Read Thado Chin Danbu 16 Bible Online

Danbu 16 - Thado Chin bible

Danbu 16

¹ Abib lhachu nit inlang, Pakai na Pathen henga kalchuhkut bolin: ajehchu Abib lha jan laija chu Pakai na Pathen'in Egypt'a kona nahin pui ahi.

²Hijeh-a chu Pakaiyin amin umna dinga alhena mun'a chu ganchahon le kelngoi hon lah-a kona Pakai na Pathen henga kalchuh kut ganlhaina nabol ding ahi.

³Nangman hichu chol kiso changlhah toh naneh louding; Egypt'a kona nahung dohlai nikho chu geldohna dinga nahinlaise-a cholsolou changlhah, gimbolna changlhah ngei chu nisagi naneh ding ahi; ajehchu Egypt gama kona kinotah-a hung doh-a nahi.

⁴Chule nagamsunguva chu nisagi sung chol kiso changlhah himhim kimulouding; chule nimasani nilhah lama naganlhai sa chu jankhovah jingkah geija umlou ding ahi.

⁵Pakai na Pathen'in napehna kotpi sung khat penpena chu kalchuhkut ganlhaina nabolthei louding ahi.

⁶Amavang Pakai na Pathen'in amin umnadia alhending mun'a chu, Egypt gama kona hungpotdoh phattah, nilhumdon, nilhah lama chu kalchuhkut ganlhaina nabolding ahi.

⁷Chule Pakai na Pathen'in alhending mun'a chu asa chu nago-a naneh ding, jingkah le nakile-a, naponbuh-a nache ding ahi.

⁸Nigup sunga cholsolou changlhang naneh ding; nisagi nile Pakai na Pathen'a dinga kikhop loupi umding ahi. Hiche sunga chu na natoh louding ahi.

⁹ Nangman hapta sagi nasimdoh ding: hapta sagi chu chang-atna dia koite nalap pat ni-a patna nasim ding ahi.

¹⁰Pakai na Pathen henga nakhut tah-a lungcham thilto nato-a haptaho kut chu nanit ding, Pakai na Pathen'in phatthei naboh dungjui bangtah-a Pakai na Pathen henga napeh ding ahi.

¹¹Chule Pakai na Pathen'in amin umna dinga adeilhen mun'a chu Pakai na Pathen angsunga nangma nahin, nachapa ahin, nachanu ahin, nasohpa ahin, nasohnu ahin, nakotpi sunga um Levi mite ahin, nangma to umkhom namdang mi ahin, pabeiho ahin, meithai ahin, nakipa dingu ahi.

¹²Chule nangma tahjong Egypt gama sohchanga ana um nahi nageldoh-a: hiche dan kisunhohi nanitna nabol ding ahi.

¹³ Nachang le nalengpi ga nakhoptup jou tengle, nisagi sung lhambuh kut naman ding ahi.

¹⁴Chule na kut sunga chu nangma nahin, nachapa ahin, nachanu ahin, nasohpa ahin, nasohnu ahin, chule nakotpi sunga um Levi mite ahin, gamdangmi ahin, paneilou ahin, meithai ahin nakipa dingu ahi.

¹⁵Pakaiyin adeilhen na ding mun'a chu Pakai na Pathen'u henga nisagi sung kut loupi nabol dingu ahi. Ajehchu Pakai na Pathen'in nalhosoh jouse le nakhutsoh jouse chunga phatthei naboh ding ahin, hijeh-a chu nakipa teiding ahi.

¹⁶Kumkhat sunga na pasal jouseu Pakai masanga aman adeilhen mun'a chu thumvei gaki lulah dingu ahi; cholsolou kutna, haptaho kutna, chule lhambuh kutna: chule Pakai masanga khutgoh keova kilulah loudingu ahi.

¹⁷Mitinin Pakai na Pathen'un apeh phatthei bohna dungjuija ajokham cheh apehding ahi.

¹⁸Pakai na Pathen'in napeh nakul kotpi jouse-a, naphung jouse-a thutan hole vaipoho natundoh ding: chule amaho chun mipi thuchu dihtah-a atanpeh dingu ahi.

¹⁹ Dihlou tah-a thu natan louding; mihem mai vea jatum na neilou ding; nehguh jong nalah louding ahi: ajehchu nehguh chun miching mit asuchon, michonpha ho thusei jong aheikon jin ahi.

²⁰Pakai Pathen'in napehna gam chu nalo theija, nachen theina dinga, adih bouchu najui ding ahi.

²¹ Pakai na Pathen maicham nasem nading vella chu ipi thing hitaleh thingbul naphu louding ahi.

²² Pakai na Pathen'in ahot milim tapou natundoh louding ahi.