Read Thado Chin John 1 Bible Online

John 1 - Thado Chin bible

John 1

¹Atila chu Thu uma ahin, Thu chu Pathen toh uma ahi, chule Thu chu Pathen ahi.

²Hichu atila Pathen toh uma ahi.

³Thil jouse Ama vanga um ahi; aum jouse hi ama louva um khatcha jong aumpoi.

⁴Ama-a chun hinna aumin, chule hinna chu mihem vah ahi.

⁵Chuin vah chun muthim lah ahinsalin, ahin muthimin anahepoi.

⁶ Pathen'a kona hinkisol mi khat ahungin, ama chu amin John ahi.

⁷Ama vanga mi jousen atahsan theina dinga vah thudol chu hettohsah dinga, ama chu hunga ahi.

⁸Ama chu vah chu ahipon, vah thudol chu hettohsah dinga hung kisol joh ahibouve.

⁹Vannoi'a hungah mitin salvah chu vah tahbeh ahi.

¹⁰Ama chu vannoi'a ahung umin, chule vannoi hi ama sem ahi, ahin vannoi'in ama anahepoi.

¹¹Ama ama-ate henga hunga ahin, ama-aten anasang pouve.

¹²Ahivangin aman anasanga, ama mina tahsan chan chu, Pathen chate ahi theina dingu thaneina apetai,

¹³chuteho chu thisana kona peng hilou, tahsaphe lunglama kona peng jong hilou, mihem lunglama kona peng jong hilouvin, Pathen'a kona peng ahibouvui.

¹⁴Chuin Thu chu tahsaphe ahung soh-in, ilah uva ahung chengin, keihon aloupina, Pa-a kona chapa changkhatseh loupi chu, lungset le thutah dimsetnin kamutaove.

¹⁵John'in ama thudol chu ahettohsah len, Kanunga hunga chu keima sangin amasa jotai; ama keima masang peh-a um jingsa ahi jeh-in, tia kasei chu ama hi ahi, tin asame.

¹⁶Ajeh chu ama aletsetna kon chun, eiho lungset chunga lungset ichang taove.

¹⁷Ajeh iham itile danthu chu Mosi peh ahin; lungset le thutah chu Christa vanga hung umdoh ahi.

¹⁸Koiman imatih chanin Pathen amukhapoi; Pa oma beh jing Chapa changkhat chun aphondoh ahitai.

¹⁹Jerusalem'a kona Juda hon thempuho le danthu sunho John henga, Koi nahim? tia dong dinga asoluva, John thu hettohsah chu hiche ahi.

²⁰Aman aseidoh jenge, aseileppoi; Keima Christa kahipoi, tin aseidoh jenge.

²¹ Chuin amahon adongun, Koiba nahim? Elijah nahim? atiule aman, Kahipoi, ati. Themgao chu nahim, atiule, Kahipoi, ati.

²²Hijeh chun amahon ajah-a, Koi nahim? Eihinsol teho kadonbut theina dinguva, koi kahi nakitim? atiuve.

²³ Aman, Keima Isaiah themgao sei, Pakai lampi sem jangun tia, gamthipma khosam-a mi khat aw gin chu kahi, ati.

²⁴Ahung kisol miho chu Pharisai ho hinsol ahiuve.

²⁵Chuin amahon adongun ajah-a, Christa nahi louva, chule Elijah la nahi louva, themgao chula nahi loule, ibola baptize nachansah jiham, atiuve.

²⁶John'in adonbutnin ajah uva, Keiman twija baptize kachansah ji ahin, nalah uva nanghon nahet louvu mi khat adinge.

²⁷Ama chu ahi kanunga hunga, keisanga chungnungjo katichu, keima akengchot khao sutlham hoi jong kahipoi, ati.

²⁸Hicheng chu John'in baptize abolna, Jordan galla Bethabara [1] mun'a kibola ahi.

²⁹Ajingin ahenga Jesu ahung amun, hichun, Veuvin, vannoi chonset pomang, Pathen Kelngoinou khu!

³⁰Ama hi ahi, kanunga hunga keima sanga chungnungjo tia kasei chu, ijeh-inem itile ama keima masang peh-a anaumsa ahitai.

³¹Keiman ama kanahepoi; ahivangin Israel lah-a ama phondohna dinga, twija baptize chansah-a kahung ahi, ati.

³²Chuin John'in ahettohsah-in, Keiman vakhu banga Lhagao chu van'a kona ahung kumlhah-a achunga achuh kamun, achungah aumdentai.

³³Chule keiman ama kanahepoi, ahivangin twi'a baptize chansah-a eisola chun kajah-a, Nangman Lhagao ahung kum-a achunga aum namu chu, ama chu Lhagao Thenga baptize chansah ding chu ahi, eiti.

³⁴Chule keiman kamua, Ama hi Pathen Chapa ahi tia kahettohsah ahitai, ati.

³⁵Ajing nikhon John aseijui mini toh ana dingin;

³⁶Jesu avale chu agahven, Veuvin, Pathen Kelngoi nou khu! ati.

³⁷Chuin aseijuite ni chun athusei chu aja lhonin, Jesu nung ajui lhontai.

³⁸Chuin Jesu akiheijin, amanin anung ajui lhon chu amun, Ipi nahol lhonham, ati. Hichun amanin Rabbi (hichu houhil tina ahi) hoija na-umjim? ati lhone.

³⁹Chuin Aman, hung lhonin hung ve lhontan ati. Chuin ache lhonin aumna chu agamu lhonin, chuin hiche ni chun amatoh aum lhontai, hichu nidan som don ahi.

⁴⁰John thusei ja-a anung juite ni khatjoh chu Simon Peter sopipa Andrew ahi.

⁴¹Ama chun amasa penin asopipa Simon chu amun ajah-a, Messiah kamutaove, ati; hichu Christa tina ahi.

⁴²Hitichun Jesu hengah ahinpuijin ahi. Jesu'n ama chu aven, Jona chapa Simon nahi; Kepha nakisah ding ahi, ati (Hichu Peter [2] tina ahi).

⁴³Chuin ajingin Jesu'n Galilee gam lama che agon ahile, Philip amun ajah-a, neijuijin ati.

⁴⁴Philip chu Bethsaida khomi ahin, Andrew le Peter chenna khomama chu ahi.

⁴⁵Philip chun Nathanael amun ajah-a, Athudol Mosi'n danthu bu-a asut le themgaoho asutnu, Nazareth Jesu, Joseph chapa chu kamutaove, ati.

⁴⁶Chuin Nathanael chun ajah-a, Nazareth kho-a kona thil pha soh thei ngaijem, ati. Philip'in ajah-a, hungin lang hung vetan, ati.

⁴⁷Jesu'n Nathanael ahenga ahung amun, athudol aseijin; veuvin, Israel mitahbeh, phatlhemna nei louhel khu ati.

⁴⁸Nathanael'in ajah-a, Hoija kona iti neihet ham? ati. Jesu'n adonbutnin ajah-a, Philip'in nakou masanga theichang phung noija na-uma chu kamu ahitai, ati.

⁴⁹Chuin Nathanael'in adonbutnin, Rabbi, nangma Pathen Chapa nahi; nangma Israelte lengpa nahi, ati.

⁵⁰Jesu'n adonbutnin, Keiman najah-a, Theichang phung noija na-uma kamu ahitai, tia kasei jeh-a chu natahsan ham? Hiche sanga chu chungnungjo namu ding ahi, ati.

⁵¹ Chuin aman ajah-a, Tahbeh-a kaseipeh nahi, tunungle van akihona, Mihem Chapa chunga Pathen vantil ho akumsuh akaltou namu ding ahi, ati.