Read Thado Chin Danbu 24 Bible Online

Danbu 24 - Thado Chin bible

Danbu 24

¹ Pasal khatnin ji akipuija akichenpia, amanu chunga thenlouna amujeh-a amitmua lunglhaina achan joulou tah-a ahile; amapan kidana lekha asutna, amanu khutna apeh-a, a-in'a kona asoldoh ding ahi.

²Chule amanu a-in'a kona apotdoh teng, che-a pasal chomkhat ji hithei ding ahi.

³Chule a-inneipu nunung joh chun ahotna, kidana lekha asutna, akhutna apeh-a, a-in'a kona asoldoh ham; ahiloule ajidinga amanu akipuija a-inneipu nunung chu athia ahile;

⁴Amanu ana soldoh-a a-inneipu masa chun, amanu kisuhboh nunga chu jidinga akipuikit thei lou ding ahi; ajehchu hichu Pakai anga dinga thet umtah ahi. Chule Pakai na Pathen'in lodinga napeh gamsunga chonset nalutsah louding ahi.

⁵Pasal khatnin ji anei tille galsatna konlouding, natoh khatpou pouva tong dinga jong goi hilouding ahi. Amavang in'a ongthol tah-a kumkhat uma, ajinu alunglhaisah ding ahi.

⁶Koimachan sumhei song anoinung ahiloule achungnung thil mana kitungchu alah louhel ding ahi; ajehchu aman mihem hinkho chu thil mana alah ahi.

⁷ Mi khattouvin Israel chate asopiho aguh-a, akiveina anei ham, ahiloule ajoh ham akimudoh-a ahile; chuche gucha chu thiding ahin; chule thilse chu nalah uva kona nasuhmang ding ahi.

⁸ Phah hise thudolla Levi thempuho jousen nahil dingu dungjuija pontho tah-a nitna dingin chingtheijun; keiman amaho kathupeh banga nangman boldinga nanit ding ahi.

⁹ Egypt gama kona nanahung doh jou uva, lampi-a Pakai na Pathen'un Miriam abolna chu geldoh-un.

¹⁰ Nasopi thil khattou apa-a napeh tengle, athil tun ladinga a-in sunga nalut louding ahi.

¹¹Nangma inpoa nadinding, apa-a napeh mipa chun athiltun chu nahenga ahinchoidoh ding ahi.

¹²Amapa chu mivaicha ahile, athiltun chu najan gepi louding ahi.

¹³Chutia chu apon noija nomtah-a alupma, phatthei naboh theina dinga, nisa alhum tengle athiltun chu iti nama jongle ama napehkit ding ahi. Hichu Pakai na Pathen angsunga nachon phatna hiding ahi.

¹⁴ Nangman soh kithalah avaicha le alhasam chu nasopi hihen lang, ahiloule nagam sunga nakotpi sunga um namaljin ho hijeng jongle, nasuh genthei louding ahi.

¹⁵Atoh ni-a chu alo napehding, nisan alhumkhum louding ahi; ajehchu genthei ahin, hichea chu alung angah ahi; achuti loule nangma dounan Pakai henga peng tale, hichu nang dinga chonset hiding ahi.

¹⁶ Chate jala pate kithat louding, pate jala chate kithat louding ahi. Amitakip chu ama ama chonset jeh-a kithat ding ahi.

¹⁷ Nangman kholjin mi le paneiloute thu dihlouva natan louding, meithai ponsil jong thiltun mana nalah louhel ding ahi.

¹⁸Ahinla nangma Egypt gama sohchanga nana um ahin, Pakai na Pathen'in chua kona nalhatdoh ahi chu nageldoh ding ahi. Hijeh-a chu hichehi naboldinga kathupeh nahi.

¹⁹ Nangman nalouva chang na-atna, loulaija changphal nahaimil tengle, gala dinga nachekit louding ahi: hichu kholjin miho, paneilou ho, meithai ho-a ding ahi. Chutile Pakai na Pathen'in nakhut natoh jouse phatthei abohding ahi.

²⁰Nangman na Olive thing navoh tengle, abahho chu naveiboh louding ahi: hichu kholjin mite, paneiloute chule meithai ho ding ahi.

²¹Nangman na lengpi leija aga nalokhom teng, akhai nahol louding ahi: hichu gamdang mite, paneiloute chule meithai ho ding ahi.

²²Chule nangma Egypt gama sohchang nana hichu nageldoh ding ahi. Hijeh-a chu hiche boldinga hi kathupeh nahi.