Read Thado Chin Danbu 22 Bible Online

Danbu 22 - Thado Chin bible

Danbu 22

¹ Nasopipa bongchal ahiloule kelngoi vahmang namu-a ahile nakimu mosah louding ahi: iti nama jongle nasopite henga nahinpuilut teiding ahi.

²Nasopipa chu nanaija umlou ahia, ahiloule nahetlou ahia ahile, na-in'a nahin kaija, nasopin ahinhol kahse-a naumpi-a, chule amachu nalepeh kitding ahi.

³Chutobang ma-a chu asangan chunga nabolding; aponsil chunga nabol ding; nasopipa mansah thil mang jouse nangin namu chasun chu chutobanga chu nabolding; nangman nakiselden louding ahi.

⁴Nasopi ho sangan ahiloule bongchal lamsih-a lhu-a namu-a ahile nakimu mosah louding ahi: nangman amaho akaidoh-a aumkitna dinga nakithopi tei teiding ahi.

⁵Numei jin pasal von akivon louding, pasal'in jong numei von akivon louding ahi. Ajehchu chutia boljouse chu Pakai dinga thet umtah ahi.

⁶Lamdunga nache na-a vachabuh thingchung ham, tollhang hama anou ham atwi ham um nato-a, apin anou ham, atuiham chu aopkhuma ahile, api chu anou toh nalahkop louding ahi.

⁷Amavang api chu itijong le nalhadoh-a anou vang chu nakilah ding ahi; chutile nangdin phantin, chutia chu nahinkho sotding ahi.

⁸In thah nasah teng, chua kona mikhatou alhah-a na-in chu thisan sona-in ahilouna dinga, na-in chungdal nasem ding ahi.

⁹ Nalengpi leija muchi dang chomchom natulou ding ahi; achuti loule namuchi tu ga chun nalengpi theiga chu asuboh ding ahi.

¹⁰Bongchal le sangan mang kopma lou nakai louding ahi.

¹¹Nangin samul le tupat kihal tobang, pat jatchom chom kihal ponsil nasil louding ahi.

¹² Nangman nakivon ponsil mongchep munlia chun ponjem semin.

¹³Mikhatnin ji aneija, amanu henga alutna, avetda-a,

¹⁴Amanu chunga nolna thusei phat akipeh-a, amanu asuh minsetna, Hichenu hi kakipuijin, ahenga kahung phatnin nungah ahipoi ti kamu doh-e atia ahile;

¹⁵Chuteng nungahnu nule pa chun chuche khopi-a kotpi phunga upaho henga chu nungah theng ahina melchihna amusah lhonding;

¹⁶Chule nungahnu pa chun upaho jah-a chu, Hichepa hi aji dinga kachanu kanapen ahile, amapan ahotbol tan;

¹⁷Chule veuvin, amapan amanu chunga nolna thu aseijin, Nachanu anungah hina kahepoi ati; ahinla hichehohi kachanu nungah theng ahina melchihna ahi, atiding ahi. Chule khopi upaho angsunga chu ponchu aphajal lhonding ahi.

¹⁸Chule chuche khopi upa hochun mipa chu amatnuva asehgimdiu;

¹⁹Chule amahon amapa chu dangka shekel jakhatna agapmuva, hichu nungahnu pa apeh diu ahi; ajehchu aman Israel nungah theng khat aminset sah ahi: chule amanu chu amapa ji hikit ding; aman amanu ahinlaisea ada louhel ding ahi.

²⁰Ahinla hichu adih ahia, nungahnu dinga chu nungah theng ahina melchihna akimulouva ahile,

²¹Chutengle nungahnu chu apa inkot phunga akaidoh uva, khopi pasal hon amanu chu athina dinga songa ase ding ahi; ajehchu amanun apa insung jonthanhoi apatna, Israel sunga ngolhoi thil abol ahi: chutia chu nalah uva kona thil gilou chu nasuhmang dingu ahi.

²²Numei aji um luppi pasal akimule, anilhona numei luppi pasal le numei chu thikop ding ahi. Chutia chu Israel lah-a kona thil gilou chu nasuhmang diu ahi.

²³Pasal khat dinga jiholsa nungah theng chu mikhatnin khopi sunga amua, amanu aluppia ahile,

²⁴Chuche khopi kotpi polama anilhona nahin kaidoh uva, athilhonna dinga songa nase dingu ahi; numeinu chu khosunga umngala apen loujeh, chule pasalpa chu aman aheng akom ji asetpi jeh ahi. Chutia chu nalah uva kona thil gilou chu na suhmang diu ahi.

²⁵Ahin mikhatnin loujaova mijihol amua, mipa chun acham louva abola, aluppi le; amanu luppi mipa bouchu thiding ahi.

²⁶Amavang nungahnu chu imacha nalo louding ahi; nungahnu chunga chu thina theilom chonset umlou ahi: ajehchu hiche thudol hi mikhatnin aheng akom adouva atha tobang ahi.

²⁷Ajehchu aman amanu loujaova amu ahin, mijihol nungah chu apengin, ahuhhing ding koimacha aumpoi.

²⁸ Min nungah theng mijihol hilou amua, amanu amatna, aluppia, chule amani chu akimudoh-a ahile,

²⁹Chutengle aluppi mipa chun nungahnu pa chu dangka shekel somnga apeh-a, amanu chu aji hiding ahi; ajehchu aman amanu asuhboh ahitan, ahinlai sungse-a amanu adathei louding ahi.

³⁰ Min apaji akichenpi louding, apa deljong ahodohpeh louding ahi.