Read Thado Chin Danbu 27 Bible Online

Danbu 27 - Thado Chin bible

Danbu 27

¹Chuin Mosi'n Israel upaho toh mipi chu thu apen, Tunia nangho kapeh thupeh jouse hi nit uvin.

² Chule Pakai na Pathen'in napeh gam Jordan gal nakai nitengleh hitiding ahi, song lentah ho naphu-a, hiho chu songlou nanu ding ahi.

³Chule napu napateu Pakai Pathen'in nathutep jouse banga, Pakai na Pathen'in napeh-u bongnoi le khoiju lonna gamchu nalut theina dinga, nagalkai tengle achung ho-a chu hiche danthu thucheng jouse hi nasut dingu ahi.

⁴Hijeh-a chu Jordan nagalkai joutengle hitiding ahi, tunia kathupeh hiche song hohi Ebal molsanga naphu-a, songlouva naloijol ding ahi.

⁵ Chule chua chu Pakai na Pathen henga maicham, song maicham khat nasem ding; achunga chu thih manchah imacha nalap louhel ding ahi.

⁶Pakai na Pathen maicham chu khetlou songho-a kona nasem ding ahi. Hiche chunga chu Pakai na Pathen henga govam thilto nato ding;

⁷Chule chamna thilto nato-a, chua chu naneh ding, chule Pakai na Pathen anga nakipa ding ahi.

⁸Chule songho chunga chu hiche danthu jouse hi kichehtah-a nasut ding ahi, ati.

⁹Chuin Mosi le Levi thempuhon Israel jouse lah-a aseijun, Vo Israel, chingthei jinlang ngaiphan; tunia hi Pakai na Pathen mite nahung hi ahitai.

¹⁰Hijeh-a chu Pakai na Pathen aw nangai ding, tunia nangma kathupeh thupeh ho le adan kisunho hi nabolding ahi, atiuve.

¹¹Chuin hiche nikho mama chun Mosi in mipi thu apen, hitin aseije,

¹² Jordan nagalkai tengule mipi ho phatthei bohdinga hiteho Simeon, Levi, Judah, Issachar, Joseph, chule Benjamin hi Gerizim molsang chunga dingden dingu ahi.

¹³Chule hiteho Reuben, Gad, Asher, Zebulun, Dan, chule Naphtali hi agaosap dinga Ebel molsang chunga ding dingu ahi.

¹⁴Chule Levi hon thu aseijuva, Israel mite jouse henga aw sangtah-a asapmuva,

¹⁵ Khutthemho khutna kisem, Pakai dinga thet umtah alim semthu ahiloule lhahtho ham anakoigu aumle gaosap changin umhen, atidiu; chule mipi jousen, Amen, atiuva adonbut dingu ahi.

¹⁶ Anu ahiloule apa jabol louva chu gaosap changhen, atidiu; chule mipi ho jousen Amen, atidiu ahi.

¹⁷ Aheng akom gamgi chondohpa chu sapset changhen, atidiu; chule mipi ho jousen Amen, atidiu ahi.

¹⁸ Mitcho lampia kona vaveisah-a chu gaosap changhen, atidiu; chule mipi ho jousen Amen, atidiu ahi.

¹⁹ Kholjin mi, paneilou, chule meithai thutana akaleh-a heidoh chanchu gaosap changhen, atidiu; chule mipi ho jousen Amen, atidiu ahi.

²⁰ Apa ji luppi-a chu gaosap changhen, ajehchu aman apa del ahopeh ahi, atidiu; chule mipi ho jousen Amen, atidiu ahi.

²¹ Gancha poupou jonpia chu gaosap changhen, atidiu; chule mipi ho jousen Amen, atidiu ahi.

²² Asopinu, apa chanu, ahiloule anu chanu luppi-a chu gaosap changhen, atidiu; chule mipi ho jousen Amen, atidiu ahi.

²³ A-inneipi nu luppi-a chu gaosap changhen, atidiu; chule mipi ho jousen Amen, atidiu ahi.

²⁴Aheng akom guhthima philla chu gaosap changhen, atidiu; chule mipi ho jousen Amen, atidiu ahi.

²⁵Monabei mi thana dinga thilpeh la-a chu gaosap changhen, atidiu; chule mipi ho jousen Amen, atidiu ahi.

²⁶ Hiche danthu jouse boldinga sudet loupa chu gaosap changhen atidiu; chule mipi ho jousen Amen, atidiu ahi.