Read Thado Chin Danbu 2 Bible Online

Danbu 2 - Thado Chin bible

Danbu 2

¹ Chujouvin Pakaiyin kahenga asei bangin iki heijun, twipisan lampia gamthiplam jonin ikhol jinun, chule Seir molsang chu nikho tamtah ivelkolun ahi.

²Chuin Pakaiyin kahenga aseijin, hitin ati;

³Nanghon hiche molsang hi navelsot behset taove; sahlam sanga kiheijun,

⁴ Chule nangman mipi chu thu penlang, Seir'a cheng nasopi hou Esau chate gamsung najotdiu; amahon nakichat diu ahi; hijeh chun nangho chingthei tah-in umun;

⁵Amaho toh kina hih-un, ajehchu keiman agamu chu nangho kapeh louding, kengphang te jong kapeh louhel ding nahiuve; ajehchu Seir molsang chu Esau lodia kanapeh ahitai.

⁶Nanghon naneh dingu an-neh chu amahoa kona suma nakichoh uva nanehdiu, chule nadon diu jong suma nakichoh uva nadondiu ahi.

⁷Ajehchu Pakai na Pathen'un nakhut uva natoh jouseu phatthei aboh-in, chule gamthip lentah najotnu chu ahen ahi. Hiche kum somli sunghin Pakai na Pathen'un na-umpiuvin, lhahsamna imacha nanei pouvin ahi.

⁸Chuin Eloth le Ezion-gober'a pat phaicham lampi jotna-in Seir'a cheng Esau chilhah isopiteu gamchu ipal pouvin, ikiheijun Moab gamthip lampia iki tolun ahi.

⁹ Chuin Pakaiyin kahenga, Moab chu sugim hih-un, gal'in jong kisatpi hih-un; ajehchu agamu chu nalodiuva kapeh louding nahiuve; ajehchu Ar chu Lot chilhahte kapeh ahitai, ati.

¹⁰Masangin chua chun Anakim te banga len, tam le, sanga Emim mite ana chengun ahi.

¹¹Amaho jong chu Anakim ho banga mihatna sim ahiuvin; Moab miten vang, Emim tin amin sah-un ahi.

¹²Masangin Seir'a hin Hor miho jong anachengun; ahinla Pakaiyin amaho apeh gam Israel'in analo bang chun, Esau chaten amasanguva konin asumangin, alopaijun, amaho khelin acheng taove.

¹³Tun kipatdoh-un lang Zered vachadung chu galkaijuvin, tin kaseijin; chuin Zered vachadung chu igalkai taove.

¹⁴ Chule Kadesh-barnea idalhah uva pat Zered vacha igalkai geiju, Pakaiyin ahahsel nao banga janel lah-a kona gal hat ho khang kichaihel tokah chu kum somthum le kumget ahi.

¹⁵Ajehchu amanthah hel tokah uva, janel lah-a kona sumang dinga Pakai khut chun amaho anadou tahbeh ahi.

¹⁶Hijeh chun ahitin ahi, eiho lah-a kona galsat ho jouse amanthah heluva, chule athigam phatnun,

¹⁷Pakaiyin kahenga hitin aseijin, hitin ati,

¹⁸Tunia hi nangman Moab gamsung Ar najotpaija nagalkai ding ahi;

¹⁹ Chule Ammon chate naija nahung tengle, amaho chu sugenthei hih-in, chule kinah jong kinahpi hih-in; ajehchu Ammon chate gamchu nalodinga kapeh louding ahi; ajehchu Lot chate lo dia kanapehsa ahitai, ati.

²⁰(Hiche gam jongchu mihat ho gama anakisim ahin; hia chu mihat ho masang laija anacheng ahiuve; chule amaho chu Ammom miten Zamzummim anasah-uvin ahi.

²¹Anakim ho banga len, tam le sang ahiuve: ahinla Pakaiyin amaho chu amasanguva asumangin, amahon alopaijun, chule chu-a chun achengun:

²²Seir'a cheng Esau chate-a dinga amasanguva kona Hor mite asuhmangpeh bangin abolpeh-in ahi: chuin amahon alopaijun, tuni geihin amaho khelin achengun ahi.

²³Chuin Hazerim le Azzah geipeh-a cheng Avim miho chu Caphtor-a kona hungdoh Caphtor miho chun asumangun, chule amaho khelin acheng taove).

²⁴Kipatdoh-un, nakholjin ban jomun lang, Arnon vapi galkaijun: veuvin, Amor mi Heshbon lengpa Sihon le agam chu nakhut na kapeh ahitai. Hichu lopanun lang gal'in kidoupiuvin.

²⁵Tunia hi vannoi pumpi-a um namho chunga nangma kichatna le ginna kakoi patding ahin; amahon nangma chungchang thu kilhut jaovintin, nangma jeh-a kithing uva, lung gentheidiu ahi.

²⁶Chuin Kedemoth gamthipma konin Heshbon lengpa Sihon henga chamna thu kengin sottol kasolin,

²⁷Nagam sungu neijotpai sah-in, lamlhonga bou chengkatin, jet le veija jong kiheiponge;

²⁸Nangman kaneh ding an sumin neichoh sah inlang, chule kadon ding twi jong sumin neichoh sah-in: kenga bou kagalkai dingu ahi.

²⁹(Seir'a cheng Esau chate le Ar'a cheng Moab chaten eibolna bangin,) Pakai ka Pathen'un eipehnao gam Jordan kagalkai kahseuva dingbou ahi, kati.

³⁰Ahinla Heshbon lengpa Sihon'in agam ijot galkai diuchu eiphalpeh pouve. Ajehchu Pakai na Pathen uvin tunikho-a banga hi nakhut nuva apehlut theina dinga alungu asuh tah-a, alouchal sah ahi.

³¹Chuin Pakaiyin kahenga, Vetan keiman Sihon le agam chu namasanga kape pantai: agama nachenthei nadin lo pantan, eiti.

³²Chujouvin Sihon amale amite jouse Jahaza'a eiho douna-a galsat din ahung kondoh taove.

³³Chuin Pakai i-Pathen'un amaho chu imasanguva ahinpedoh-in, chuin eihon ama le achapate, chule amite jouse ithatgam taove.

³⁴Chuin hiche petchun akhopi jouseu ilaovin, khopi tinna mihem jouse pasal, numei, chule naosen ho isumang helun, khatcha jong ihinghoi pouvin,

³⁵Eiho-a dingin aganchahou le akhopihouva kichomho bou ilaovin ahi.

³⁶Arnon vapi pamchina um Aroer'a pat, vapi chinna um khopi-a kipat Gilead chan geijin, eiho dinga hetbeh seh khopi khatcha aumpoi. Ajehchu Pakai i-Pathen'un abonchauvin eiho eipe soh hel taovin,

³⁷Ammon chate gam sese le Jabbok vapi gamkaiho, molsang ho-a khopiho le Pakai i-Pathen'un eijahda nao mun ho-a bou chu nahunglut louvu ahi.