Read Thado Chin Danbu 18 Bible Online

Danbu 18 - Thado Chin bible

Danbu 18

¹Thempuho le Levi ho, chule Levi phung jouse chun chanle gou Israel toh aneikhom theilou diu ahi; amahon meija kigou Pakaiya dinga thiltoho le Ama chanho chu aneh dingu ahi.

² Hijeh-a chu amahon asopite lah-a gou aneiloudiu ahi: aman ahenguva aseibanga, Pakai chu agoulou ahi.

³Chule mipi-a kona thempu chanding chu hicheho hi ahi, bong ahiloule kelngoija ganlhaina thilto hintoh hochun thempupa chu adah, akhalhang, chule agilpi apeh dingu ahi.

⁴Nangman na chang ga masapen, lengpitwi masapen, thaotwi masapen, chule na kelngoimul kivou masapen jong ama napeh ding ahi.

⁵Ajehchu Pakai na Pathen'in amale achapate chu a-itih-a Pakai mina lhacha na tong dinga naphung jouseu lah-a kona ana lhendoh ahi.

⁶Chule Levi mikhat chu akhopemna Israel jouse lah-a khopi khatpen pena kona ahunga, Pakaiyin alhending mun chu alungpumpia ngailutna neija ahunga ahile;

⁷Chuteng Pakai anga dingjing asopi Levi hon abol bang banga Pakai a-Pathen mina lhacha-a pangding ahi.

⁸Agouchan kijohna-a kona amu tilou amahon nehding chan kibang aneicheh dingu ahi.

⁹Pakai na Pathen'in napehna gam chu nalhun tengle, chuche namho chonna thet umtah hochu boldinga naki themchuh louhel ding ahi.

¹⁰ Nalah uva achapa ham ahiloule achanu ham mei pal galkaisah, ahiloule ailhim mangcha, gaothusei, mitpheldoi mangcha, ahiloule doichoi,

¹¹ Ahiloule milhimthei, lhagao bohtoh kijol, doi-aithem, mithilha koutheiho chu nalah uva umloubeh ding ahi.

¹²Ajehchu hiche thilho boljouse chu Pakai dinga thet umtah ahin; chule hiche thet umtahho jeh-a hi Pakai na Pathen'un na-angsung uva kona amaho anodoh ahi.

¹³ Nangma Pakai na Pathen angsunga pha chamkim nahiding ahi.

¹⁴Ajehchu naloding hiche namhohin gaothusei ho le aisan ho thu angaiju ahin; nangma vang Pakai na Pathen'in chutia boldin naphalpoi.

¹⁵ Pakai na Pathen'in nalah uva kon, nasopite lah-a kona keima tobang themgao khat nahin tundoh pehdingu ahin; amathu chu nangaidiu ahi.

¹⁶Horeb mun'a kikhopi nikho-a, Kathi louna din Pakai ka Pathen aw neijah sahkit danlang, hiche meikong nasatah hi neimusah kit hih-in, tia Pakai na Pathen nangaichatna jouse dungjui chun.

¹⁷Chuin Pakaiyin kahenga, Amahon aseiju chu aseikha lheh-uve ati.

¹⁸Keiman asopiteu lah-a konin nangma tobang khat themgao khat tundoh peh ungting, akamsunga kathu kakhum ding; keiman ama kathupeh ding jouse chu aman ajah uva aseipeh ding ahi.

¹⁹ Chule hitiding ahi, aman kamina aseiding kathu hohi angailou chanchu, keiman ama-a kona hichu kangeh ding ahi.

²⁰Ahinla aseidinga thu kapehlou kamina achama thusei themgao, ahiloule pathen dangho mina thusei chanchu, chuche themgao ngeichu thiding ahi.

²¹Chule nangman nalungthima, Thu chu Pakaiyin asei ahipoi ti iti kahet ding ham? nati-a ahile,

²²Themgao khatnin Pakai mina thu aseija, aseidoh thilho chun anung ajui louva, ahung guilhun louva ahile, hiche thilchu Pakaiyin asei hilou ahin; amavang themgaopa chun hichu ama lungchama asei ahi: nangman ama chu nakichat louding ahi.