Read Thado Chin Danbu 26 Bible Online

Danbu 26 - Thado Chin bible

Danbu 26

¹Chule hitiding ahi, Pakai na Pathen'in goulo dinga napehna gam chu nahung lhuna, nalo-a, nachenlut tengle,

² Pakai na Pathen'in napehna gama kona leiset ga jouse lah-a kona amasapen chu pocha sunga nakoija, Pakai na Pathen'in amin umsahna dinga adeilhen mun'a chu nahinchoi ding ahi.

³Chule chuche nikho-a thempu hidingpa henga chu nache-a, ajah-a, Eipeh dinguva ipu ipateu henga Pakaiyin anahahsel leimuna chun kahung lhuntai tia tunia hi Pakai na Pathen henga kaphondoh ahi, tia nagasei ding ahi.

⁴Chuteng thempu chun nakhutna kona pocha chu alah-a, Pakai na Pathen maicham masang tah-a chu aluiding ahi.

⁵Chule Pakai na Pathen anga chu thu naseija, hitia hi nasei ding ahi, Mangthah dinga gotsa Syria mipa chu kapa ahin, Egypt ma anachesuh-in, milhomcha toh anapem lutnin, chuin chua chun nam lentah, thaneitah, chuleh tamtah ahung hidoh-in;

⁶Chuin Egypt miten eina bolseuvin, eibol gimun, sohna hahsatah kachunga akoijun;

⁷Chuin Pakai kapu kapateu Pathen henga chun kakapmun ahile, Pakaiyin kakounao aw ajan, kathohnatna houle kathoh gimnao, eikisuh genthei naochu aven;

⁸Chuin Pakaiyin Egypt'a konin khut thahat tahle ban lhang doh-in, tijat nasatah hole melchihna ho, chule thil kidangho pumin eihin puidoh taovin;

⁹Hiche mun'a hin eina puilutnun, hiche gam khoijule bongnoi lonna gam ngeihi eipe taovin ahi.

¹⁰Chule tun, vetan, vo Pakai, nangman neipeh leiset ga masapen chu kahinchoi tai, nati ding ahi. Chule hichu nangin Pakai na Pathen masanga natuna, Pakai na Pathen chu nahou ding ahi.

¹¹Chule Pakai na Pathen'in nangma le na-insungmi napeh thilpha takip chunga chu, nangma le nalah uva um Levi te, chule kholjin miho nakipa cheh dingu ahi.

¹² Hopsom peh kum, nalhosoh hopsom jouse napeh jou kum thumna, Levi ho, namdang miho paneilouho, meithaiho chun nakotpi hongsunga aneh uva, avatheina diuva napeh joutengle,

¹³Chuiteng nangman Pakai na Pathen henga, Ka-in'a konin thil thengho kahinpodoh-in, chujongle Levi ho, kholjin miho, paneilou ho, meithai ho jong nangman neipeh thupeh dungjuijin kanapen, nathupeh ho jouse kasukhel pon, sujong kasumil pon:

¹⁴Hia konchun kalunghem petnin kana nepon, hia konchun thil aboh tapouva mandingin jong kana lamangpon, chule hia konchun mithi ho dingin jong kana pepoi: amavang Pakai ka Pathen aw joh chu lunglutnin kana ngaijin, chule nangman neina thupeh jouse dungjuijin kaboltan ahi.

¹⁵Nachenna theng, van'a konin hin vesuh-in lang, nami Israelte le kapu kapateu henga khoiju le bongnoi lonna gam pehdia nanahahsella neina peh-u gamhi phatthei hinboh-in, natiding ahi.

¹⁶Tunikho-a hi Pakai na Pathen'in hiche chon dan kisunho le thutan ho nabol dinga nathupeh ahi. Hijeh-a chu nangin hicheho chu nalung pumpile nahinna pumpi-a nanitna, najui ding ahi.

¹⁷Tunia hi nangin Pakai chu na Pathen hidinga, alampiho-a chedinga, adan kisunho, athupeh hole, athutan naho nitna dingle, athu ngaidinga naphondoh ahitai.

¹⁸ Chule tunikho-a hi Pakaiyin nana thutepsa banga ama mite chombeh hidingle, athupeh jouse nitding,

¹⁹Chule vahchoina, minthana le, jabolna-a asemsa nam jouse chungvuma choi-at dingle, aman aseisa banga Pakai na Pathen henga vaipi theng khat hidinga naphondoh ahitai.