Read Thado Chin Danbu 29 Bible Online

Danbu 29 - Thado Chin bible

Danbu 29

¹Hichehohi Horeb'a amahotoh kitepna asem tilouva, Moab gama Israel chate toh neidinga Pakaiyin Mosi athupeh kitepna thuchengho chu ahi.

²Chuin Mosi'n Israelte jouse akouvin, ajah uva, Nanghon Egypt gama Pharaoh chung, asohte jouse chung, chule agampumpi chunga Pakai thilbol jouse chu namitmu tah uva namu taovin;

³Patepna nasatah ho, melchihna ho, chule thilkidang nasatah ho chu namit uva namutaovin:

⁴Ahijeng vangin Pakaiyin hetchetna lungthim, muchetna mit, chule jahchetna nakhang tunigeijin napehih laijuve.

⁵Chule keiman gamthipma kum somli kana lamkaijun: nachung uva naponsilu achulpon, nakenguva nakengkoh-u jong aluipon ahi.

⁶Keima hi Pakai na Pathen'u kahi nahet theina diuvin, nanghon changlhah nane pouvin, lengpitwi le khamna thei jong nanadon pouve.

⁷ Chuin hiche mun'a nahunglhun phatnun, Heshbon lengpa Shihon le Bashan lengpa Og chu eiho satdin ahung kondoh lhonin, eihon ina joutaove.

⁸ Chule agamhou ilaovin, Reuben mite, Gad mite, chule Manasseh phung kehkhat goulodin ipetaove.

⁹Hijeh chun nabol jouseuva nakhantou theina diuvin, hiche kitepna thuho hi nitnun lang juijun.

¹⁰Tunin nabonchaovin, naphung lamkai hou, na-upahou, napipu hou, chule Israel mite jouse toh Pakai na Pathen'u anga nading sohkeijun,

¹¹Nacha senteu, na-inneipi teu, napon in sunguva um nakhopem hou, na thing tuh houva pat twikhai ho geijin:

¹²Tunia Pakai na Pathen'un nangho toh asem, Pakai na Pathen to akitepna le akihahselna sunga nalut theina dingun;

¹³Aman nahenga aseibanga le, napu napateu Abraham, Isaac, Jacob henga anakihahsel banga, Tunikho-a hi aman nangho ama mite hidinga natundoh theina dingu le, ama nangho Pathen ahitheina ding ahi.

¹⁴Hiche kitepnale kihahselna hi nangma changseh toh kasem ahipon,

¹⁵Tunia Pakai i-Pathen'u anga ilah uva hikoma umpa, chule tunia hikoma ilah uva umloupa to jong ahi:

¹⁶(Ajehchu Egypt gama iti ina chen uva, chule ihin jotpao nampiho iti ihin palpao ham naheuvin,

¹⁷Chule alah uva um athet umtah hou, amilimhou, thing le song, dangka le sana hochu namuvin ahi.)

¹⁸ Ijemtia nalah uva pasal ham, numei ham, insungham, inkoham, phungham, Pakai i-Pathen'uva kona, hiche nam mite pathenho gajen dinga alunghei manga ummaithei ahin; achuti loule nalah uva thingkha le hampa kha jungnei hung umdoh getninte;

¹⁹Chule hung hiti ding ahi, hitobang michun hiche gaosapna thuho hi ajah tengle, Dangchah chu khamna-a akibelap bangin, kalung ngaito dandanin umjong leng chamna neinange, tin alungsunga ama le ama phatthei kiboh henlang hileh,

²⁰Pakaiyin amachu akhen louhel ding, ahinla Pakai lungsatna le athang thipna chu amapa chunga chu meikhu-a kitungdoh-a, hiche lekhabua kisun gaosapna ho jousehi achunga chuding, chule Pakaiyin aminchu vannoi'a kona hi anoimang ding ahi.

²¹Chule Pakaiyin amachu hiche dan lekhabu sunga kisun kitepna chunga gaosapna ho jouse dungjuija, Israel phung jouse-a kona hamsetna chang dinga akhendoh ding:

²²Chutia chu nanunga hung pengdoh ding nachate khang hunglhung dingho le, gamlatah-a kona hung ding namdang mi hon Pakaiyin achunga achuhsah chuche gamna hise le natna ho chu amutengule;

²³ Chuche gam pumpi chu kath, chi, meikah, ima kitu lou, ima galou, asunga hampa jong kehlou, Pakaiyin alungsatna le alunghana asumangsa Sodom le Gomorrah, Admah le Zeboiim tobang ahi atidiu:

²⁴Chule namtinho jouse jengin jong, Ipibola Pakaiyin hiche gamhi ahitibol hintem? hiche lunghanna nasatah hi ipi tina ahidem? atidiu ahi.

²⁵Chutengle mihon, Egypt gama kona amaho ahinpuidoh laijuva amaho toh anasem, apu apateu Pakai Pathen kitepna chu adalhah jeh-u ahi;

²⁶Ajehchu Aman amaho henga apeh hilouho pathen dangho, ahetkhah louvu pathen ho henga acheuvin agajenun, ahou jeh uva;

²⁷Hiche lekhabu sunga kisun gaosapna jouse pohlut khum dinga Pakai lunghanna chu hiche gam chunga koujah-a ahitai;

²⁸Chule Pakaiyin amaho chu lungsatna, lunghanna, chule lungphatmona nasatah, tunikho banga hi, agamma kona ajung aja-a abodoh-a mi gamdanga aselut ahitai, atidiu ahi.

²⁹Thil kiselho chu Pakai i-Pathen uva ahin: ahin akiphongdoh saho chu hiche danthua thuho jouse hi ijuitheina diuva a-itih-a dinga eihole ichateuva ding ahi.