Read Thado Chin Danbu 23 Bible Online

Danbu 23 - Thado Chin bible

Danbu 23

¹Mi atilchang keh, ahiloule ajang ki-at tan chu Pakai houkhom na-a lutlou ding ahi.

²Pakai houkhom ho lah-a jaocha kiti lutlou ding; ama khangsom changei jenga jong Pakai houkhom holah-a lutlou ding ahi.

³ Ammon mi ahiloule Moab mi chu Pakai houkhom na-a lutlou ding; khangsom geija jong Pakai houkhom na-a a-imatih channa lutloudiu ahi.

⁴ Ajehchu Egypt gama kona nahung doh-un lamdunga chun changlhah le twisih jengchan jong nana lamdot pouvin; chule Mesopotamia gam, Pethor kho-a Beor chapa Balaam chu nangma douna-a nagaosap dinga athalah jeh-u ahi.

⁵ Hijeng jongle Pakai na Pathen'in Balaam thu angaipon; ahinla Pakai na Pathen'in nalungset jeh-in, Pakai na Pathen'in gaosapna chu nangma dingin phattheiboh na-in aheidohtai.

⁶Nahinlaisea a-itih-a amaho dinga chamna le aphattheina dingu nahol louhel ding ahi.

⁷Nangman Edom michu nathet louding ahi; ajehchu ama nasopipa ahi. Nangman Egypt michu nathet louding ahi; ajehchu agamsung uva kholjin mi nanahi ahi.

⁸Amaho chate chu akhang thum channa teng Pakai houkhom ho lah-a lutdiu ahi.

⁹Namelmate doudinga janel akon tengle, thil gilou tin chenga konin kitimin.

¹⁰Nalah uva mikhattou janlaija thenlounan aphah jeh-a aboh-a aumle, amachu janna gebuh-a kona potdoh-a, gebuh sunga hunglut louding ahi.

¹¹Amavang hitiding ahi, nilhah lam ahunghi tengle twija kisila; nisa alhum tengle gebuh sunga hunglut kitding ahi.

¹²Nangin gebuh pamlama jong eh thahna munkhat nanei ding, chua chu nacheji ding ahi.

¹³Chule namanchah lah-a chu lei lona khat naneiding; chule hitiding ahi, nangma pamlama naposo tengle hichea chu lei nalaija, nakiheija nanga kona hungpotdoh chu navuh khum ding ahi.

¹⁴Ajehchu Pakai na Pathen chu nahuhdoh ding le namelmate pedoh dinga nagebuh lah-a vahle jia ahi; hijeh-a chu nachunga aboh ima amu louva, nanga kona akiheimang louna dinga, nagebuh chu atheng hiding ahi.

¹⁵Soh apu-a kona kiteldoh nahenga hunga chu apu henga napehdoh kit louding ahi.

¹⁶Nakotpi hou sunga akilhen ding adeinapen na mun'a chu nalah uva nangma toh chengding ahin; ama nasuh genthei louhel ding ahi.

¹⁷ Israel chanute lah-a noti, ahiloule Israel chapate lah-a Sodom mi [1] umthei louhel ding ahi.

¹⁸Noti man le uicha man chu Pakai na Pathen in'a kitepna khattouva dinga nahin poh louding ahi. Ajehchu hiteni chu Pakai na Pathen dinga thet umtah ahi.

¹⁹ Nasopi henga apung dinga thilpa napeh louding; sum pung ahin, neh le chah-a apung ahin, chule ipi hijongle apung dinga kipe thil himhim napeh louding ahi.

²⁰Namdang henga vang apung dingin thil napeh thei ahi; amavang nasopi henga apung dinga thil apa-a napeh louding ahi. Hitia chu nagoulo ding gama nakhut lhahna pou pouva Pakai na Pathen'in phatthei naboh theina ding ahi.

²¹ Nangman Pakai na Pathen henga kitepna-a nakitep teng, pe dinga nangongkai louding ahi; ajehchu Pakai na Pathen'in thonlouva nahenga angeh ding ahin; hichu nadinga chonset hiding ahi.

²²Ahinla kitepna lama nakikangse-a ahile, hichu nanga dinga chonset hilouding ahi.

²³Nakama nakihahsel sa lungcham thilto ngei chu, Pakai na Pathen henga nakitep dungjuija, nakama kona potdoh sachu nanitna nabol ding ahi.

²⁴Naheng nakom lengpi leija nahung tengle, lengpiga chu nagot channa navasetna nanehthei ahin; amavang nabella nakoi louding ahi.

²⁵Naheng nakom changkung ding lah-a nahung tengle, changvui chu nakhutna nakisi thei ahin; amavang naheng nakom chang dinglai chu koite-a na-at theilou ding ahi.