Read Thado Chin Danbu 8 Bible Online

Danbu 8 - Thado Chin bible

Danbu 8

¹Nahin uva, napun uva, napu napateu henga Pakaiyin ana hahselna gama chu nalut uva nalotheina dingun, tunia kapeh thupeh jouse hi nabolna dingun chingtheijun.

²Chule nangho suhnem nading, photchetna ding, nalungsunguva ipi umam hetdohna dingle, aman nathupeh hou chu najuidiu najui loudiu hetna dinga, Pakai na Pathen'un kum somli sung gamthipma nahinpui nao lampiho chu geldoh-un.

³ Mihem changlhah seh-in ahingpon, Pakai kamsunga kona hungpotdoh thucheng jouse-a bou hingding ahi ti nangho nahetsah theina dinguva, aman nasuhnem uva, gilkel nathoh dingu aphala, nangho nahiuva, napu napateu ahia jong ahet khahlouvu manna-a navah-u ahi.

⁴Hiche kum somli sunghin natahsa chunguva navonu achulpon, nakengu jong apom pon ahi.

⁵Mihemin achapa asehgim jibanga, Pakai na Pathen'in nasehgim chu, nalunga jong nangaito ding ahi.

⁶Hijeh-a chu alampia nachena dingu le, ama nagin na dinguva Pakai na Pathen'u thupeh ho chu nanit dingu ahi.

⁷Ajehchu Pakai na Pathen'un gamphatah, thinglhang le phaichama kona hunglong doh twinah le twisam putdohna gam, vachadung ho lona gama napuilut uva,

⁸Suhlou chang, sakol chang, lengpigui ho, theichang phungho, kolbuthei ho, Olive thao le khoiju lona gam,

⁹Lhasam louva changlhah naneh nadingu, asunga chu imacha nalhahsam loudingu; asong ho thih hija, alhangho-a kona sum-eng laidoh theina gamphatah-a napuilut dingu ahi.

¹⁰Nanghon naneh uva nava tengule, aman gam phatah napeh jeh uva Pakai na Pathen'u chu nathangvah dingu ahi.

¹¹ Tunia nangho henga kathupeh; adan thupeh ho, athutan naho, achonna danho hi nanit daova, Pakai na Pathen'u chu nasuhmil louna dingun chingtheijun.

¹²Achuti loule naneh-a nava tengle, chule in hoitah nakisah-a asunga nachen tengle,

¹³Chule nagancha honu le nakelngoi hon hou ahung puna, nasanao le nadangka hou ahung puna, naneijouseu ahung punteng,

¹⁴Chuteng le nalungthimu hung kichoisanga, henkola na-umnao in, Egypt gama kona nahin puidoh-a Pakai na Pathen chu sumil khaovin natin;

¹⁵Gulse le aipi umna, Twi umlouna gamgo gamthip lentah le tijat umtah lhungkeija nahin pui galkaija, meituh songpi-a kona twi nape pao;

¹⁶Nahinkho nunung lamle naphat theina diuva nasuhnem theina diule naphotchet theina diuva gamthipma napute napateu vin ahetkhah louvu manna-a navahpao chu sumil khaovin natin;

¹⁷Chule nangman nalungthima, Kathil boltheina le kakhut thahat na-in hiche haona hohi eilampeh ahi, tigetnin nate.

¹⁸Amavang Pakai na Pathen chu nageldoh ding ahi: ajehchu tunikho-a banga hi napateu henga ana kihahselna akitepna chu aphudet theina dinga thahat nape-a chu ama ahi.

¹⁹Chule hitiding ahi, Pakai na Pathen'u chu nasuhmil heluva, Pathen dang nung najuijuva, alhacha na natoh uva, nahou uva ahile, tunikho-a hi kagihsal nahiuve, nangho namanthai teidingu ahi.

²⁰Pakai na Pathen'u aw najuinom loujeh uva, namasanguva namdangho asuhmang banga, chutobanga chu namanthah dingu ahi.