Read Thado Chin Danbu 5 Bible Online

Danbu 5 - Thado Chin bible

Danbu 5

¹Chuin Mosi'n Israelte jouse akouvin, ahenguva, Vo Israel, nakihil uva, nachintup uva, chule nabol diuvin, tunia naheng uva kasei chonna danho leh thutannaho hi ngaijun.

²Pakai i-Pathen'uvin Horeb'a eihotoh kitepna khat anaseme.

³Pakaiyin hiche kitepna hi ipateu toh abol ahipon, tunia ahingnalai jouse eihotah tojoh abol ahi.

⁴Pakaiyin nang hotoh kimaiton molsanga chun meikong lah-a konin thu anaseijin,

⁵(Hiche pet chun Pakai thu chu nangho hetsah dingin Pakai le nangho kah-a kana dinge. Ajehchu meikong jehchun nana kichauvin, molsanga chun nakaltou pouvin;) hitin ati,

⁶Keima Pakai na Pathen kahin, nakihenna in, Egypt gama kona nahin puidohpa chu kahi.

⁷Nangman Keima ansunga Pathen dangho nanei louding ahi.

⁸ Nangman alim semthu, chung van'a um hihen, ahiloule noi leisetna um hihen, ahiloule leinoi'a twisunga um hijongle, akibahpi ima lim nasem louding ahi.

⁹ Nangma hitobangho anga nakun louding, alhacha-a jong napan louding ahi. Ajehchu keima Pakai na Pathen hi thangthip tah Pathen kahin, keima eihot bola pate khansetna chu achate khangthum khangli chan geija vila, achunguva phulajia kahin,

¹⁰Keima eingailua chule kathupeh nit chu sang tamtah ho chunga khotona musah-a kahi.

¹¹ Nangman Pakai na Pathen minchu mohseh-a napat louding ahi. Ajehchu mohseh-a amin pana chu Pakaiyin themona beija alhalou ding ahi.

¹² Pakai na Pathen'in nathupeh banga cholngah ni chu athengin mangin.

¹³ Nigup sunga na natoh-a, natohding jouse chu natoh ding,

¹⁴Amavang nisagi ni chu Pakai na Pathen cholngah ni ahi. Hiche nikho-a hi nangma nahin, nachapate ahin, nachanute ahin, nasohpa ahin, nasohnu ahin, nabongchal ahin, nasangan ahin, nagancha poupou ahin, nakotpi sunga um namaljin hijongle ima natoh loudiu; nangma bang banga nasohpa le nasohnu jong kicholdodiu ahi.

¹⁵Chule Egypt gama soh-a um nanahin, chule Pakai na Pathen'in chua kona khut hattah le ban jahdoh-a nahin puidoh ahi chu geldoh-in. Hijeh-a chu Pakai na Pathen'in cholngah ni nitdinga nathupeh ahi.

¹⁶ Pakai na Pathen'in thu nathupeh bangin nanu napa jabolin, chutile Pakai na Pathen'in napehna leisetna chun nahinkho sotnintin, naphatthei ding ahi.

¹⁷ Tol natha louding ahi.

¹⁸ Jon jong nabol louding ahi.

¹⁹ Gujong naguchat louding ahi.

²⁰ Naheng nakom chunga hettohsah dihlouva jong napan louding ahi.

²¹ Naheng nakom ji jong nadeichat louding, naheng nakom in ahin, alou ahin, asohpa ahin, asohnu ahin, abongchal ahin, asangan ahin, naheng nakoma thilpou pou chu nathangset louding ahi.

²² Hiche thuho hi Pakaiyin molsanga meikong lah-a kon, meilom lah-a kon, chule muthim satah lah-a kona aw gingtah-a houkhom ho nabon uva henga anasei ahin; abelap tapoi. Chule hicheho chu songpheng ni-a asunin, kahenga einapen ahi.

²³Chuin ahitin ahi, nanghon muthim lah-a kona aw najah-u chun, (ajehchu molsang chu meikonga ka ahi,) nangho nahiuvin, naphung uva aluchangho ahiuvin, chule nalamkai jouseu ahin kaheng neihin naijun,

²⁴Chule hitin naseijui, Vetemin, Pakai i-Pathen'un aloupina le aletna eimusah-un, chule meikong lah-a konin a-aw ijaovin ahi. Tunikho hin eihon Pathen'in mihem akihoupia, ahivanga ahin chu imu taove.

²⁵Hijeh chun tu-a ibola ithijeng diuham? Ajehchu hiche meikou nasatah hin eikahvam dingu ahi; eihon Pakai i-Pathen'u aw jahbe leuhen ithi teidingu ahi.

²⁶Ajehchu eiho banga meikong lah-a kona hingjing Pathen aw ja-a, hing nalai tahsa pujouse lah-a koi umam?

²⁷Nangman ganai jinlang, Pakai i-Pathen'uvin asei ding chu gangai jin; chule Pakai i-Pathen'uvin nahenga aseijouse chu nangin kabonchao jah-a seijin lang, keihon ngai ungting, bolu vinge, nati uve.

²⁸Chule kahenga nathusei petnuchun Pakaiyin nathuseihou chu ajan; Pakaiyin kahenga, Keiman mipin nahenga athuseiju aw chu kajan ahi. Amahon athuseihou jouse chu aseidih lheh uve.

²⁹Kaden, amaho ding le achateu dinga a-itih-a aphalheh jing nadin, a-itih laijin jong hitobang lungchu pujingu henlang, eigingu henlang, kathupeh jouse anit jing jeng taveleu!

³⁰Chenlang ahenguva, Napon in nuva lutkit taovin, gatipeh-in.

³¹Nangma vang kakoma dingin lang, alodiuva kapehna gama abol theina diuva amaho nahil dinga thupeh jouse, chonna dan kisemho, chule thutanna ho nahenga kasei ding ahi, ati.

³²Hijeh chun Pakai na Pathen'un nathupeh banguva nabolna diuvin chingtheijun; nangho jetle veija nakihei mang lou dingu ahi.

³³Nalodiu gama naphat theijuva, nahinkhou asotna dinga, Pakai na Pathen'un nathupeh-u lampi jouse chu najot sohkei dingu ahi.