Read Thado Chin Danbu 3 Bible Online

Danbu 3 - Thado Chin bible

Danbu 3

¹Chujouvin ikiheijun, Bashan jotna lampia ichetouvun, chuin Bashan lengpa Og le amite jouse eihotoh Edrei mun'a kisatdin ahung konun ahi.

²Chuin Pakaiyin kahenga, Amachu kicha hih-in; ajehchu keiman amale amite jouse, chule agam nakhutna kapeh ding ahin; chule Heshbon'a cheng Amor lengpa Sihon nabol banga amachu nabolding ahi, ati.

³Chutichun Pakai i-Pathen'un Bashan lengpa Og le amite jouse jong ikhutnuva eipeuvin; mikhatcha jong hinghoi louvin ithat gamun ahi.

⁴Chule hichepet chun akhopiho jouse ilaovin, Bashan'a Og lenggam Argob gamkai jouse-a khopi somgup lah-a ilah louvu khatcha aumpon ahi.

⁵Hiche khopi jousehi kulbang sangtah tah-a kiget khum le, kotpi neicheh, chule kotgol ho-a kikam ngen ahin; hiche tilouvin kul kiget khumlou khopineo tamtah jong ahi.

⁶Chule Heshbon lengpa Sihon ibolnao bangin khopi tinna pasal hole numei ho chule chapangho isumang hel jengun ahi.

⁷Gancha jouse le khopiho-a thil kichomho vang eiho chantumdin ikilah-uve.

⁸Chule hichepet chun Amor mite lengni-a konin Jordan hilam panga galla um gam Arnon vapi'a pat Harmon molsang geijin ilaovin;

⁹(Harmon chu Sidon miten Sirion asah-un, Amor miten Shenir asah-un),

¹⁰Phaicham khopi jousele, Gilead gam jouse, chule Bashan gam jouse Salcah le Edrei geijin, Bashan'a Og lenggam sunga khopiho chu inalaovin ahi.

¹¹Ajehchu Bashan lengpa Og bou chu mihat milenho lah-a ahingdoh amoh hija ahi. Veovin, ajalkhun chu thih jalkhun ahin, Ammon chate kho Rabbath-a um hilou ham? mihem tong dungjuijin adung chu tongko ahin, avai tongli ahi.

¹²Chuche petna inalo-u hiche gamhi Arnon vapi panga um Aroer'a patna Gilead molsang kehkhat le, asunga khopi hochu Reuben mite le Gad mite kana petan ahi.

¹³Gilead gam adang sese le Og lenggam Bashan pumpi chu Manasseh phung kehkhat kanapen; Argob gamkai jouse le Bashan pumpi chu mihat le milenho gam anakiti.

¹⁴Manasseh chapa Jair'in Argob gam pumpi, Geshuri le Maachathi gamgi geijin alan, hichu ama min aputsah-in, tuni geijin Bashan Havoth-jair akiti.

¹⁵Chuin Gilead chu Machir kanapetai.

¹⁶Chuin Reuben mite le Gad mite henga Gilead'a pat Arnon vapi phaicham kehkhat, chule agamgi diuvin Jabbok vapi geijin kapen, hichu Ammon chate gamgi ahi.

¹⁷Phaicham jong, Jordan le apanga um gamho, Chinnereth'a pat Ashdoth-pisgah solam sanga um phaicham twipi, chituipi geijin kanapen ahi.

¹⁸ Hiche laichun nangma thu kanapen, Pakai na Pathen'un hiche gamhi nalodiuva anapeh ahi. Nasopi hou Israel chate masanga namihang hou jouse chu galvon vonpuma nagalkai diu ahi.

¹⁹Ahinla najiteu, nachasenhou, chule nagancha hou, (ajehchu gancha nahao lheh-uve ti kahen,) keiman kapeh-u nakhopi houva chu umden dingu,

²⁰Nangho banga Pakaiyin nasopiteu acholngah sah kahseu le Jordan galla Pakai na Pathen'un napeh-u gam alo kahseuva umdingu ahi. Chujou tengle amitakipmin keiman kapeh gamchu nahung lokit chehdiu ahi, kati.

²¹Chule hiche laichun Joshua thu kapen, Pakai na Pathen'un hiche lengteni abolna jouse chu namitnin namutan, chutobang ma-a chu Pakaiyin nalo dingu lenggam ho chu abolding ahi.

²²Pakai na Pathen'un nangho dinga gal nasatpeh ding jeh-un, nanghon amaho chu kicha hih-un kati.

²³ Chule hiche laichun Pakai henga ngehna kana neijin, hitin kati;

²⁴Vo Pakai Pathen, nangman nasoh hi nalet je le nakhut thahat je neimusah pantai; ajehchu leile van'a nathilbol bang le thahat bang bolthei Pathen koi umam?

²⁵Katao ahi, neigalkai sah inlang, Jordan galla gam phatah molsang hoitah le Lebanon chu neimusah-in, kanati.

²⁶Ahinla nangho jeh-in Pakaiyin eina lunghan khumin, eingaipeh nompoi: chule Pakaiyin kahenga, Phaset tante, hiche thuhi kahenga seikit tahih-in.

²⁷Pisgah molvum'a kaldoh inlang lhumlam, sahlam, lhanglam chule solama khodah-in lang, hichu namit-in ven; ajehchu nangma hiche Jordan hi nagalkai louding ahi.

²⁸Ahin Joshua ngansen lang, tilkhouvin, chule hatsah-in; ajehchu ama hiche miho masanga hi galkaija, nagamu ding gamchu amaho alosah ding ahi, ati.

²⁹Chuti chun Beth-peor maijon phaichama chun i-um taovin ahi.