Read Thado Chin Danbu 13 Bible Online

Danbu 13 - Thado Chin bible

Danbu 13

¹Nalah uva themgao ham, mang neiham asodoh-a, melchihna ham, thil kidang namusah uva,

²Chule melchihna ham, thil kidang ham chu aguilhuna, chule naheng uva, Nahet khahlouvu pathen dangho juiju hitin, amaho jennu hite tia aseile;

³Nanghon chuche themgao ham, mang neipa ham thuchu ngaihih-un; ajehchu Pakai na Pathen'in nalung pumpile nalhagao pumpiuva Pakai na Pathen'u chu nangailut nangailut lou hetna dia napatepmu ahi.

⁴Nanghon Pakai na Pathen'u nung najuijuva, naginuva, athupeh ho nanit uva, athu naman uva, ama najen uva, chule ama-a nabediu ahi.

⁵Chule chuche themgao ham, mangnei ham pachu tha jengding ahi; ajehchu Pakai na Pathen'u Egypt gama nahinpuidoh uva, sohchana in'a kona nalhatdoh paova kona kihei mangna ding thu aseijin, Pakai Pathen'in chedinga thu napehnao lampia kona kiheimang ding nagouvin ahi. Chutia chu nanghon agilou chu nalah uva kona chu nasuhmang diu ahi.

⁶Nanu chapa nasopipa ham, nachapa ham, nachanu ham, na-angkoi na-inneipi ham, nagol napai ham, nahinna tobang hela nagel khatnin guhthima najola, nahenga, Nangman nahetkhah lou, nangma le napaten ahetkhah louvu pathen dangho gahouvu hite;

⁷Nakimvel uva mite, nakom naiham, gamlatah-a umham, kolmonga pat kolmong langkhat gei pathen ho chu gahouvu hite tia aseija ahileh,

⁸Nangman amachu nanoppeh louding, ngaijong nangaipeh louhel ding; namitnin jong akhotolou ding, kheh jong nakheh louding, chule imjong na-im mang lou ding;

⁹Amavang natha teitei joh ding; nangman ama thana dinga achunga nakhut nalhah masat pending, chujoule mipijouse khut chu achunga chuding ahi.

¹⁰Chule ama chu songa nase-a naselih dingu ahi; ajehchu aman Egypt gamsunga sohchana in'a kona nahin puidoh Pakai na Pathen'a kon heimang ding nagon ahi.

¹¹Chutia chu Israel jousen ajah uva, kicha diu, chule nalah uva hitobang gitlounahi abolkit tah loudingu ahi.

¹²Pakai na Pathen'in chenna dinga nanapeh khopiho khatna thu kisei;

¹³Nalah uva kon mi phabep, Belial chate achedoh-un, akhopi sunguva mite chu ajol lhaovin, ajah uva, Nanahet khah louvu pathen dangho lhachana tong dingin cheohite, tia kisei najah-a ahile;

¹⁴Chuteng nangman nadoh toh ding, nakhol ding, gunchutah tah-a nadoh ding, chule ven, hichu thutah ahia, chutobang thet umchu nalah uva akibol tahbeh ahi-a ahile;

¹⁵Chuche khopi-a chengho chu chemjam hema natha teiding, chua cheng jousele, chua ganchahon chu chemjam hema nasuhmang hel ding ahi.

¹⁶Chule chua galthil kichom jouse chu kholai lamlena nakhop sohkeija, chuche khopi le thilkichom takip chu Pakai na Pathen dinga meija nahalding ahi. Chule hichu a-itih-a dinga kisevuma, avela kisadohkit louhel ding ahitai.

¹⁷Chule nakhutna gaosap thil natohkhah louding ahi: chutile Pakai chu tijat umtah alungsatna-a kona akileheija, napu napateu henga anamusah banga hepina namusah-a, nachunga lainatna aneija, napunsah ding ahi;

¹⁸Ajehchu Pakai na Pathen mitmu-a adih bolna dinga tunia keiman thu kapeh ama thupeh jouse nanitna dingin, Pakai na Pathen aw nangaijin ahi.