Read Thado Chin Danbu 17 Bible Online

Danbu 17 - Thado Chin bible

Danbu 17

¹Bongchal ahiloule kelngoi chunga nolna nei, ahiloule deimona um tapou chu Pakai na Pathen henga ganlhaina-a nato louding ahi. Ajehchu hichu Pakai na Pathen dinga thet umtah ahi.

²Pakai na Pathen'un napeh-u kotpi sung hoichepen hijongle, nalah uva Pakai na Pathen thutep sukeh-a amitmua gitlouna bol pasal ahiloule numei akimu doh-a,

³ Pathen dangho agajena, keiman kathupeh hilou nisa ham, lhathah ham, van janel khattou ahouva;

⁴Chule hichu nangma nakisei peh-a, nangman najah-a, gunchu tah-a nadoh toh-a, chule ven, hichu adih ahia, Israel sunga chutobang thil thet um bolla aum chu akiphotchetna ahile:

⁵Chutobang thilse bol pasal ahiloule numei chu nakul kotpi phunglama napui doh-a, chuche pasal ahiloule numei ngeichu, chule athikah seuva songa nase dingu ahi.

⁶ Ahetoh mini, ahiloule mi thum kama kona thidinga lompa chu tha hiding ahi; ahin ahettohsah mi khat kama vang amachu kithat louding ahi.

⁷ Ama thana dinga chu ahettohsah hon akhut alap masat pen dingu, chujoule mipi jousen khut alhahdiu ahi. Chutia chu nalah uva thilphalou chu nasuhmang diu ahi.

⁸Thisan kiso thu, them kichu thua, kivohto thu, nakotpi sunga kinel nohphah na thu nang dinga ageltoh hahsa behseh ahung sodoh-a ahile: nakipat doh-a, Pakai na Pathen'in adeilhen ding mun'a chu nache ding;

⁹Chuche laija Levi thempuho le thutana pang ding pa henga nahunga, nadoh tohding; chule amahon athutan lhuhnao chu namusah dingu ahi.

¹⁰Chule Pakaiyin adeilhen ding mun'a mihon namusahdiu dungjuija chu nabolding; chule nahetsah-u jouse dungjuija nabolna dinga nachih theiding ahi.

¹¹Amahon thulhuh dan nahil dungjui le, thutan dan nahil dingu dungjuija nabol ding; amahon namusahdiu thu lhuhsah-a kona chu jetlam le veilama napeldoh louding ahi.

¹²Chule Pakai na Pathen anga kinbola pangji thempu thu le thutanpa thu ngailouva ama kisongpa ngei chu thi ding ahi: chule Israel lah-a kona aphalou chu nasuhmang ding ahi.

¹³Chutile mijousen jaovintin, kichaovintin, ama le ama kisongin ima boltapou vinte.

¹⁴ Pakai Pathen'in napehna gam chu nahung lhuna, hichu nalo-a, asunga nachenna, Avela namho jouse bangin kachunga lengkhat kisem inge nati tengle;

¹⁵Pakai na Pathen'in alhendingpa tahchu iti jongle lenga natunding ahi: nasopite lah-a kona mikhat chu nachunga lenga natunding ahin; nasopi hilou namdang mi chu nachunga natunlou ding ahi.

¹⁶ Ahinla aman ama dinga sakol apunsah louding, ahiloule sakol apunsahna dinga mite chu Egypt gama akilesah louhel ding ahi: ajehchu Pakaiyin naheng uva, Nangho hiche lampia chu nakilekit louheldiu ahi, anatin ahi.

¹⁷Alung kiheimang louna dinga jijong tampi anei louding; chule sana dangka jong nasatah-a apunsah louhel ding ahi.

¹⁸Chule hiti ding ahi, ama alenggam laltouna-a atouteng, Levi mite le thempuho angsung um hiche dan thuhi lekhabu khatna akijih dohding:

¹⁹Chule hichu amatoh umkhom ding, ahinkho lhum keija asimding ahi: chuti henglang hile Pakai ginje ahetna, chule hiche danthu-a thuchengho le dan kisunho chu atohdoh na dinga chingthei ding,

²⁰Asopiho chunga alungthima akichoisang lou ding, chule thupeh-a kona jetlam ahiloule veilama akihei manglou ding; achaina geija Israelte lah-a ama ahin achate ahin alenggam sunga ahinkho sot thei ding ahi.