Read Thado Chin Danbu 4 Bible Online

Danbu 4 - Thado Chin bible

Danbu 4

¹Hijeh chun tun, vo Israel, nahin theijuva, napu napateu Pakai Pathen'in napeh-u gamchu nagalo theina dingun, najui diuva kahil masah dem chondanho leh thutannaho hi ngaijuvin.

² Keiman nangho kathupeh hi nakoibe loudiu, chule chua kona jong nalahdoh louhel diu, chutia chu keiman kapeh-u Pakai na Pathen'u thupeh chu nanit diu ahi.

³ Baal-peor jeh-a Pakai thilbol chu namitnun namutaove. Ajeh chu Baal-peor jui jouse chu Pakai na Pathen'un nalah uva konin asumangtai.

⁴Ahinla nanghon Pakai na Pathen'u heng lama behho vang amitakip tunigei hin nahingjing naove.

⁵Veovin, Pakai Pathen'in eithupeh bangtah chun, lodinga nachenna diu gama naboldiuvin, keiman chondan le thutanna chu kahil taove.

⁶Hijeh chun hicheho chu nit unlang bolun; ajehchu hichu namtin ho mitmu-a nachih naole nahet them nao ahin, amahon chondan kisun jouse hi ajah uva, Tahbeh-in hiche nam lentehi aching le ahechen mite ahiuve, atidiu ahi.

⁷Ikouna chanuva einaijiu Pakai i-Pathen'u tobanga amaho naiji Pathen nei chutobang namlen koi umam?

⁸Chule tulaija namasanguva kakoi dan kisun jouse banga hititah-a chondan hole thutan na nei namlen dang koi umam?

⁹Kichih thei pou pouvun lang, gunchu tah-in nalhagaovu hongphaovin, achuti louleh namitnun amu thilho chu sumilun natin, nahinlai nikho sungseuvin nalungsunguva konin mangthah get ninte: ahin nachapate le nachapate chate chu hiljouvin.

¹⁰Adeh deh-in Horeb molsanga Pakai na Pathen anga nadin nikhou, chule Pakaiyin kahenga anasei, Mipi ho chu neikhop khompeh-in, leiset chunga ahinlai nikho sungseuva keima ginje akihil theina diule, achateu ahiltheina diuvin kathu jahsah inge ati nikho chu.

¹¹ Chuin nahin naijun molsang bula nadinguvin, chule molsang chu vanlaijol geijin muthim, meilhang, chule thimletlut nin meijin akan ahi.

¹²Chuin meikong lah-a konchun Pakaiyin naheng uvah thu aseijin, a-aw cheng chu najaovin, alim vang namupouve; a-aw sehseh najaovin ahi.

¹³ Chuin aman naheng uva thuson, najui diuva athupeh akitepna chu aphongdoh-in, song pheng ni chunga asunin ahi.

¹⁴ Chuin Pakaiyin hichepet chun lodinga nachennao gama nabol diuvin, chondan kisunho le thutan naho chu nangho kahil diuvin eina thupeh-in ahi.

¹⁵Hijeh chun nangho kichihtheijun, ajehchu Horeb'a meikong lah-a Pakaiyin naheng uva thu asei nikho chun, nanghon alim namu pouve.

¹⁶ Achutiloule nakisuhboh uva, alim semthu, ipi lim hamkhat toh kilou, pasal ham, numei ham tobang kisem getnun natin,

¹⁷ Leichunga um ganhing khat tou tobang, vanlaijola lengle alhanei vacha khat tou tobang,

¹⁸Leichunga a-opma kithol ganhing khat tou tobang, leinoi twilah-a nga khat lim tobang, kisemthu getnun nate.

¹⁹Chule achutiloule namitna vanlam navet uva, nisa, lhathah,ahsi ho, chule van janelpi namu tengule, Pakai na Pathen'un vannoi pumpi-a nam jouse-a dinga apeh chu houding le jendingin kiheilut getnun nate.

²⁰ Ahinla Pakaiyin tunikho-a nahi nao banga hi agoulo ama mite hidinga nalah uva, thih meilhum sung, Egypt gama kona nana puidoh-u ahi.

²¹ Chukalvalin nangho jeh-in Pakai keima chunga alunghangin, Jordan kagalkai louna dingle, Pakai na Pathen'un lo dinga napeh-u gam phatah-a chu kalut louna din akihah selin ahi.

²²Keima vang hiche gama kathi-a, Jordan hi galkai louding kahitai; ahin nangho nagalkaijuva chuche gam phatah chu nagalo diu ahi.

²³Nangho kichih theijun, ajole Pakai na Pathen'un nang hotoh akitepna sumil khaovin natin; Pakai na Pathen'un ajahda alim semthu ham, ahiloule ipiham khat toh kilou kisemthu getnun nate.

²⁴ Ajehchu Pakai na Pathen'u hi kavamhel mei ahin, thangthip tah Pathen ahi.

²⁵Nanghon chate le chateho chate nahin neijuva, gamsunga chu sottah nachen uva, nakisuhboh uva, alim semthu, ahiloule ipihamkhat toh kibang lim nakisem thuva, Pakai na Pathen'u mitmu-a thilse nabol uva, nalung hansah uva ahile,

²⁶Lo dinga Jordan nagalkai nao gama kona chu naman thah helnadiuva, tunikho-a hi nachung uva ahetoh dinga van le lei kakou ahin; chukoma chu nachensot loudiu, suhmang hela naum johdiu ahi.

²⁷ Chule Pakaiyin namtin lah-a nathe cheh uva, Pakaiyin napuinadiu Pathen helouho lah-a chu lhomcha naphah diu ahi.

²⁸Chule chua chu mutheilou, jatheilou, netheilou, thilnam jalou, mihem khutsem thing le song pathen lhachana natoh dingu ahi.

²⁹ Hijongle chua kona Pakai na Pathen'u chu nahol uva, nalungthim pumpiu le nahinnao pumpi-a nahol ule, namu dingu ahi.

³⁰Hesoh genthei natouva, ni nunungni le hicheng thil jouse nachung uva achuhteng, Pakai na Pathen lama nakiheijuva, a-aw nangai uva ahile,

³¹(Ajehchu Pakai na Pathen'u chu hepina-a dim Pathen ahi,) aman nadalhah loudiu, nasuhmang louheldiu, napu napateu henga akihahselna le akitepna chu asuhmil louhel ding ahi.

³²Ajehchu nikho che masaho, nangho masanga Pathen'in leichunga mihem asem nikho-a pat, chule van langkhatna pat alangkhat geija, hiche tobang thil nasa adang anaum kha-a, ahiloule hitobang hikija khatam? dong temun.

³³Nanghon najah uva nathilou banguva, meikong lah-a kona Pathen thusei aw min ajahkhah em?

³⁴Ahiloule Pakai Pathen'in Egypt gama namitmuva abol hojouse dungjuija, Pathen'in lhepna-a, melchih na-a, thil kidang, khut thahatna, ban jahdoh-a, tijatna nasatah-a, namkhat lah-a kona namkhat lahdoh dinga cheding agot khah-em?

³⁵ Pakai chu Pathen ahi ti nahet theina dinguva, naheng uva kimusah ahi. Amalou koima dang aumpoi.

³⁶Aman nahil theina diuva, van'a kona a-aw najah sah uva; chule leichunga ameikou loupitah chu namusah-u ahi; chule nanghon meikou lah-a konchun athu najaovin ahi.

³⁷Chule napateu angailut jehchun, amaho nungin achilhahte alhengin, chule Egypt gama konin athahat thilbol theina-a chun amitmu-a konin napui doh-un;

³⁸Tunikho-a banga hi nangho puilutna, agamu gouva lodinga peh dingin, nangho sanga lenjole hatjo namho namasanguva konin anodoh-in ahi.

³⁹Hijeh chun Pakai hi vanchung le leichung Pathen ahi ti hi tuni hin heuvin lang, nalungun ngai touvin; Amalou adang khatcha aumpoi.

⁴⁰Hijeh chun nangho le nanung uva nachateo aphatthei na dingu leh, a-itih-a dinga Pakai na Pathen'un napeh-u leiset chunga hi nahinkhou asotna dingin, tunikho-a kathupeh-u ama chona dan kisemho le athupehho hi nit jingun, ati.

⁴¹ Chujouvin Mosi'n Jordan hilam pang nisolam panga khopi thum akhendoh-in,

⁴²Tolthat ho, gutuhna neilou, masanga jong hotna neilou tosoija aheng akom that ho ajamlutna ding; chule hiche khopiho khatna ajamlut le ahintheina din akhendoh-in:

⁴³Hicheho chu Reuben mite-a dingin phaicham gamthipma um Bezer ahin, Gad mite-a dingin Gilead gama um Ramoth ahin, chule Manasseh mite-a dingin Bashan gama um Golan ahi.

⁴⁴Chule hiche hi Mosi'n Israel chate angsunga apeh danthu chu ahi.

⁴⁵Hicheho hi Egypt'a kona ahungdoh nunguva Mosi'n Israel chate jah-a anasei, hettohsah le, dan kisemho, chule thutan ho chu ahin,

⁴⁶Mosi le Israel chaten Egypt gama kona ahung potdoh nunguva anatha-u Hesbon'a cheng Amor mite lengpa Sihon gamsung Jordan pang hilam sang, Beth-peor maijona um phaichama apeh ahi.

⁴⁷Chuin amahon ama gam le Bashan lengpa Og gam, Jordan hilam pang nisolam sanga cheng Amor mite lengni gamchu alouvin,

⁴⁸Arnon vapi panga um Areor'a pat, Hermon'a um Sion molsang chan,

⁴⁹Chule Jordan hilam pang solam sanga phaicham jouse, Pisgah twinah phung noija um twikhanglen phaicham geijin alouvin ahi.