Read Thado Chin Danbu 33 Bible Online

Danbu 33 - Thado Chin bible

Danbu 33

¹Chule hichehi Pathen mipa Mosi'n athi masanga Israel chate phatthei abohna, phattheina chu ahi.

²Chuin aman, Sinai'a konin Pakai ahungin, Seir'a konin ahenguva dingin akipatdoh-e; aman Paran molsanga konin asalvah-in, mitheng sangsom to ahunge: akhutjet lama konin amahodin danthu khaotah apotne.

³Ahi, aman mipi angailun, amithengte jouse nakhutna aumui: chule amaho nakengbulla atouvun, mitinin nathu akisandiu ahi.

⁴Jacob mipite agoudiuva apeh danthu chu Mosi'n einapeuve.

⁵Mipi lamkaiho le Israel phungho akikhop khom phatnun, ama Jeshurun'a aleng changin ahi.

⁶Reuben hingjing henlang thihih hen; chule amite jong lhomcha hihih hen.

⁷Hichehi Judah phatthei kibohna ahi, chuin aman, Pakai, Judah aw hi ngaijin lang, amite henga puijin; amadin akhut teni hi bulhingset henlang, amelmate-a kona kithopi-a chu nangma hin, ati.

⁸ Levi thudolla aman, Massah mun'a naphotchet pa, Meribah twiphunga nakibaopi pa, na mithengpa henga na Thummim le na Urim chu umhen.

⁹Aman anu le apa henga, Keiman ama kanamupon, aman asopite jong ahekhenpon, chule achate tahjong ahepoi: ajehchu amahon nathu amangun, nakitepna anitnun ahi.

¹⁰Amahon nathutanna chu Jacob ahiluva, chule na danthu chu Israel ahil dingu; namasanga gimnamtui akoijuva, na maicham chunga pumgo ganlhai aboldiu ahi.

¹¹Pakai, anei agouhou phatthei boh-inlang, akhutna anatohhou sanpeh-in; ama mudaho le ama douna-a hung kipan hochu akipat doh kit louna diuvin akongu jeppeh-in, ati.

¹²Benjamin thudolla aman, Pakai ngailutna chu akoma bitkeija chengding; chule Pakaiyin nilhum keija akhu-a, alengkou teni kikah-a chengding ahi, ati.

¹³Chule Joseph thudolla aman, Agam chu van thilluho-in, daitwi ho-in, leinoi thuhtah-a umho-in Pakai phattheiboh changhen,

¹⁴Chule nisan asodoh ga thillu ho le lhathah-a asodoh thil luho-in,

¹⁵Chule tonlai molsangho thilgun holeh kemlou lhang ho-a thil manlu ho,

¹⁶Chule leiset le athil manlu holeh, asung dima umho-in; chule hamboh lah-a chengpa lungdeijin: Joseph lamkaipa luchang le asopite-a kona kikhendohpa luchanga phattheibohna hunglhung hen.

¹⁷Aloupina chu abongchal sohmasa pen abangin, akiho chu gambong ki ho abange: hicheho-a chu aman mite chu kolmong geija anokhom ding; chule amaho chu Ephraim mi sangsom le Manasseh mi asang sang chu ahiuve.

¹⁸Chule Zebulun thudolla aman, Zebulun nangma napotdoh na-a kipah inlang, chule Issachar nangma naponbuh sunga kipah-in.

¹⁹Amahon miho chu molsang lama akoudiu, hia chu chonphatna ganlhai atodiu ahi. Ajehchu amahon twikhanglen ninglhina le, nellah-a kiselgu gou ho chu achopdiu ahi, ati.

²⁰Chule Gad thudolla aman, Gad kehlena chu nunnom hen: ama keipi bahkai bangin achengin, banjang le lu-a lallukhuh chu amaltelin ahi.

²¹Chule chua danthu pepa chanvou mun'a chu ama atou jeh-in, ahop masapen ama akichantan: chule mipi lamkaiho chutoh ama ahungin, aman Pakai dihna le Israelte chunga athutanna atongdoh-in ahi, ati.

²²Chule Dan thudolla aman, Danhi keipi bahkai nou ahin, Beshan'a kona hungchom doh ding ahi, ati.

²³Chule Naphtali thudolla aman, Vo Naphtali, lungdeija lunglhaile Pakai phatthei boh-a dim, lhumlamle lhanglam gam lotan, ati.

²⁴Chule Asher thudolla aman, Asher hi chilhah in phatthei changhen lang, asopite henga lahthei dol hihen, chule akeng thaotwija dehen.

²⁵Nakengchot thih le sum-eng hiding, nahinlai nikhoho banga nahatna jong umding ahi.

²⁶Nangma napanpi dinga vanlaijola touva, chule aloupina-a meibol chunga um Jeshurun Pathen tobang khatcha aumpoi.

²⁷Tonsot Pathen chu nakiselna ahin, chule noilama atonsot bannang aumin ahi: Aman namasanga kona melmate adelmang ding, amaho chu sumangin atiding ahi.

²⁸Chutengle Israel changseh bitkeija chengding, Jacob twinah chu changle lengpithei gama umding; chule avanin jong daitwi alhahsah ding ahi.

²⁹Vo Israel, anunom nahi: nangma tobang koi umam, Vo napanpi nao lumdal le na loupina chemjam, Pakai huhhing mite! Namelmate nahenga ajounao kimuntin, nangman amun sanghou nachotpha ding ahi.