Read Thado Chin Danbu 28 Bible Online

Danbu 28 - Thado Chin bible

Danbu 28

¹ Chule hung hitiding ahi, tunia nangma kathupeh jouse nitna dingle juina dinga Pakai na Pathen aw chu gen ngaitah-a nangaija ahile, Pakai na Pathen'in leiset chunga nam jouse vuma nachoisang ding ahi.

²Pakai na Pathen aw nangaija ahile hiche phattheina jouse hi nachunga hung chua, nachuphel ding ahi.

³Nangma khopi sunga phatthei nachan ding; nangma loujaova phatthei nachan ding ahi.

⁴Nachilhah, naleiset ga, nagancha hon, nabongpi hon, chule nakelngoi hon ho phatthei changdiu ahi.

⁵Na palbom le nathil kholna jong phatthei changding ahi.

⁶Nahung vailhun teng phatthei nachan ding, navaikon doh teng jong le phatthei nachan ding ahi.

⁷Nangma doudinga hungkon namelmate chu Pakaiyin namai koh-a athagam ding: nangma dou dinga lampi khatna hungdoh uva, namai koh-a lampi sagi-a jamcheh diu ahi.

⁸Pakai chun nathil kholna in le nakhut natoh jouse chunga phattheina chu thu apeh ding; Pakai na Pathen'in napeh gamsunga chu aman phatthei nabohding ahi.

⁹Nangman Pakai na Pathen thupeh ho nanitna, alampiho-a nache-a ahile, aman nahahsel na banga Pakaiyin ama ding tuma namtheng khatna natundoh ding ahi.

¹⁰Chule leiset mite jousen Pakai mina nakikou chu amuva, nangma nakichat dingu ahi.

¹¹Chule Pakaiyin napu napate henga nangma pehdinga anahahselna gama chu, Pakaiyin thil le lo, nachilhah, nagancha, naleiset ga-a nanen jengjung sah ding ahi.

¹²Pakaiyin nangma dinga nagamsunga aphatcha gotwi peding le, nakhutna nanatoh jouse phattheiboh dinga, agou kholna phatah vanchu nahonpeh ding; nangman nam tamtah henga thil apan homin natin, nangin thil apa-a nalah louding ahi.

¹³Tunia kathupeh Pakai na Pathen thupeh hohi nitding le juidinga nangaija ahile, Pakaiyin amei hilouva alua nakoija, chule anoinung hilouva achunga bou nakoiding ahi.

¹⁴Chule tunia kathupeh thuho-a kona pathen dangho jenna dinga anungu juina-a jetlam ahiloule veilama nakihei louhel ding ahi.

¹⁵Amavang hung hitiding ahi, tunia kathupeh athupeh jouse le, achonna dan kisunho jouse juidinga Pakai na Pathen aw chu nangailouva ahile; hiche gaosapna jouse hi nachunga hungchua, nachup helding ahi.

¹⁶Khopi sunga gaosapna nachan ding, chule loujaova jong gaosapna nachan ding ahi.

¹⁷Na palbom le nathil kholna jong gaosap changding ahi.

¹⁸Nachilhah, naleiset ga, nabongpi hon, nakelngoi honho jong gaosap changding ahi.

¹⁹Nahung vailhun tengle sapset nachana, navai kondohteng jongle sapset nachan ding ahi.

²⁰Nathilbol gitlouna-a kona neidalhah jeh-a nangma nakisuh manga namanthah hel loi kahse-a Pakaiyin na natohna chunga, nakhut lhahna jouse-a, gaosapna, suhnohna, housetna jouse ahinchuhsah ding ahi.

²¹Galo dinga nachena gama kona aman nasuhmang hel kahse-a, Pakaiyin nachunga natset alenden sah ding ahi.

²²Pakaiyin hihet, khosih, tipom chetchut, tisat val, chemjam, huise, chule motna-a najepma, namanthah hel kahse-a hicheng hin najuiding ahi.

²³Naluvuma um van chu sum-eng soh-a, nanoija leiset chu thih hungsoh ding ahi.

²⁴Pakaiyin nagama gotwi chu leivui le vutvai aso-a, namanthah hel kahse-a nachunga van'a kona hung julha ding ahi.

²⁵Namelmate masanga Pakaiyin gal nalelsah ding; amaho sat dinga lampi khatna nakon doh-a, amasanguva lampi sagi-a najam ding ahi. Chule leiset lenggam jouse-a nakichonle ding ahi.

²⁶Chule nalong chu chungleng vacha jouse le leiset gamsa dinga anneh hiding, chule koimachan anomang loudiu ahi.

²⁷Pakaiyin Egypt gam uilutna, thilona, tinakhih neija, tithah na-a najep natna, chuho-a kona chu nadamdoh louhel ding ahi.

²⁸Pakaiyin ngolna-a, mitchot na-a, lungkidanna-a najepding ahi.

²⁹Muthim noija mitcho akimai banga sunchang noija nakimai ding, nalampi-a nalolhin louding: a-itih-a bolgenthei le chom mangbou nahi-a, koimachan nahuhhing louding ahi.

³⁰Nangin jihol neijin natin, midangin amanu aluppi ding: nangin in kisah-in natin, nangla chua nachen louding: nangin lengpilei kibolin natin, chua kona lengpiga nalo louding ahi.

³¹Namitmu na-angsung laitah-a nabongchal kithat ding, hichu nanehlou ding: namaikoh tah-a kona nasangan pumhatna kikai mang ding, nakilepeh louding: nakelngoi chu namelmate kipe ding, ahuhdoh ding koimacha naneilou ding ahi.

³²Nachapate le nachanute midangho kipe ding, namitna navetna, nilhumkeija amaho lhangai na-a natha beiding: nakhutna hatna himhim umlou ding ahi.

³³Naleiset ga le natoh gim ga jouse chu nahet khahlou nam khatnin anehchai ding; nangma suhgenthei le noigep vou nahiding ahi.

³⁴Chutia chu namitnin avet nathilmu ho jala chu nangolding ahi.

³⁵Pakaiyin suhdam theilou uilut khohtah-a nakhup teni le kengteni, nakengto-a pat nalujang gei anatsah ding ahi.

³⁶Pakaiyin nangma le nachunga atunding nalengpa chu nangma le napu napateu jong anahet khahlou beh namkhat henga napuilut dingu ahin; chuachu thih le song pathen dangho bou nagajen dingu ahi.

³⁷Chule Pakaiyin napuina ding namtin lah-a chu nangma datmo umtah, paochamtuh, chule seichah bep nahungso ding ahi.

³⁸Nangman muchi tamtah loujaova napohlut ding, amavang themcha bou nalokhum ding ahi; ajehchu khaokhopin anehchai ding ahi.

³⁹Nangman lengpilei nabola, nalho ngim ding, amavang alengpitwi chu nadonlou ding, chule lengpiga jong nalo khom louding ahi; ajehchu lungin anehdiu ahi.

⁴⁰Nangman nagamsung jouse-a Olive thing nanei ding, amavang athao chu nakinu louding ahi; ajehchu na Olive chu aga pulgam ding ahi.

⁴¹Nangman chapate le chanute hingin tin, ahinla nanopsahna hilouding ahi; ajehchu gal hinga chegamdiu ahi.

⁴²Nagamsunga thingphung jousele aga jouse chu khaokhon anehgamhel ding ahi.

⁴³Nalah-a um namdang mi chu nang vuma hatah-a hung kichoisang ding; nangma hatah-a nanemsuh ding ahi.

⁴⁴Aman nangma apa-a napeh ding, nangman vang ama apa-a napeh louding: ama aluchangin pangintin, nangma ameija nahung panding ahi.

⁴⁵Chukal vala jong Aman nathupeh athupeh ho le adan kisunho nitna dinga Pakai na Pathen aw nangailou jeh-a, namanthah hel kahse-a hiche gaosap nahohi nachunga hungchua, nanung ajuija, nachup mangding ahi.

⁴⁶Chule hicheho chu nangma le nachilhahte chunga a-itih-a dinga melchihna le thil kidanga umding ahi.

⁴⁷Thiljouse anen jeh-a Pakai na Pathen chu lungsung thanom tah le kipah tah-a najenlou jeh-a;

⁴⁸Hijeh-a chu Pakaiyin nangma doudinga ahinsol ding namelmate chu gilkel le dangchah-a, sagohkeu le ijakai lhasama najending: aman nangma nasuhmang hel kahse-a nangonga thih namkoljon napohsah ding ahi.

⁴⁹Pakaiyin nangma doudinga gamlatah-a kon,leiset kolmanga kon namkhat, mulaopi banga gangjet; apaovu jong nahetlouhel nam khat ahinpui ding ahi.

⁵⁰Kichat umtah melpu, tehse ja-ngaina neilouhel, chapang jong lungset chomlou nam;

⁵¹Chule amachun namanhel kahse-a nagancha hon le nagamga aneh ding: aman nasuhmang hel kahse-a chang, lengpithei, thao, nabongnou, ahiloule nakelngoi hon ho-a kona apungdoh hojong nakhenpeh louhel ding ahi.

⁵²Natahsan nangapna nagamsung pumpi-a kulpi kikai khum sangtah ho chu achimlhahsoh kahse-a, aman nakotpi jouse-a na-umkul ding: Pakai na Pathen'in napeh gamsung pumpi nakul kotpiho jouse na-umkul khumdiu ahi.

⁵³Namelmate bol hesohna-a naki-um kul le nakineh chintona-a chu, Pakai na Pathen'in napeh nangmatah chilhah, nachapate le nachanute sa chu nanehding:

⁵⁴Chutia chu nalah-a um lungnem le hongphal pa jongchun asopipa le a-angkoi ajinu, chule achate lah-a, ahinghoi ding amohpen jeng jong chu amuset ding:

⁵⁵Chutia chu amaho khatcha jong anehding achate sa chu apehlou ding ahi: ajehchu nakotpi phung jouse-a namelma ten umkulna le nehchep na-a nasuhgenthei ding jeh-a imacha akikhenlou ahitai.

⁵⁶Nalah uva um numei lungnemle lungneng pen, alung nemle alungnet behseh jeh-a akengkho taljum jong tolla chuhsah nomlou numei jong chun a-angkoi ajipa le achapa chule achanu chu amuset ding,

⁵⁷ Chule akengteni kah-a hung pengdoh-a chasen le ahin hinding achate jong, amuset ding ahi: ajehchu umkulna le gotchep na-a namelma ten nakotpi phung jouseuva nasuh genthei jeh uva, ijakai lhahsap jeh-a amanun amaho chu guhthima anehgam ding ahi.

⁵⁸PAKAI NA PATHEN kiti min loupitah le tijat umtah hi nagin theina dinga hiche lekhabu sunga kisun danthuho jouse chingthei tah-a najui louva ahile;

⁵⁹Pakaiyin nangma hise le nachilhahte hise chu hise kidangtah, hise nasatah, sottah umding hise, natna khohtahden, sottah umjom jingding asosah ding ahi.

⁶⁰Chukalvala jong nangman nagin Egypt gama hise jouse chu, nachung uva alensah ding; hicheho chun nakolchah ding ahi.

⁶¹Chule hiche danthu lekhabu sunga kisun lou natna tincheng le hise tincheng ho jong chu Pakaiyin namanthah hel kahse-a nachunga ahinlhut ding ahi.

⁶²Chule natam jeh-un van'a ahsi jat ana hijongleu chun, lhomcha bou kikhen ding nahiuve; ajehchu Pakai na Pathen aw nangaipon ahi.

⁶³Chule hung hitiding ahi, naphatna bolding le nangma suhpung ding chu Pakai kipana ahi banga; chutia chu nangma suhmang dingle manlou soding chu Pakai kipah hiding ahitai; chule galo dinga nachena gama kona chu nakibotdoh dingu ahi.

⁶⁴Chule Pakaiyin mijouse lah, leiset kolmong langkhatna pat langkhat geija nathe cheh uva; chua chu nangma nahi-a napu napate ahiuva jong anahet ngailou thing le song pathen ngeichu najending ahi.

⁶⁵Chule hiche namho lah-a chu choldona namu louding, nakengto jengin jong olna amulou ding: Pakaiyin lungsung linglaona, mit setna, chule lungkhamna napeh johding ahi.

⁶⁶Chule namalam hinkho chu lung opkaina hiding, sunle jana nakichat na, nahinkho dinga dettah-a ngamna nanei louding ahi.

⁶⁷Kichatna nalunga nagel ding jeh le namitna namu ding thilmujeh-a, jingkah teng, Pathen'in nilhah hisah taveleh! nati-a, nilhah teng, Pathen'in jingkah hisah taveleh! natiding ahi.

⁶⁸Chule hichehi namukit louding ahitai tia kaseina lampia chu Pakaiyin Egypt gama kong inneija nale puilut kitding: chua chu namelma te henga sohpa le sohnu-a vuldinga nakijoh diu ahin, koimachan nakichoh loudiu ahi.