Read Thado Chin Danbu 34 Bible Online

Danbu 34 - Thado Chin bible

Danbu 34

¹Chule Mosi Moab phaicham konin Nebo molsang, Pisgah vuma akaldoh-in, hichu Jericho jontah ahi. Chuin Pakaiyin Gilead gam jouse chu Dan geijin avetsah-in,

²Chule Naphtali gam jouse, Ephraim gam, Manasseh le Judah gam pumpi, twikhanglen mong geijin,

³Chule lhanglama Jericho phaicham, tumthing kena khopi Zoar geijin avetsahtan ahi.

⁴ Chuin Pakaiyin ajah-a, Nachilhah te kapeh ding ahi tia Abraham, Isaac chule Jacob henga kana kihahselna gamchu hichehi ahi: keiman hichehi namitnin ka musahtan, amun vang nalhun louding ahi, ati.

⁵Chuti chun Pakai thu dungjuijin, Pakai soh Mosi chu Moab gama chun athiden tai.

⁶Chuin Aman Moab gamsunga phaicham khat Beth-peor jona chun avuijin, ahinla tuni geihin alhan chu koimachan ahepoi.

⁷Chule Mosi athichun kum jakhat le kum somni ahitan; amit athimpon, athahat jong alha dehpoi.

⁸Chuin Moab phaichama chun Israel chaten Mosi chu nisomthum akauvin; chuti chun Mosi dinga kana le lunghemna chu akichaitai.

⁹Chuin Nun chapa Joshua chu Mosi'n achunga akhut angap jeh-in, chihna lhagao adimset tan: Israel chaten athu angaijun, Pakaiyin Mosi thu apehbangin abolun ahi.

¹⁰ Chule chucheng nunga pat chun Pakaiyin kimaito tah-a anahet Mosi tobang Israel sunga themgao khatcha asohdoh kit tapon,

¹¹Egypt gamsunga Pharaoh heng le asohte jouse heng, chule agamsung pumpi-a, melchihna ho le thil kidangho jouse chu boldinga Pakaiyin anasol,

¹²Chule Israel jouse mitmu tah-a Mosi'n anavetsah chuche khut thahat tah jouse-a le chuche tijat umtah jouse boldoh-a khatcha asohdoh kit tapon ahi.