Read Thado Chin Danbu 6 Bible Online

Danbu 6 - Thado Chin bible

Danbu 6

¹Tun hichehohi nacheuva nagalo diu gama naboldiuva Pakai na Pathen'un nangho hil dinga thupeh eipeh dan thupeh ho, chondan ho, chule thutanna hochu ahi,

²Chutia chu nahinkhou asotna dinga keiman nangma le nachapa chule nachapa chapate kathupeh achondanho le athupehho chu nahinkho lhumkei uva nanit uva, Pakai na Paten chu nagin dingu ahi.

³Hijeh chun, vo Israel, Pakai napu napateu Pathen'in athutep banga khoiju le bongnoi lona gama chu naphat theijuva chule hatah-a napun nadiuvin, ngaijin lang, naboldoh nadin chingtheijin.

⁴ Ngaijin, vo Israel, Pakai na Pathen'u chu Pakai khat seh ahi.

⁵ Chule nangman Pakai na Pathen chu nalung pumpi-a, nalhagao pumpi-a chule nathaneina pumpi-a nangailut ding ahi.

⁶ Chule tu nikho-a nangma kathupeh hohi nalung sunga nachin jing ding ahi.

⁷Chule nangman hicheho hi nachate henga tomngai tah-a nahilding, na-insunga natoupet tengle, lamdunga nachepet tengle, naluppet tengle, chule nathodoh teng jongle naseipeh ding ahi.

⁸Chule hicheho chu melchihna dinga nakhutna nabua, chule namit teni kikah-a thuchihbom tobang hiding ahi.

⁹Chule hicheho chu na-in khomhou le nakotpi hou chunga nasut dingu ahi.

¹⁰ Chule hung hiti ding ahi, Pakai na Pathen'un napu napateu Abraham, Isaac chule Jacob henga pehdinga akihahselna gam, nangma sahdoh hilou khopi lentah le phatah ho-a chu nahin puilutna,

¹¹Nangma dimsah hilou thilpha jouse dimna inho, nangman nalai hilou twikul kilaiho, nangma phu hilou lengpilei le Olive thingphung ho chu nangman naneh-a nava teng le,

¹²Chuteng chingtheijin, ajole Egypt gam kihenna in'a kona nahin puidoh Pakai chu sumil getnin nate.

¹³ Pakai na Pathen chu nagin na, ama najena, chule ama minna nakihahsel ding ahi.

¹⁴Nanghon pathen dang, nakimvel uva cheng miho pathen nung najui loudiu ahi.

¹⁵(Ajehchu nalah uva Pakai na Pathen chu thangthip Pathen ahin,) ajole Pakai na Pathen lungsat nachung uva koujah-intin, leiset chunga konin nasumang hel getnunte.

¹⁶ Nanghon Massah mun'a nana patep banguva Pakai Pathen chu na patep loudiu ahi.

¹⁷Nanghon Pakai na Pathen'un thupeh napeh-u adan thupeh ho, ahettohsah ho, chule achonna dan kisunho chu gunchu tah-a nanit dingu ahi.

¹⁸Chule Pakaiyin napu napateu henga ana kihahselna gama nagacheuva naga lona dingu le naphat theina dinguva Pakai mitmu-a adih le apha chu nabol diu,

¹⁹Pakaiyin anasei banga namelma teu jouse chu namasang uva kona nomanga umdingu ahi.

²⁰Chule ahunglhung ding phat teng nachapan nahenga, Pakai i-Pathen'un nana thupeh hettohsah ho, dan kisunho, thutanna ho chu ipi kiseina ham? tia nadoh tengleh,

²¹Chuteng nachapa henga chu, Keiho Egypt'a Pharaoh soh kana hiuvin, Pakaiyin Egypt'a kona khut thahat tah-a eipuidoh-u ahi;

²²Pakaiyin kamit mutah-un Egypt chung leh Pharaoh chung, chule a-insung pumpi chunga, melchihna ho, thilkidang ho, thina, chule thohtheilou hel lungkhamna eimu sah-un ahi.

²³Chule pehdinga ipu ipateu anahahselna gama eipuilut theina diuvin, hia konchun eina puidoh-un ahi.

²⁴Chule tunikho-a banga hi eihinghoi theina dingu le, a-itih-a iphat theina dingu, chule Pakai i-Pathen'u igin na dinguva, Pakaiyin hiche chondan jousehi ibol diuva eina peh-u ahi.

²⁵Chule aman eithupeh banguva, Pakai i-Pathen'u masanga hiche thupeh ho jouse chu initnuva ahile, hichu ichon phatnao hiding ahi, tia naseipeh dingu ahi.