Read Thado Chin Danbu 9 Bible Online

Danbu 9 - Thado Chin bible

Danbu 9

¹Ngaijun, Vo Israel: Tunia hi nangho sanga nasajo le hatjo, khopi lentah le van geija akulbang kisaho lodinga Jordan nagalkai ding ahin,

²Nangin nanahetsa-u Anakim chate, Anak chate masanga koiham ading joudinga? tia miseina-a nanajah sao milentah tah le sangtah ho masanga nachedingu ahi.

³Hijeh chun tunikho hin namasanguva che-a chu Pakai na Pathen'u ahi ti heuvin; aman amaho chu kavamthei mei banga asuhmanga, na-angsung laitah uva asuhnem dingu ahi. Hitia chu Pakaiyin najah uva asei banga, amaho chu nanodoh uva, nasuhmang loi jeng dingu ahi.

⁴Pakai na Pathen'in namasanga kona amaho anodoh nung tengle, Kachon phatna jeh-a Pakaiyin hiche gam lodinga eipuilut ahi, tin seihih-in; hiche nampiho gitlou jeh joh-a Pakaiyin namasanguva kona amaho anodoh ahibouve.

⁵Nachon phatna jeh, ahiloule nalungthima chondihna nanei jeh-a agamu lodia nache ahipoi: amavang hiche nam mite gitlou jeh le, Pakaiyin napu naputeu Abraham, Isaac, chule Jacob henga akihahselna asuh bulhitna dinga, Pakai na Pathen'un namasanguva kona amaho anodoh joh ahibouve.

⁶Hijeh chun hiche gampha hi nachon phatnao jeh-a Pakai na Pathen'un nalodiuva napeh-u ahipoi ti kihet un; ajehchu nangho milouchalte nahi bouvui.

⁷Gamthip laija chu iti dana Pakai na Pathen'u nalunghansah-u ham geldoh-un lang, sumil hih-un; Egypt gama kona nakipat doh nikhouva pat, hiche mun nahunglhun geijun, nangho Pakai dounan nkiphinun ahi.

⁸Horeb'a jong Pakai chu nalunghan sah uvin, chutichun nangho suhmangna ding khopmin Pakai chu alungsan ahi.

⁹ Songpheng teni, Pakaiyin nang hotoh akitepna songpheng teni chu ladinga molchunga kakaltou chun, nisomli le jan somli kaga umin, an kanepon, twi jong kadonpon ahi.

¹⁰Chule Pakaiyin Pathen khutjunga kisun songpheng ni eipen; hichea chun kikhoppi nikho-a Pakaiyin molsanga meikong lah-a kona nangho jah-a athusei jouse dungjuijin achunga chun akisunin ahi.

¹¹Chuin nisomli le jan somli kichai nichun ahitin ahi, Pakaiyin songpheng ni, kitepna songpheng teni ngei chu eipen ahi.

¹²Chuin Pakaiyin kajah-a, Kipatdoh-in, hikoma konhin chesuh loijin; ajehchu Egypt'a kona nahin puidoh namite khu amaho le amaho akisuboh-un; kathupeh lampi-a konin gangtah-in akihei mangun, amaho dingin akilhajol milim akisem taove, ati.

¹³Chukal valin Pakaiyin kahenga, Hiche mitehi kaven ahile, vetan, milouchalte ahiuve.

¹⁴Amaho hi kasuh manga, aminu vannoi'a kona kanoimang nadin kalolo neilosah jengin; chule nangma-a kona amaho sanga nasajole hatjo namkhat kasem ding ahi, ati.

¹⁵Hijeh chun kakiheijin molsanga konin kahung kumlhan, chuin molsang chu meijin akan; chule kitepna songpheng teni chu kakhut teni-a aumin ahi.

¹⁶Chuin kaven ahile, veuvin, Pakai na Pathen'u dounan nachon seovin, bongnou lim kilhajol nana kisemun; Pakaiyin nathupeh-u lampia konin gangtah-in nakihei mangun ahi.

¹⁷Chuin songpheng teni chu kalan, kakhut teni-a konin kaseplhan, namitmu tah-un kasuchip min ahi.

¹⁸Chuin amasa-a bang chun nisomli le jan somli Pakai angsunga kaboh khupmin; ama lunghansah dinga Pakai mitmu-a giloutah-a chonset nabol hou jouseu jehchun, an neloule twi donlouvin kaumin ahi.

¹⁹ Ajehchu nangho sumang dinga nachung uva Pakai lunghanna, alungsatna le alunglhai louna chu kakichan ahi. Ahivangin Pakaiyin hichepet jong chun kathu angaijin ahi.

²⁰Chuin Pakai chu Aaron chunga suhmang na ding khopmin alunghangin; Aaron dinjong hiche petchun kataovin ahi.

²¹Chuin nachonset nao, na bongnou kisemu chu kalan, meija kagouvin, leivui banga adi kahsen kachil goijin; chule adi chu molsanga kona longlha vachadunga chun kalehlut tai.

²² Chule Teberah'a, Massah'a, Kibroth-hatta-avah'a jong Pakai chu nalunghansah-uvin ahi.

²³ Chutobang chun Pakaiyin Kadesh-barnea'a kona nasol uva, Chetouvun lang keiman kapehnao gamchu galo taovin ati chun; Pakai na Pathen'u thupeh dounan nakiphin un, ama natahsan hih-un, athujong nangai pouvin ahi.

²⁴Nanghohi kahet nikhouva patnin Pakai dounan nakiphin un ahi.

²⁵Chutia Pakaiyin nangho suhmang ding ahi atijeh chun, amasa-a kabohkhup bangchun, nisomli le jan somli Pakai anga kaboh khupmin ahi.

²⁶Hijeh chun Pakai henga kataovin, Vo Pakai Pathen, naloupina vanga nalhat doh-a, khut thahat tah-a Egypt'a kona napuidoh nam mite le nagoulote hi sumanghih-in.

²⁷Nasoh Abraham, Isaac, chule Jacob chu geldoh inlang, hiche mite lungtahna, agitlouna le, achonset naohi vehih beh-in.

²⁸Achuti loule neihin puidohnao gam miten, Pakaiyin ateppehna gama apuilut theilou jeh le, aman amaho ahot jeh-a, gamthipma thagam dinga ahin puidoh-u ahi, tigetnunte.

²⁹Amavang nathahat thilboltheina le naban najahdoh-a nahinpuidoh namite le nagoulote ahiuve, katin ahi.