Read Thado Chin Danbu 15 Bible Online

Danbu 15 - Thado Chin bible

Danbu 15

¹Kum sagi kichai sehle lha ongna nabolji ding ahi.

²Chule lha ongna umdan chu hichehi hiding ahi: aheng akom batna pechanin alha-ong ding ahi; aheng akom ahiloule asopi batna homa chun alahpeh teitei louding ahi; ajehchu hichehi Pakai lha-ongna kiti chu ahi.

³Gamdang mi batna napeh vang chu nalelah kit thei ahi, ahinla ipi hile nangma-a nasopi henga umchu nalha-ong ding ahi.

⁴Hiche jeh-a chu nalah uva koima avaicha umlou ding ahi; ajehchu lodinga Pakai Pathen'in napeh gama chu Pakaiyin nasatah-a phatthei naboh ding ahi;

⁵Tunia thu kapeh hiche thupeh ho jouse jui dinga Pakai na Pathen aw chu kituptah-a nangaija ahile.

⁶Ajehchu aman nana thutep banga Pakai na Pathen'in phatthei naboh ding ahin: nangman nam tamtah henga nahop ding, amavang nangman apa nalah louding; nam tamtah chunga vai nahom ding, amavang amahon nang chunga vai ahomloudiu ahi.

⁷ Pakai na Pathen'in napehna gama nakotpi sunga chu nasopite khattou nalah uva vaicha auma ahile, nangman nalung natahsah louding, nasopi vaicha-a kona nakhut nakihsah louding ahi.

⁸Amavang ahenga naphalna khut nalhana, alhahsamna-a angaichat lhingsetna napehjoh ding ahi.

⁹Nangman nalungsung gilouva chun Kum sagina lha ongna kum anaitai tia nagel louna dingle; nasopi chunga namit thipma ima pelouva naum louna din chingtheijin; chutile nangma dounan Pakai kou intin, nadingin chonset hikhante.

¹⁰Nangman ama napeh teitei ding; chule ama napeh tengle nalung nanatsah louhel ding ahi. Ajehchu hiche-a ding tah-a chu Pakai na Pathen'in natoh jouse le nakhutna nabol jouse chu phatthei aboh ahi.

¹¹ Ajehchu gamsunga kona migenthei beitih umlou ding ahi. Hijeh-a chu nagamsunga nasopipa, nami vaichapa, namilhasampa chunga nakhut hongphalin tia thu kapeh nahi.

¹² Chule nasopi Hebrew mi pasal ham, ahiloule numei ham nahenga hung kijoh auma, kumgup nangma najentah-a ahile; akum sagi lhinnale nanga kona ongthola nalhadoh ding ahi.

¹³Chule nanga kona ongthola nasoldoh tengle, agohkeova nachemang sah louding ahi.

¹⁴Nakelngoi hona kon, nachang phola kon, nalengpi ga chilna-a kona itlou hella napeh ding; Pakai na Pathen'in phatthei naboh na-a kona chu ama napeh ding ahi.

¹⁵Chule nangman jong Egypt gama soh nanahi-a, Pakai Pathen'in nalhatdoh ahi chu nageldoh ding ahi; hijeh-a chu tunia hichehi kathupeh nahi.

¹⁶Chule hitiding ahi, nangma le na-insungmi angainat jeh, nangma toh umkhom nop asah jeh-a, amachun nahenga, Nanga konin chemang ponge ati-a ahileh;

¹⁷Nangman thih hemkhat nalah ding, kotkhah phunga abil navuding, chule amachu a-itih a dinga nasoh hiding ahi. Chule nasoh numei chunga jong chutobang ma-a chu nabol ding ahi.

¹⁸Nanga kona ongthola nasoldoh chu nang dinga thil hahsatah tobang hilouding ahi; ajehchu thalah soh natoh chan ni atoh-a kum gup set nangman najen ahi. Chutia chu Pakai na Pathen'in natohna channa phatthei naboh ding ahi.

¹⁹ Nagancha hole nakelngoi hon lah-a achal pengmasa ho jong chu Pakai na Pathen dinga nathenso ding: nabongchal peng masapen chu na natoh sah louding, nakelngoi honlah-a apeng masapen jong chu amul navo louding ahi.

²⁰Chule hichu nangma le na insung miten kumsehle Pakaiyin alhenna mun'a chu Pakai na Pathen angsunga naneh dingu ahi.

²¹Chule alah-a nolna nei auma, akengbai ham, amitcho ham, deimotah-a nolna nei umtapou chu Pakai na Pathen henga ganlhaina-a nato louding ahi.

²²Nangin hichu nakotpi ho sunga naneh ding: mi aboh le athengin kibang tah-a sapeng chal le sakhichal sa kineh banga anehdiu ahi.

²³ Athisan bou chu naneh louding, twi banga tolla nasunlhah ding ahi.