Read Thado Chin Danbu 30 Bible Online

Danbu 30 - Thado Chin bible

Danbu 30

¹Chule hung hitiding ahi, namasanga kakoi hiche phattheina le gaosapnaho jouse hi nachunga ahung lhuna, Pakai na Pathen'in nadel lutna namho jouse lah-a kona chu nahin geldoh-a,

²Chule Pakai na Pathen henga nahung kile-a, nangma le nachaten nalung pumpiu le nahinna pumpiuva tunia nangma thu kapeh jouse dungjuija hi a-aw nangai uva ahile;

³Pakai na Pathen'in gal hinga nakikaina chu aleheija, nachunga lainatna aneija, chule hung kileheija Pakai na Pathen'in nathe chehna namho jouse lah-a kona nachopkhom kitding ahi.

⁴Na mi khattou chu van mong geija ana kinodoh-a ahijongle, chua kona Pakai na Pathen'in nalonkhoma, chua kona nahin puidoh ding ahi;

⁵Chule Pakai Pathen'in napu napateu vin alonao gamsunga chu nahin puilutna, nangman hichu naloding; Aman nabol phatna, napu napateu chungvuma napunsah ding ahi.

⁶Chule Pakai na Pathen'in nahin theina ding, nalungthim pumpile nahinna pumpi-a Pakai na Pathen nangailutna dinga, nalungsung le nachilhahte lungsung chep atan ding ahi.

⁷Chule Pakai na Pathen'in hiche gaosapna jousehi namelmate le nahotbol te, chule nabolsete chunga akoiding ahi.

⁸Chule nangma nahung kile-a Pakai aw chu nangaiding, tunia nangma kathupeh ama thupeh jouse hi nabolding ahi.

⁹Chule Pakai na Pathen'in nakhutna athilbol jouse, nachilhahte, nagancha ho, chule nagamga aphatna dinga hatah-a asuhpung ding ahi: ajehchu Pakai chu napu napateu chunga athanop banga, naphatna dinga nangma chunga thanom kitding ahi.

¹⁰Hiche dan lekhabu sunga kisun athupeh hole adan kisunho nitna dinga Pakai na Pathen thu nangaija; chule Pakai na Pathen henglama nalungthim pumpile nahinna pumpi-a nakihei ja ahile chuti ding ahi.

¹¹Ajehchu tunia nang kathupeh hiche thupeh hi nanga kona kisel ahipon, chule gamlapi-a umjong ahipoi.

¹² Ijah uva, ibol theina diuva, eiho dinga van'a koi gakal touva, eiho henga ahin pohlhah ding ham? natina diuva hichu van'a uma ahipoi.

¹³Ijah uva, ibol theina diuva, eiho dinga twikhanglen galla koi gachea, ihenguva ahinpoh galkai ding ham? natina diuva hichu twikhanglen galla um jong ahipoi.

¹⁴Ahinla thuchu nanit theina dinga, nakom naicha, nakam sungle nalungsung um ahibouve.

¹⁵Ven, tuni hin namasanga hinna le thilpha, thina le thilse kakoipeh-e.

¹⁶Pakai na Pathen chu nangailut nading, alampiho juina ding, athupeh hole achondan ho chule athutan ho nitna dinga tunia kathupeh hohi nanitna ahile nahina, napuntheina ding: chule lodinga nachenna gama chu Pakai na Pathen'in phatthei nabohding ahi.

¹⁷Amavang najahlouna dinga nalungthim akihei manga, puimanga naum joh-a, pathen dang nahouva, najena ahile,

¹⁸Namanthah teidiu ahi tia tunia hi kaphondoh ahi; galo dinga Jordan nagalkaina gama chu nahinsot louheldiu ahi.

¹⁹Namasanguva hinna le thina, phattheina le gaosapna kakoije ti nangho douna-a ahetoh dinga tunia hi van le lei kakou ahi; hijeh chun nangma le nachilhahte nahinthei dingu hinna kilhenun:

²⁰ Chutia chu Pakai na Pathen nangailutna, a-aw nangaija, chule ama nakolchah theinadin: ajehchu ama nahinna ahin, nahinkho sotna ahi: chutia chu Pakaiyin napu napa te Abraham, Isaac chule Jacob peh dinga ahahselna gama chu nachen theiding ahi.