Read Thado Chin Danbu 32 Bible Online

Danbu 32 - Thado Chin bible

Danbu 32

¹Vo vanho, nana hinsungun, keiman thu seijinge; chule vo leiset, kakama thupot ho ngaijin.

²Kathuhil hi gotwi bangin juntin, kathusei daitwi bangin chimintin, hamnel chunga gophin bangle, hampa chunga gohongju banginte.

³Ajehchu Pakai min kaphongdoh ahi: Nanghon Pathen loupina seichoi leuvin.

⁴Ama songpi ahin, anatoh ho achamkime; ajehchu alamlhah jouse thudih ahi: khansetna beihel le thutah Pathen, chondih le chonpha chu ama ahi.

⁵Ama hole amaho akisuboh-un, amonao chu achate mona ahipoi: amaho khanglamvai le lungput janglou khang ahiuve.

⁶Vo mingol le mitanangte, chutia chu Pakai nalethuh diuham? Ama nachodoh pao napao hilouham? Ama nasem paole natungdoh pao hilouham?

⁷Gollui lai geldoh inlang, khang tamtah-a kumho chu ngaito temin; napa dongle chun navetsah ding ahin, na upate dongle chun naseipeh taovinte.

⁸ Hatchung nungin namho agoulo diu ahoppeh lai, aman Adam chapate asekhen laichun, Israel chate ajatnu dungjuijin mipite gamgi chu anasepeh-e.

⁹Ajehchu Pakai chanvou chu amite ahin, Jacob hi agouchan ahi.

¹⁰Aman amachu neldi gam, agohkeo gamthip ginghou hou lah-a amu ahi; Aman ahinpuidoh-a, ahila, ama mitchang banga avettup ahi.

¹¹Mulaopi in abuh aphetlhah-a, anou chunga akijapma, alha ajahkhuma, amat ji-a, alha chunga apoh banga;

¹²Chutia chu Pakai bouvin ama apuile-a, gamdang pathen toh umkhom lou ahi.

¹³Louvin asepdoh ga aneh theina dingin leiset mun sangho chunga atousah-in; songpi-a konin khoiju achepdoh sah-in, meituh songa konin thaotwi aputdoh sah-in;

¹⁴Bongnoiha le kelngoi noi, kelngoinou thaotah, chule Bashan kelngoi chalho, le kelho, suhlou chang phapen tah; chule lengpitwi thisan thengtah ju in nadonin ahi.

¹⁵Ahin Jeshurun athao behsettan, akeng apeh pehtai; nathaovin, nasalha jengin, thaovin natome; chuin asempa Pathen adalhan, alhatdamna songpi chu totnopnan aneitai.

¹⁶Amahon namchom pathenho jeh-in athangthip sah-un; thet umtah ho-a konin alunghan sah-un ahi.

¹⁷ Amahon Pathen kom hilouvin thilha ho, ahetkhah louvu pathenho, napu napateu vin anagin louva athah beh-a hungpot pathen thah ho henga ganlhai abolun ahi.

¹⁸Nahinga Songpi chu iman nagelpon, nahin semdoh-a Pathen chu nasumil tai.

¹⁹Pakaiyin hichu amuphatnin, Achapate le achanuteu suhlunghan sahna jeh chun amaho chu akidahtai.

²⁰Chuin aman, amahoa kona kamai kaselding, akichainao ipi soh mongam kavet ding ahi: Ajehchu amaho khang lamvai mite ahiuvin, tahsanna umlou chate ahiuve.

²¹ Amahon Pathen hilouho-a eithangthip sah-un; apannabei houva eichou lunghangun; kenjong nam hilouho-a kona athangthip nadiuva kachouthou uva, nam ngoltah-a kona kachou lunghang dingu ahi.

²²Ajehchu kalunghana-a mei akongdoh-in, thikholkhul geija akahlhah ding, hichun leiset le asunng keh jouse akah lhah-a, molsang bulho jouse meijin akahding ahi.

²³Achunguva setna kaset thopma, achunguva kathal chang ho kamanchah ding ahi.

²⁴Amaho gilkelin akah uva, meika nasatah le suhgamna nasatah-in aval lhum diu ahi: leivui lah-a kitol gulgu toh kilhona achunguva gamsaho ha hemtah kasolpeh ding ahi

²⁵Polama chemjamin, sunglama tijatna-in, gollhang le nungah theng, noicheplai le samkangsa jong asuhmang ding ahi.

²⁶Aning ninga kathecheh-a, mihem lah-a kona hetjinga aumnao kichaina kabolding ahi, kati;

²⁷Akidoupi houvin agelkhel uva, Kakhutnu hi choisangin aumin, hiche ho jouse hi Pakaiyin abol ahipoi, tia aseiuva melma lunghanna chu kaginlou hile.

²⁸Ajehchu amaho thumopbei nam ahiuvin, chule amaho-a hetkhena himhim aumpon ahi.

²⁹O, hichehi ahetkhen na dinguva ching hitaveleu, khonunga akichaina dingu angaito dingu hija!

³⁰A songpiuvin amaho akijohdoh-a, Pakaiyin amaho akhakhum ahilou ngale; mikhatnin sangkhat iti adela, minin sangsom iti adeljam ding ham?

³¹Ajehchu amaho songpi chu eiho Songpi tobang ahipon, imelmateu amaho le amaho jengjong thutan ho ahiuve.

³²Ajehchu alengpi guiju chu Sodom lengpigui le Gomorrah loujaova kon ahi: alengpi ga houchu gilkha lengpiga ahin, aga bohho chu akhan ahi.

³³Alengpitwi houchu dragon gu le gulgu phaloutah ahi.

³⁴Hichehi kakoma kikhol hilou hija, kagou ho lah-a kikha khum hilou ham?

³⁵ Phulahna le lethuhna chu keima-a ahin; aphat tahle akengto-u kithol ding ahi: ajehchu amanthah nao nikho anaitan, achunguva hunglhung ding thilho chu gangtah-a hunglhung ding ahi.

³⁶ Ajehchu athahatnao abeisoh-a, akikhu khumle akidalha abeihel tengule; Pakaiyin amite thu tan intin, asohte-a dinga alung aheiding ahi.

³⁷Chule aman hitia aseiding ahi, A-pathenhou, atahsanu angapnao asongpiu chu hoiba hitam?

³⁸Aganlhainao sathao ne-a, adon thilto lengpitwi donho chu? amaho chu hung thoudoh uhenlang nakithopiu hen, chule nahongbit nun pangu hen.

³⁹Tun veuvin, kei, keimamong monghi Ama chu kahi, Keima toh pathen hikhom adang aumpoi: Keiman kathatjin, chule kahinsah jin; Keiman kamavojin, chule kadamsah kitjin ahi: kakhutna kona huhdoh jouding koimacha aumpoi.

⁴⁰Ajehchu Keiman van lama kakhut kadom sangin, tonsotna kahing jinge katin ahi.

⁴¹Kachemjam duljeju chu kanola, kakhutnin thutanna atuh-a ahile; kamelmate chunga phu kalah ding, eihot bolte kalethuh ding ahi.

⁴²Akithatho le sohchangho thisan le, melmate lamkaiho luchanga kon, Ka thalchang ho thisan kadonkham sah-a, kachemjamin saphe avalhum ding ahi.

⁴³ Vo namtinho, hiche amitetoh hin kipah-un: ajehchu aman asohte thisan phu alah-a, akidoupi ho chunga phu alah ding, chule agam le amite chunga hepina anei ding ahi, ati.

⁴⁴Chuin Mosi amatah chu Nun chapa Hoshea toh ahungin, hiche la thu jouse chu mipi ho nabenga aseijin ahi.

⁴⁵Chuin Mosi'n hiche thuho jouse hi Israel pumpi jah-a asei aseichaijin,

⁴⁶Chuin amaho jah-a, Tunia nalah uva kaphondoh thu jouse-a hin nalungu koijun lang, hiche danthu jouse hi chingthei tah-a ajuidiuva nachateo nathupeh dingu ahi.

⁴⁷Hichehi nangho-a dinga mohthil ahipoi; ajehchu hiche hi nahinkhou ahi: chule hicheho jala hi lodinga Jordan nagalkai nao gama chu nahinkhou sotding ahi.

⁴⁸ Chuin hiche nikho mama chun Pakaiyin Mosi jah-a aseijin, hitin ati,

⁴⁹Jericho toh kigalsai, Moab gama um Abarim molsanga um Nebo molsanga khun kaltouvin lang; Israel chaten alo dinguva kapeh Canaan gamchu gaven:

⁵⁰Nasopipa Aaron Hor molsanga athia amitetoh akigop bangin, nakaltouna lama chun hungthiden ninlang namite toh kigomtan.

⁵¹Ajehchu Zin gamthip, Kadesh mun Meribah twiphunga Israel chate lah-a keima douna in nachonkhela; Israel chate lah-a neijabol loujeh ahi.

⁵²Hijeng jongle agam chu namasangtah-a nagamu ding, amavang Israel chate kapeh gamsunga vang chu nalut louding ahi, ati.