Read Thado Chin Danbu 14 Bible Online

Danbu 14 - Thado Chin bible

Danbu 14

¹ Nangho Pakai na Pathen'u chate nahiuve: mithi puldou na-a nangho le nangho naki-at chen loudingu, chule namitmulu jong nahet tol louhel dingu ahi.

² Ajehchu nangho Pakai na Pathen uva dinga mitheng nahiu ahin, chule Pakaiyin leichunga um nam jouse chungvuma ama-a tum hidinga achombeh-a nalhenu ahi.

³Nanghon thet um kiti mongmong naneh louhel dingu ahi.

⁴Nanghon naneh dingu saho chu: bongchal, kelngoi, chule kelcha.

⁵Sakhichal, sapengchal, sajuh, gamkel, gambongchal chule gamkelngoi.

⁶Chule sa jouse lah-a kon akengtin kikhena atin ni-a kika, chule anehsa ihdoh kitna lhaikit tapou chu naneh dingu ahi.

⁷Hijongle anehsa ihdoh kit ahiloule atin kikhenkah lah-a kon sangongsang, telep, jupi, hichehohi naneh loudiu ahi; ajehchu amahon anehsa a-ihdoh-un alhaikit naovin ahin atinnu vang akika pon ahi. Hijeh-a chu nangho dinga athenglou hiuva ahi.

⁸Chule vohcha jong atin akikah vangin anehsa a-ihdoh-a alhaikit lou jeh-in nangho dinga athenglou ahi. Nanghon asao naneh loudiu, athilongu jong natohkhah loudiu ahi.

⁹Twilah-a ganhing nenehthei houchu hichehohi ahi: alha nei le alipnei jouse naneh diu ahi.

¹⁰Chule alha le alip neilou jouse chu naneh loudingu ahi; hicheho chu nangho dinga thenglou ahi.

¹¹Vacha theng jouse naneh dingu ahi.

¹²Ahin naneh loudiu hochu: muvanlai, mungagal, muthong

¹³Muvom, mubong, chule muthong toh kilimlo jouse.

¹⁴Va-ah le amatoh kilimlo jouse,

¹⁵Chule sumbu, vabah, kakhut, chule mu toh kilimlo jouse.

¹⁶Sumbuchanglit, sumbupi, twivatot,

¹⁷Chule twivamuhsao, muthong lhem, vatot muhkon

¹⁸Chule twilungva, twivakang le akilimlo jouse, vakhong lhu le bah,

¹⁹Chule a-opma kitholtho-a lengthei takip nangho dinga athenglou ahi: hicheho chu nehlou ding ahiuve.

²⁰Ahinla vacha thengho jouse chu naneh theiju ahi.

²¹ Nanghon athikam imacha naneh loudingu ahi: hichu nakotpi phunga um kholjin mihon anehdiuva napeh ding; ahiloule gamchom mi henga najohthei ahi. Ajehchu nangho Pakai na Pathen'u dinga mitheng nahiu ahi. Nanghon api noitwija kelnou nahon loudingu ahi.

²² Akumtina nalouvin asodoh namuchi-a kona hungpeng doh jouse hopsom-a hopkhat thonlouva napeh ding ahi.

²³Pakai na Pathen ginje nakihil jing theina dinga, nachang hopsom, nalengpi theiga hopsom, nathao twi hopsom, nabonghon le nakelngoi hon na kona peng masaho chu amin umna dinga alhendohna munachu Pakai na Pathen angsunga naneh ding ahi.

²⁴Pakai na Pathen'in phatthei naboh teng, Pakai na Pathen'in amin umna dinga alhendohna mun chu nanga kona agamlhat behsetna, ahiloule alampi chu asao behsetna, chutia chu napoh joulouva ahile;

²⁵Nangman athil chu sum nasosah-a, sum chu nahin choija, Pakai na Pathen'in alhendohna mun'a chu nacheding ahi.

²⁶Chule hiche sum chu nahinna-in angaichat jouse bongchal ham, kelngoi ham, lengpithei ham, ahiloule zuchih ham, nahinnan angaichat jouse chohna-a namana; chukoma chu Pakai na Pathen angsunga naneh-a, nangma le na-insung mite kipah tah-a naum dingu ahi.

²⁷Chule nakotpi sunga um Levi mite chu nanot thap louding ahi; ajehchu aman nangma toh chan le goulo aneikhom pon ahi.

²⁸Kumthum akichai sehle chuche kum-a nathilsoh jouse hopsom nahin choija, nakotpi sunga nasetkhom ding,

²⁹Chule Levi mite (ajehchu amahon nangma toh chan le goulo aneikhom lou ahi,) le na kotpi sunga um namdang mi, pabeiho, chule meithaiho chun aneh uva vading ahiuve; chutile Pakai na Pathen'in nakhutna natoh jouse chu phatthei abohna ding ahi.