Read Thado Chin Danbu 19 Bible Online

Danbu 19 - Thado Chin bible

Danbu 19

¹Pakai Pathen'in agamu napeh amaho chu Pakai na Pathen'in asuhmanga, chule nangman agamu natoupha-a, akhopi hou le a-inhouva nachen tengle;

²Pakai Pathen'in lodinga napehna gam lailunga chu khopi thum nakhendoh ding ahi.

³Pakai Pathen'in lodinga napehna gam pumpi chu hopthum-a nahopkhen na, tolthat takip jamlut theina dinga lampi nagon ding ahi.

⁴Chule tolthat ahintheina dinga chumuna jamlut dingho thudol chu hichehi ahi: amasanga kihot tona umlouva tosoija aheng akom that ho;

⁵Mi aheng akom toh gam manga thingphuh dinga achea, thingchu phuhlhuh nadinga aheicha chu alap donga, achang chu aga-a kona alendoh-a, aheng akompa chunga achuh-a, athi-a ahile; hiche khopiho khatna chu jamlutna hingding ahi.

⁶Amasa hotna aneiloujeh-a ama chu thidinga lom ahilou vangin, thisan phu lapan tolthatpa chu alungsat petnin nungdel intin, lampi asaojeh-a phapantin, that getninte.

⁷Hijeh-a chu khopi thum nakise khen ding ahi, tia thu kapeh nahi.

⁸Chule Pakai na Pathen'in napu napate henga peh dinga anahahselna gamchu akehletna, napu napate pehdinga athutep gam apumpi chu napeh-a ahile;

⁹Pakai na Pathen chu ngailut ding le alampi jot jing dinga, tunia thu kapeh hiche thupeh jousehi nanitna ahile; hiche khopi thum tilouva khopidang thum jong nakibelap thei ding ahi.

¹⁰Chutia chu Pakai Pathen'in lodinga napehna gamsunga chu thisan phu nachunga aumlouna dinga, monabei thisan kiso umlou ding ahi.

¹¹Ahinla khat touvin aheng akom ahotna amachu achanlhih-a, ama douna-a akipatdoh-a, thina theija avoh-a, athitah-a, hiche khopiho sung khatna chu ajamlutna ahile;

¹²Chuteng akhopi upaho chun mi asola chua kona ahinpuijuva, athi theina dinga thisan phulapa khutna chu apehdoh diu ahi.

¹³Namit nin ama chu akhoto louding, amavang aphatna dinga themona bei thisan kiso chu Israel'a kona nasuhmang ding ahi.

¹⁴ Pakai Pathen'in lodinga napeh nagoulona gamsunga malaija mihon anaphu sao, naheng nakom gamgi chu nachondoh louding ahi.

¹⁵ Mihem khat themona ahin, ahiloule chonsetna ahin, itobang chonsetna bola hijongle, mikhat douna-a hettohsah khat kipanlou ding ahi. Hettohsah mini ham ahiloule mi thum ham kama bou athudol chu kisudet ding ahi.

¹⁶Hettohsah lhem khatnin mikhat thilbol adihlouva ngoh dinga ahung kipatdoh-a ahile;

¹⁷Akinel teni chu anilhona chuche nikho laija thempu le, thutanpa masang Pakai angsunga chu ding lhonding;

¹⁸Thutanpa chun gunchu tah-a kholtoh ding: chule veuvin hettohsah chu hettohsah lhem ahia, asopi chunga dihlou tah-a ahettohsah ahile;

¹⁹Chutengle asopi chunga bolding agot bang banga chu, amachunga naboldiu ahi. Hitia chu nalah uva kona thilse chu nasuhmang diu ahi.

²⁰Chule aumnalai ho chun ajah diu, kichadiu, chukalle chutobang thilse chu nalah uva abolkit loudiu ahi.

²¹ Chule namitnin akhoto louding; hinkho khela hinkho, mit khela mit, ha khela ha, khut khela khut, chule keng khela keng kila ahi.