Read Thado Chin Danbu 12 Bible Online

Danbu 12 - Thado Chin bible

Danbu 12

¹Hichehohi napu napateu Pakai Pathen'in leisetna nahin laiseuva nalodiuva anapehnao gama nanitdiu chonna dan le thutan naho chu ahi.

²Nagalo diu gama namhon molsang ho chung le lhangho chunga, chule thinghing phung engsel noitina, a-pathen hou anajen nau munho jouse chu nasuhmang soh heldiu ahi.

³ Chule amaicham ho nasuh chimuva, asong phu hou navohboh uva, athingbom hou meija nahaldiu, semthu milim pathenho naphuh lhuh uva, chuche munna kona chu aminu nasuhmang diu ahi.

⁴Pakai na Pathen'u henga vang chutia nabol loudiu ahi.

⁵Ahinla Pakai na Pathen'un naphung jouseu lah-a kona amin umna dinga alhendoh ding mun, hiche mun ngeichu nahol diu, hiche mun'a chu nahung diu ahi.

⁶Chule hilama chu nagovam thiltohou, naganlhai na hou, na somakhat hou, nakhutjap thilpeh hou, nakitep nahou, nalung cham tah uva thilto natohou, nagan honu le na kelngoi hon lah uva apeng masapen ho chu nahin choidiu ahi.

⁷Chule chua chu Pakai na Pathen'u masanga naneh uva Pakai na Pathen'in nanatohna jouse-a phatthei nabohna chung changa nangma le na-insung mite jouse nakipa diu ahi.

⁸Tunikho-a hilai mun'a mitinin ama mitmu-a dih asah chan abol banga hi nabol loudingu ahi.

⁹Ajehchu Pakai na Pathen'un napeh-u choldona le gou lona munchu nalhung hihlai tadiuve.

¹⁰Ahinla nangho Jordan nagalkaijuva, Pakai na Pathen'un lodinga nana peh-u gama nachen tengule, chule nakimvel uva namelma teu jouse-a kona choldona napeh tengule, bitkeija nachendiu ahitan;

¹¹Chutengle Pakai na Pathen'un amin umna dinga alhending munkhat umintin; hilama chu kathupeh jouse, nagovam thiltohou, naganlhai nahou, nahopsom hou, nakhutjap thilpeh hou, Pakai henga nakitepnao deilhen kitepna jouse nahinchoi dingu ahi;

¹²Chule nangho Pakai na Pathen'u masanga, nangho le nachapateo le nachanuteu, nasoh pasal ho leh nasoh numei hou, chule nakotpi sunguva um Levi miteho toh nakipa khomdiu ahi; ajehchu amaho nang hotoh chan le gou neikhomlou ahiuve.

¹³Mun namuna jouse-a govam thilto nato louna dingin chingtheijin.

¹⁴Ahinla Pakaiyin naphung sungu khat penpena kona alhendoh ding munna chu govam thilto nato uva, chua chu kathupeh jouse nabolding ahi.

¹⁵Ahivanga Pakai na Pathen'u phattheiboh dungjuija aman napeh jouseu chu nalungin angaichat dungjuija nakotpi phung jouse-a natha-a, asa naneh theiding ahi. Mi atheng le atheng louvin jong, sapengchal le sakhichal hijongle aneh theiding ahi.

¹⁶ Thisan bou naneh loudiu, twibanga tolla nasunlhah diu ahi.

¹⁷Nakotpi hou sunga chu nachang hopsom-u, nalengpi gao hopsom, nathao twi'u hopsom, nagancha houlah-a apeng masaho ahiloule nakelngoi hon lah uva apeng masaho, kitepna-a nakitepna hou, nalungcham thilto hou, nakhutna najap thiltohou chu naneh theilou dingu ahi.

¹⁸Amavang Pakai na Pathen'un alhending mun'a chu Pakai na Pathen'u masanga vang ,nang le nachapate le nachanute, nasoh pasal le nasoh numei ho, chule nakotpi hou sunga um Levi hotoh naneh teidiu ahi. Chule Pakai na Pathen'u masanga nakhut nangapna jouse-a chu nakipa diu ahi.

¹⁹Leichunga nahinlai chansea Levi mite nanot thap lounadin chingtheijin.

²⁰Pakai na Pathen'un nana teppeh-u banga nagamgi akehletna, chule, Nahinna-in sa nehding ngaichat jeh-a sa nenge nati tengle, nahinnan aduchat sa chan chu naneh thei ahi.

²¹Pakai na Pathen'in amin koina dinga analhen munchu nanga kona agamlat behsetna ahile, keiman kathupeh banga, Pakaiyin napeh nagancha hon le nakelngoihona kona natha-a, nakotpi phunga chu nahinna-in aduchat channa naneh ding ahi.

²²Sapeng chal leh sakhichal kineh banga naneh ding ahi; athengle atheng louvin kibanga aneh dingu ahi.

²³Thisan bou chu naneh louhelna dingin chingtheijin; ajehchu thisan chu hinna ahin; chule hina chu asa toh naneh koptha theilou ding ahi.

²⁴Nanghon hichu naneh loudiu, twibanga tolla nasunlhah dingu ahi.

²⁵Pakai mitmu-a thildih nabol tengle, nangma le nanunga nachate naphat theina dinguva hichu naneh lou dingu ahi.

²⁶Nathil theng neiho le nakitep naho bou chu nachoija, Pakaiyin alhending mun'a chu nache ding ahi.

²⁷Chule na govam thilto chu asa le athisan agoma Pakai na Pathen'u maicham chunga na nato-a, chule aganlhaina thisan chu Pakai na Pathen maicham chunga kisung lhading, asachu naneh ding ahi.

²⁸Pakai na Pathen mitmu-a apha le adih nabol tengle, nangma le nanunga nachate dinga a-itih-a naphat theina dinguva, nangman kathupeh jouse hi lunglutna nangaija nanitding ahi.

²⁹Pakai na Pathen'in galo dinga nachenao gama nampiho chu namasanguva kona asuhmanga, nanghon amaho najo uva, agamuva nachen tengule;

³⁰Namasanguva kona akisuhmang banguva, amaho nung najuina-a na-o louna ding le, hiche namhohin itobanga a-pathen'u ajenum? amaho bolbangin eihon jong bolute, tia a-pathen'u thudol hou nakhol louna dingun chingtheijun.

³¹Hitobanga chu Pakai na Pathen'u henga nabol loudingu ahi. Ajehchu amahon Pakaiya thet umjouse, ahot ho chu abol jiuvin, achapateu le achanuteu san a-pathen dingun meijin ahal jiuve.

³² Boldinga thu kapeh chanchu nabolding ahi; hichea kona chu nabelap louding, lah jong nalahdoh louding ahi.