Read Thado Chin Danbu 31 Bible Online

Danbu 31 - Thado Chin bible

Danbu 31

¹Chuin Mosi achen, Israel miho jouse henga chun hiche thuho hi aseije,

²Chuin ajah uva, Tuni hin keima kum jankhat le kum somni kalhingtan; kalut le kapot le joutapon ahi: chujongle Pakaiyin jong kajah-a, Nangma hiche Jordan hi nagalkai louding ahi, eiti.

³Pakai na Pathen'u chu namasanguva lamkaijin tin, aman hiche namhohi namasanguva kona asumang ding, chule nanghon amaho gamchu nalo dingu ahi. Chule Pakaiyin ana seibanga, Joshua'in nalamkai dingu ahi.

⁴Chule Pakaiyin amaho chu Amor miho lengteni Sihon le Og abol banga abolding, chule aman asuhmang gamho banga abolding ahi.

⁵Chule keiman nangho thu kapeh-u thupeh ho jouse dungjuija ahenguva nabol theina dinguva, Pakaiyin amaho chu namaikoh uva napehdoh dingu ahi.

⁶Hatnunlang hanguvin, kicha hih-un, amaho khu ging jong ging hih-un: ajehchu Pakai na Pathen'u, nangho nalhonpia chu ama ahi; Aman nalosam sah loudingu, dajong nadalhah louheldiu ahi, ati.

⁷Chuin Mosi'n Joshua akouvin, Israelte jouse mitmu-a chun ajah-a, hatninlang hangin; ajehchu nangma Pakaiyin apu apateu pehdinga anahahsel gama chu hiche mipite hitoh nalhona, nangman amahohi nalosah teiding ahi.

⁸ Chule namasanga chea amachu Pakai ahi, aman aumpi ding, aman nalosamsah louding, dajong nadalhah louding ahi.

⁹Chuin Mosi'n hiche danhi asunin, Pakai kitepna thingkhong poleji Levi chapate thempuho le, Israel upaho jouse henga apen ahi.

¹⁰ Chuin Mosi'n amaho thu apen, ajah uva, Kum sagi kichaiseh, kilhadohna kum le lhambuh kut laile,

¹¹Ama deilhen nading mun'a Israel chate jouse Pakai na Pathen anga kilah dinga ahung tengule, hiche danthu hi Israelte jouse masanga ajahdiuva nasimpoh ding ahi.

¹²Amahon ajah uva, ahetnuva, Pakai na Pathen'u chu aginuva, hiche danthu-a um thu jouse hi anitna dingun, mijouse, numei ahin, pasal ahin, chapang ahin, nakotpi sunga um gamdang mi ahin khomkhom soh keijin:

¹³Chule imacha heloulai nachateo chun lodinga nachenao Jordan gal gamsunga chu nachen laiseuva Pakai na Pathen ginje ahettheina diuva ajahdiu ahi.

¹⁴Chuin Pakaiyin Mosi jah-a, Ven, nathi nading nikho ahung naitai; mopohna kapehthei nadin Joshua chu kouvin lang houkhom na pon in sunga hung kilah lhonin ati. Chuin Mosi le Joshua ache lhonin, houkhom ho ponbuh sunga agakilah lhontai.

¹⁵Chuin Pakai chu houbuh sunga meibang khomin ahungkilah-in: meibang khompi chu houbuh kotchung tah-a chun adingden tai.

¹⁶Chuin Pakaiyin Mosi jah-a, Vetan, nangma napu napate toh nalupkhom ding ahitan; hiche mipihohi kipat uva, aga umnadingu mite lah-a gamdang mite pathenho nung ajuijuva noti'a gapangdiu, chule keima eidalhah uva, amahotoh kanabol kitepna chu apalkehdiu ahi.

¹⁷Chuteng hiche nikho chule achunguva kalungsatna deujah ding, amaho kadalhah-a, amaho-a kona kamai kasel ding, amaho bahgama umdiu, thilse tamtah le hesohnahon alhun khumdiu; chutia chu hiche nikho chule, I-Pathen'u ilah uva aumloujeh-a thilse hohi ichunguva hunglhung hilouham? atidiu ahi.

¹⁸Pathen dangho lama akihei nalam uva thilse jouse ahin boldiu ho jeh-a chu, hiche nikho chule kamai kaseltei ding ahi.

¹⁹Hijeh chun tun hiche la hi nangma dingin kisut in lang, Israel chate hilin; hiche la hi Israel chate chunga keima dinga hettohsahna dingin akam sunguva khumpeh-in.

²⁰Ajehchu apu apateu kahahselna, bongnoi le khoiju lona gama amaho kapuilut teng, amahon aneh uva, vaset uva, chule hungthao diu; chutengle pathen dangho lama kiheijuva, hiho chu ajendiu, keima eilunghan sah uva, kathupeh apalkehdiu ahi.

²¹Chule hung hitiding ahi, thilse tamtah le lungkhamna tamtah-in aphah tengule, achunguva hettohsah khat banga hiche la hin ahettohsah ding ahi; ajehchu achilhahteu kama kona hiche la hi suhmila umlou ding ahi: ajehchu tujeng jonghin kahahselna gama kapuilut masanga achele nadinguva alung ngaitohou chu kahen ahi.

²²Hijeh chun Mosi'n hiche la hi hiche ni mama chun asunin, Israel chate chu ahiltai.

²³ Chuin Aman Nun chapa Joshua chu mopohna apen, ajah-a, Hatninlang hangin, ajeh chu nangman Israel chate chu amaho kahahselna gama chu napuilut ding ahi; keiman nangma ka umpi ding nahi, ati.

²⁴Chuin ahitin ahi, Mosi'n hiche danthu hohi lekhabu khatna asutchaija, jo ahi phatnin,

²⁵Mosi'n Pakai kitepna thingkhong pu-a pang Levi ho chu thu apen, hitin aseije,

²⁶Hiche danthu lekhabu hi laovinlang, nachung uva hettohsah dingin Pakai na Pathen'u kitepna thingkhong koma chun koijun.

²⁷Ajehchu nakiphin hat danule nalouchal danu kahei: veuvin, tunikho-a nang hotoh kahin khomlai petna bon Pakai douna-a nakiphin uva ahile; kathinung teng ijat nabolbe tadiuvem?

²⁸Hiche thuho hi anakhang uva kaseija, ahetoh dinga vanle lei kakou theina dingin, naphung houva upaho le nalamkai hou jouse kahenga hinkhomun.

²⁹Ajehchu kathi nungle nangho le nangho nasatah-a nakisuhset nuva, nangho kathupeh-u lampia kona nakihei mangdiu; chule ninunung lamle thilphalouvin nalhah khumdiu ahi; ajehchu nakhut soh-u thilbola kona suh lunghangna dinga Pakai mitmu-a thilphalou nabol dingu ahi ti kahei, ati.

³⁰Chuin Mosi'n Israel houkhom ho jouse nakhanga chun hiche lacheng hi akichai kahsen asei pehtan ahi.