousehi nanit dingu ahi.

⁹Chutile Pakaiyin napu napateu leh achilhah teo pehdinga ahahselna, bongnoi le khoiju lonna gama chu nahinkhou sot thei ding ahi.

¹⁰Ajehchu galo dinga nachenao gamchu nahungdohnao Egypt gam, anche louhing hon, muchi natheuva nakenga twi nachap jinao tobang ahipoi.

¹¹Ahinla galo dinga nachenao gam chu thinglhang le phaicham umna, van gotuijin achap nou jingna gam,

¹²Pakai na Pathen'un avettup jingna gam, Pakai na Pathen'u mit chu kum kipatna pat kum kichaigeija achunga aum jingna gam ahi.

¹³Chule hung hitiding ahi, Pakai na Pathen chu nangailutna nalung pumpi le nalhagao pumpi-a ama jen dinga tunia kapeh thupeh hi chingthei tah-a nangaija ahile,

¹⁴Nachang, na lengpithei, chule nathao twi naki khoptup theina dinga van gotwi masale gotwi nunung aphatcha kapeh dingu ahi.

¹⁵Chule naneh uva nava theina dinguva, nagancha teo dinga nagamsunguva hamhing kaphatsah ding ahi.

¹⁶Nalungsungu lheplhah-a aumlouna dingle, nakihei manguva pathen dang ho najen uva nahoulou nadingun chingtheijun.

¹⁷Chutile Pakai lunghan nachunga koujah intin, gojuh louna din van khah intin, leijin aga asodoh louding,Pakaiyin napeh-u gam phatah-a konin mangthah loi getnun nate.

¹⁸Hijeh chun hiche kathuho hi nalungthim le nahinna-in vop inlang, namit teni kah-a thuchih bom tobang ahitheina din, nakhut chunga melchihna hidingin kanbeh-in.

¹⁹Chule hicheho chu nachateo nahil dingu, na-in'uva natou petnu, nalam jot petnu, nalup petnu chule natho tengu jongle nahil jingdiu ahi.

²⁰ Chule na-inkot khomho chung le nakotpiho chunga hichehi nasut dingu ahi.

²¹Chutia chu napu napateu pehdinga Pakaiyin ahahselnau gama chu nahinkhou le nachateo hinkhoho chu leichunga vangam nikhoho banga sotding ahi.

²²Ajehchu Pakai na Pathen chu ngailut ding, alampi jouse jotdinga chule ama-a behjing dinga kathupeh ho chu chingthei tah-a nanitna ahile,

²³Pakaiyin namasanguva konin hiche nam jousehi anodoh ding, nangho sanga nasajole hatjo namho nahin lodiu ahi.

²⁴ Nakeng phanguva nachot phahna chanu chu nangho-a hiding, gamthip le Lebanon'a pat, luipilen, Euphrates luipi-a pat twikhanglen mong gei sana nangho-a hiding ahi.

²⁵Namasanguva ding ngam koimacha umlou ding ahi. Ajehchu aman naheng uva anasei banga, nachot phahdiu gamjousea chu Pakai na Pathen'un nangho gin nale kichatna akoiding ahi.

²⁶Veuvin, tunin namasanguva phattheina le gaosapna kakoije.

²⁷Pakai na Pathen nu thupeh ho, tu-a kapeh hohi nanit nuva ahile phattheina hintin,

²⁸Chule Pakai na Pathen'u thupeh nanit lou uva, nahetkhah lou pathen dangho houdinga, tunia kathupeh lampia kona nakihei manguva ahile gaosapna hiding ahi.

²⁹ Chule hung hiti ding ahi, galo dinga nachenao gama chu Pakai Pathen'in napuilut tengu le, Gerizim molsang chunga chu phat theina nakoi uva, Ebal molsang chunga gaosapna nakoi dingu ahi.

³⁰Hichu Jordan gal langkhat, nisa lhumna lamsanga Moreh phaicham kom, Gilgal maijon muncham dunglaija Canaan mite chena gama chu uma hilouham?

³¹Ajehchu Pakai na Pathen'un napehnao gamchu galo dinga Jordan nagalkai diu ahin, chule hichu nalouva, asunga nachendiu ahi.

³²Chule tunia namasanguva kakoi chonna dan kisun hole thutanna hochu nanitna dinguva nachihthei dingu ahi.