Read Thado Chin Danbu 21 Bible Online

Danbu 21 - Thado Chin bible

Danbu 21

¹Pakai Pathen'in lodinga napeh gamsunga chu mikhat kithatna, loujaova along luma, koitha ahi kihelouva aumle:

²Chuteng na upahou le nathutan hou hunguva, akithatpa-a kona akimvela khopiho chu atediu;

³Chule hitiding ahi, akithatpa-a kona khopi naipen, hiche khopi-a um upaho ngeichun bongla natong loulai, koljon kaikha loulai khat ahinkaijuva;

⁴Chule chuche khopi upaho chun bongla chu loukikai loulai le ima tuloulai phaichama chu akai lhah uva, chuche phaichama chu angong atan lhahdiu ahi.

⁵Chule thempuho Levi chapaten ahin nai dingu ahi; ajehchu amaho chu Pakai na Pathen'un akin bol dingle, Pakai mina phattheiboh dinga alhendoh ahin; kinohphahna tin le kivohtona thutin chu athuva kona kitan ding ahi.

⁶Chule akithatpa-a kona khopi naipen upaho jouse chun phaichama angong kitan bongla chunga chu akhutnu akisop uva,

⁷Chule amahon hitia hi adonbut uva aseidingu ahi, Kakhut uvin hiche thisan hi aso ahipon, chule kamitnun jong amupon ahi.

⁸Vo Pakai, nalhatdohsa nami Israelte henga hepina neijinlang, chule themona neilou thisan kiso hi nami Israelte chunga nga hih-in, atidiu ahi. Chutile thisan kiso chu ngaidama umding ahi.

⁹Chutia chu Pakai mitmu-a apha naboltengle, nalah uva kona mona neilou thisan kisochu nakoimang dingu ahi.

¹⁰Namelmate chunga galbol dinga nakon doh-a, Pakai na Pathen'in amaho chu nakhutna napeh doh-a, gal hinga nakaija,

¹¹Chule sohchangho lah-a chu numei melhoi namu-a, deichatna naneija, naji dinga nangaito-a ahile;

¹²Nangman amanu chu na-in lama napui ding, alu akivo tolding, chule atinho atan ding;

¹³Chule amanun asoh channa von chu ama-a kona aholhah-a, na-inna umden ding, lhakhat lhingset anu le apa pul adou ding ahi: chujouteng amanu henga nalutna, a-inneipu nahi-a, chule amanu na-inneipi hiding ahi.

¹⁴Chule hitiding ahi, nangman amanu-a kipana naneilouva ahile, anop nopna-a nasolding; amavang sum manavang najoh louhel ding, kiveina-a nanei louhel ding ahi; ajehchu amanu nasuhnem ahitai. Chapa Lenpen Goulo Thudol;

¹⁵Pasal khatnin jini aneija, khat angailutna, khat ahotna, amani adeinu le ahotnu chun chate ahinpeh gel lhona; achapa masapen chu ahotnu hin ahile,

¹⁶Chuteng hitiding ahi, aman anei agou chu chapate losah dinga agot teng, ahotnu chapa apeng masa sanga chu adeinu chapa apeng nukhahjo chu apengmasa-a asem louhel ding ahi.

¹⁷Aneijouse lah-a channi apeh-a kona ahotnu chapa chu apeng masa-a asim ding ahi. Ajehchu amapa chu thahat kipatna ahin; pen masatna chanvou chu ama-a hija ahi.

¹⁸Mikhatnin chapa louchal le kiphinhat aneija, apaham anuham thu ngailouva, gimbolna apeh teng jongle athuhon angailouva ahile,

¹⁹Chuteng anu le apan amatlhona, akhopi upaho heng le aumnao kotpi phunga ahinpuidoh lhonding;

²⁰Chule amanin khopi upaho henga chu, Hiche kachapa lhonhi louchal le kiphinhat ahin, kathulhon ngaiding anompoi; amahi neh hatle julop ahi atilhonding ahi.

²¹Chule akhopi sunga pasal ho jouse chun athina dinga songa asediu ahi. Chutia chu nalah uva kona agilou chu nakoi mangdiu; Israelte jousen ajah uva, kichadiu ahi.

²²Chule pasal khatnin thinalom chonset abola, amachu thading ahia, amachu thinga nakhai lih-a ahile;

²³ Along chu jankhovah-a thing chunga umden louding, hiche nima ma chu navuitei ding ahi; (ajehchu akikhai chu Pathen gaosop changa ahi;) Pakai Pathen'in goulo dinga napeh gamchu akisuboh louding ahi.