Read Thado Chin Danbu 25 Bible Online

Danbu 25 - Thado Chin bible

Danbu 25

¹Pasal ho kahlah-a kinahna auma, thutan ho henga athu-u tansah dinga ahung tengule; amahon michonpha ho chu them achanuva, migilou chu themmo achan dingu ahi.

²Chule hitiding ahi, migilou chu vohdinga lom ahile, thutanpa chun alupsah-a, ama angsung laitah-a ijatvei ham athemona dungjuija vohding ahi.

³ Aman somlivei avohding; avala avoh thei louding ahi; avalin vohen, hicheng kalval chun tamtah vei votaleh, nasopipa chu namit mu-a kijumso behseh ding ahi.

⁴ Bongchal chang chilpet amuh nakan louding ahi.

⁵ Sopiho achenkhomuva, alah uva khat athia, cha aneilouva ahile, athipa jinu chu pama midangtoh kichenglou ding ahi. A-inneipu sopipan avetna, akichenpi ding, amanu chunga chu asopipa tohding kin chu atohding ahi.

⁶Chule hitiding ahi, amanun cha ahin masah pen chun Israelte lah-a amin manlouna dinga asopi thisapa munchu aloding ahi.

⁷ Chule mipa chun asopipa jichu akichenpi nomloule, asopipa jinu chu kotpi phunga upaho henga chea, ka-inneipu asopipa Israelte lah-a asopipa min tundoh ding anomhih-in, ka-inneipu sopipa kin abol nompoi agati ding ahi.

⁸Chutengle khopi upahon amapa akou uva, akihoulimpi diu, chule ama ada teiteija, kakichenpi nompoi ati-a ahile,

⁹Asopipa jinu chu upaho angsunga amapa henga hungding, amapa kenga kona kengkoh chu asutna, amaija chil asetkhuma, Asopipa insung atungdoh nomloupa chu hitia hi bolding ahi, tia adonbutna aseiding ahi.

¹⁰Chule amapa minchu Israel lah-a, Akengkoh kisutpehpa insungmi kisah ding ahi.

¹¹Pasal ho kahlah-a kina auma, khatjopa jinu chun a-inneipu chu avopa khutna kona huhdoh dinga ahung naija, amanun akhut alhandoh-a, amapa chu ajanga amatna ahile,

¹²Amanu khut chu natanboh peh-a, amanu chu nakhoto louhel ding ahi.

¹³ Nadipma khaikot jatni, agihle ajang naneilou ding ahi.

¹⁴Na-insung jong thil tena jatni, alen le aneo naneilou ding ahi.

¹⁵Ahinla Pakai na Pathen'in napehna gamsunga nahinkho asotna dinga agih tena le asao tena chamkimle dihtah naneiding ahi.

¹⁶Ajehchu chutobanga bol ho jouse le chonphat louna thil boljouse chu Pakai na Pathen dinga thet umtah ahi.

¹⁷ Egypt'a kona nahungdoh laijuva lamdunga Amalek ten nabolnao,

¹⁸Pathen jong ginglouva, nalhahsam le nachol laitah-a iti nakimaito pia, nanunga hung achatmo jouse, anu nungpen geija iti atha gam ham chu geldoh-in.

¹⁹Hijeh-a chu hitiding ahi, Pakai na Pathen'in gouloa nanei dinga napehna gama chu, Pakai na Pathen'in nakimvela namelmate jouse-a kona nacholdosah tengle, vannoi'a kona Amalek kihetna chu nanoimang ding ahi. Hichehi nasuhmil louding ahi.