Read Thado Chin Danbu 7 Bible Online

Danbu 7 - Thado Chin bible

Danbu 7

¹ Chule lodinga nachenao gama chu Pakai na Pathen'un napuilut nuva, na angsunguva nam tamtah Hit mite, Girgash mite, Amor mite, Canaan mite, Perizz mite, Hiv mite chule Jebus mite nangho sanga tamjole hatjo nampi sagi anodoh tengle,

²Chule Pakai na Pathen'un amaho chu namasanguva apehdoh tengle, nanghon amaho chu natha uva nasuhmang heldiu, amahotoh kitepna nasem loudiu, hepina jong namusah louhel dingu ahi.

³Amaho tojong nakichenlou ding, nachanu jong achapa dinga napehlou diu, chule achanu jong nachapa ji dinga nalah louding ahi.

⁴Ajehchu amahon nachapa chu pathen dangho lhacha-a apan theina dinga keima eijui na-a kona aheimangdiu: chutia chu Pakai lungsatna chu nachungah deujah-a, photlotna nasuhmang ding ahi.

⁵ Ahinla nanghon amaho chu hitia hi naboldingu ahi: amaichamu nasuhmang pehdiu, amilimhou nasuhboh diu, athingbom hou chu naphuh lhuh pehdiu, chule alim semthu milimho chu meija nahalvam dingu ahi.

⁶ Ajehchu Pakai na Pathen uva dinga namtheng nahiu ahin, Pakai na Pathen'un leiset chunga nam jouse chungvuma ama-a dinga nam tumbeh hidinga nalhen doh-u ahi.

⁷Namdang sanga natamjoh jeh uva Pakaiyin nachung uva ngailutna akoija, nalhenu ahipoi; ajehchu nangho nam jouse lah-a alhompen nanahiu ahi.

⁸Ahinla Pakaiyin nangailut jeh-u le, napu napateu henga akihahselna asuh bulhit nom jeh-a Pakaiyin khut thahat tah-a napui doh uva, soh channa in'a konleh, Egypt lengpa Pharaoh khutna kona nalhatdoh-u ahi.

⁹ Hijeh chun Pakai na Pathen chu Pathen ahin, kitahtah Pathen, ama ngailuho le athupeh nit ho henga khang sangkhat geija akitepna le akhotona koijing,

¹⁰Chule ama hotbolpa chu sumang dinga amai uva lethuh jia Pathen ahi: ama ahotbol pa chu adep jing louding, amaikoh tah-a alethuh ding ahi, ti kihetnin.

¹¹Hijeh-a chu nangman tunikho-a kathupeh danthupeh ho, chonna dan kisunho, chule thutanna ho hi nanit ding ahi.

¹² Chutengle hung hitiding ahi, nangman hiche thutanna hohi nangaija, nanitna, chule nabola ahileh, Pakai na Pathen'in napu napate henga akihahselna, akitepna le ahepina chu anit jingding ahi.

¹³Chule aman nangma nangailutna, phatthei naboh ding, chule napunsah ding; nangma pehdinga napu napateu henga akihahselna leisetna chu nalaigilga le naleiset ga, nachang, nalengpi thei, nathao nabong hole kelngoihon ho phatthei abohding ahi.

¹⁴Nangma nam jouse chungvuma phatthei nachan ding; nangho lah-a kon, ahiloule nagancha lah uva kona anu hijongle apaham hijongle achinga umlou helding ahi.

¹⁵Pakaiyin nangma-a kona natna jouse alahmanga, nangman nahet Egypt hiveiho jouse chu nachunga khatcha akoilou ding; nangma nahot bolte jouse chunga akoijoh ding ahi.

¹⁶Chule Pakai Pathen'in napehdoh ding miho jouse chu nasuhmang hela, achunguva khotona naneilou ding, a-pathen'u jong najen louding ahi; ajeh chu hichu nangma dinga thanga hungpang ding ahi.

¹⁷Nangman nalungthima, Hiche namho hi keisangin atamjon, iti kanomang jou ding ham? nati-a ahile,

¹⁸Amaho chu nakichat louding; amavang Pakai na Pathen'in Pharaoh leh Egypt mite jouse chunga anatoh jouse chu nageldoh joh-a,

¹⁹Nangman namitna namu patepna nasatah ho, melchihna ho, thil kidangho, khut thahat tah le ban jahdoh-a Pakai na Pathen'in napuidoh chu nageldoh ding ahi: Pakai na Pathen'in nakichat miho jouse chunga chutobanga chu abolding ahi.

²⁰Chukal vala jong Pakai na Pathen'in nangma-a kona kisel ahingdoh amoh ho chu asuhmang kahse-a alah uva khoi-ngal alhakhum ding ahinalaije.

²¹Nangman amaho chu nakichat louding ahi: ajehchu tijat umtah le hat chungnung Pakai na Pathen'u nalah uva aume.

²²Chule Pakai na Pathen'in namasanga hiche namho chu athem thema anodoh ding ahi. Nangman khatvei phulsuh-a nasuhmang thei louding ahi; achuti loule gamsa ho nachunga hungpung getnunte.

²³Ahinla Pakai na Pathen'in amaho chu nangma henga hinpe doh intin, chule suhmang hela aumkah seuva manthah na-a nasatah-a asuhmang ding ahi.

²⁴Chule aman aleng hou chu nakhutna ahin pehdoh ding, nangman amin'u vannoi'a kona nasuhmang ding ahi. Amaho nasuhmang hel tokah se-a koimacha namasanga dingjou louding ahi.

²⁵Alim semthu pathen ho chu meija nahalding, achung kai sana ahiloule adangka ho chu nadeichat louding, lah jong nakilah louhel ding ahi; atiloule chua ohkhan nate: ajehchu Pakai na Pathen dinga thet umtah ahi.

²⁶Chule na-insunga thil thet um napohlut louhel ding ahi; atiloule hiche tobang chun sapsetna-in umkhan nate. Amavang nangman hichu nasatah-a nathetna, nakidah johding ahi: ajehchu hichu sapset thil ahi.