Read Thado Chin John 10 Bible Online

John 10 - Thado Chin bible

John 10

¹Keiman nangho tahbeh beh-a kaseipeh nahiuve, Koihile kotna lut louva, mun choma kala kelngoi hong sunga lutna chu guchale michom ahi.

²Kotna lut vang chu kelngoiho chinga ahi.

³Ama chu kotngahpan kot ahonjin, chule kelngoite chun a-aw aheuvin; chule aman akelngoiho chu amin cheh-in akouvin, apuidohjin ahi.

⁴Chule akelngoiho chu ahoidoh soh tengle, amasanguva achejin, kelngoiho chun anung ajuijiuve; ajeh chu amahon ama aw chu aheuve.

⁵Midang nung vang jui louhel ding ahiuve, akoma kona jammangjo ding ahibouvui; ajeh chu amahon midangho aw ahepouve, ati.

⁶Hiche thulem chu Jesu'n ajah uva aseijin; ahivangin athusei chu ipi aseina ahi ahepouve.

⁷Hijeh chun Jesu'n ajah uva asei kitleuvin, Keiman nangho tahbeh beh-a kaseipeh nahiuve, Keima hi kelngoi hong kot kahi.

⁸Keima masanga hungho jouse chu guchale michom ahi sohkeijui; ahinla kelngoihon athu-u anangai pouve.

⁹Keima hi kot chu kahi; mi keija lut chu huhhing-a umding ahi, chule lutle potle-a, chule hamhing amu ding ahi.

¹⁰Gucha chu agu dingle athat ding chule asumang dingabou hung ahi. Keima vang amahon hinna anei theina dinguva, chule aneibe chehna dinguva hunga kahi.

¹¹Keima kelngoi chingpha kahi. Kelngoi chingpha chun kelngoiho dingin ahinna apejie.

¹²Kelngoi chingtah tah hilou, kelngoiho ama-a hilou, thalah vang chun, ngei hung amu tengle kelngoiho chu adalhan ajamjitai; chutengle ngei chun amanin, kelngoiho chu asuchehji tai.

¹³Ijeh-inem itile ama thalah ahibouvin, kelngoiho ding chu imacha agelpoi.

¹⁴Keima kelngoi chingpha kahi, chule ka kelngoiho kahen, amahon jong keima eiheuve.

¹⁵ Pan keima eihet bangin keiman Pa chu kahei; chule kelngoiho dingin kahinna kapei.

¹⁶Hiche honga hilou jong kakelngoi kanei nalaije; keiman hiche ho jong chu kagahoilut ding, chule amahon ka aw ahetdingu ahi; chule hong khat, aching khat hung hidoh ding ahi.

¹⁷Keiman kahinna chu kakilah kit dinga kapeh ding ahin; hiche jeh-a chu Pan keima eingailut ahi.

¹⁸Khat touvin eilahpeh ding thu ahipoi, keiman kachama kapeh ding ahibouve. Keiman pehna ding thaneina kaneijin, chule kilah kit theina thaneina jong kaneije. Hiche thupeh hi ka Pa-a kona kamu ahi, ati.

¹⁹Thu chucheng jeh chun Judah ho abung bungin akikhen kit taove.

²⁰Alah uva tamtah-in, Hichepa hi thilha vop le mingol ahi; ibola athu nangaiju ham? atiuvin;

²¹Adangsen, Thu hitobang hi thilha vop thusei ahipoi. Thilhan mi mitcho ho amit ahasah thei ngaijem? atiuve.

²²Chuin Jerusalem'a houin thensona kut aumin, hichu phalbilai ahi.

²³Chuin Jesu houin'a Solomon hongcha-a chun avahlelen ahi.

²⁴Hichun Judah hon aum kimvelun, Itihchan nei lunggim sah dinguham? Christa nahile kichentah-in neisei peh-un, atiuve.

²⁵Jesu'n adonbutnin, Keiman najah uva kaseitan, ahivangin nanghon natahsan pouve. Ka Pa mina thil kabol chengse hi kathudol hettohsah ahi.

²⁶Ahivangin, najah uva kasei bangin, nangho kakelngoi lah-a nahilou jeh-un, natahsan pouve.

²⁷Keima kelngoiho vangin ka-aw aheuvin, keiman jong amaho kahei, chule amahon kanung eijui jiuve;

²⁸Chule keiman amaho chu tonsot hinna kapeji; chutia chu amaho itih chana mangthah lou ding ahiuvin, chujongle koiman kakhutna kona amaho chu eilahpeh lou ding ahi.

²⁹Ka Pa amaho keima eipe-a chu, ima jouse chunga chungnung pen ahin; chule ka Pa-a kona chu koiman alahpeh thei lou ding ahi.

³⁰Keimale Pa chu pum khat kahi lhone, ati.

³¹Chuin Judah hon asena ding song akilo kit taove.

³²Jesu'n amaho chu adonbutnin, ka Pa-a kona chu natohpha tamtah kavetsah nahitaove; chuche na kitongho hoipen jeh-a chu keima songa neiseu ham? ati.

³³ Judah hon adonbutnun, Naphatoh jeh-a songa kaseu ahipoi, Pathen nataitom jeh ahibouve; chujongle mihem nahinasa-a Pathen nakihisah jeh ahi, atiuve.

³⁴ Jesu'n amaho adonbutnin, Nangho hi pathenho nahiuve, kati ahi, tia nadan lekhabu uva kisun hih-am?

³⁵Pathen thu lhunnaho bon pathenho atia ahile, Pathen lekhabu thu chu keh thei ahipoi,

³⁶Pan asuhthenga vannoi'a asol chun, Pathen Chapa kahi, kati jeh-a ibola Pathen nataitome, neitiu ham?

³⁷Ka Pa na tonglou kahia ahile, neitahsan daovin.

³⁸Katoh ahivangle, Pa chu keija uma, chule keima Pa-a kaum hi nahet theijuva, natahsan theina dingun; keima neitahsan hih jongleu chun, na kitongho chengse behhi tahsan nun, ati.

³⁹Chuin amahon ama chu mat dingin ago kit taovin, ahinla ama akhutnuva konin apotdoh-in achemang tan ahi.

⁴⁰ Chuin Jordan gala, John'in amasa baptize achansahna lama chun achen; chukoma chun aga umtai.

⁴¹Chuin mi tamtah ahenga ahungun, amaho chun, John'in melchihna kidang ima avetsahpoi; ahin hichepa thudol John'in asei jouse tahbeh ahi sohkeije, atiuve.

⁴²Hiche koma chun mi tamtah-in atahsan taovin ahi.