Read Thado Chin John 11 Bible Online

John 11 - Thado Chin bible

John 11

¹ Chuin Mariam le asopinu Martha chenna Bethany kho-a chun, mi khat amin Lazarus atiu chu ati anan ahi.

² Chule ana-a chu Pakai thao nua, asama akeng theh ngima Mariam sopi pa Lazarus chu ahi.

³Hijeh chun asopi numei tenin Jesu henga mi asol lhonin, ajah-a, Pakai, ven, nangman nangailut pa chu anai, agati sah lhone.

⁴Jesu'n hichu ajah phatnin, Hiche nat hi thina ding ahipoi; hichea chu Pathen Chapa choi-atna aumna dinga Pathen loupina dingbou ahi, ati.

⁵Jesu'n Martha le asopinu chule Lazarus chu angailut ahi.

⁶Hiti chun anai ti ajah chun, aumna-a chun nini aumna laijin ahi.

⁷Chuin hiche nung chun aseijuiho jah-a, Judah gama che kit taohite, ati.

⁸Aseijuihon ajah-a, Rabbi, Judah ho chunla songa seding nagouvin; khu lama nache kit dingham? atiuve.

⁹Jesu'n adonbutnin, Ni khat sunga hi nidan somleni um louham? Mi khat sunlaija vahlea chu, vannoi vah amu jeh-in aki pal ngaipoi.

¹⁰Ahin jana vahlea vang chu, ama sunga vah aum lou jeh-in akipal jin ahi, ati.

¹¹Hicheng chu aseijin; chujouvin ajah uva, Igolpao Lazarus a-imutai; ahin a-imut sukhang dinga kache ding ahi, ati.

¹²Chuin aseijuihon ajah-a, Pakai, a-imut tah-a ahile damta vehta, atiuve.

¹³Jesu'n hichu athi aseina ahin, ahivangin amahon kicholdo dinga a-imut aseijin angaitouve.

¹⁴Hijeh chun Jesu'n ajah uva asei chenin, Lazarus athia ahitai;

¹⁵Nanghon natahsan theina dingun, chukoma kaum lou chu nangho dingin kakipah-e; hijongle tun hungun ahenga cheohite, ati.

¹⁶Hichun Didymus atiu, Thomas chun aseijui chankhompi ho jah-a, Cheovin, eiho jong amatoh thitha dingin cheohite, ati.

¹⁷Chuin Jesu ahung lhunin, lhana akoiju ni li ahitai ti ahetai.

¹⁸Bethany chu Jerusalem kom ahin, ching somle ching nga vela gamlha ahi.

¹⁹Chule asopipa lhon chungchanga lungmonsah dingin, Judah ho tamtah Martha le Mariam henga chun ahungun ahi.

²⁰Chuin Martha'n, Jesu ahunge ti ajah jah-in, apotdoh-in aga kimutopin; Mariam vang chu in'a chun atouna laije.

²¹Chuin Martha'n Jesu jah-a, Pakai, nangma hikoma um hile chun, kasopipa thi lou dinga.

²²Tu jengin jong, nangman Pathen henga nathum chan chu, Pathen'in napeh ding kahei, ati.

²³Jesu'n amanu ajah-a, Nasopipa thoudoh kit ding ahi, ati.

²⁴Martha'n ajah-a, Ni nunung ni-a thokit ni-a athodoh ding chu kahenai, ati.

²⁵Jesu'n amanu jah-a, Keima hi thokitna le hinna kahi; keima eitahsana chu, thi jongle, hing ding;

²⁶Chule koi hijongle ahinga keima eitahsana chu, itih hijongle thi lou ding ahi. Hiche hi natahsan em? ati.

²⁷Amanun ajah-a, Henge, Pakai, Nangma vannoi'a hung ding, Pathen Chapa, Christa chu nahi katahsane, ati.

²⁸Chuin amanun hiche chu asei jouvin, achen, asopinu Mariam guhthimin akouvin, Houhil chu hikoma aumin, nakouve, ati.

²⁹Chuin amanun hichu ajah jah-in, akipatdoh loijin, ahenga achetai.

³⁰Jesu chu khosung hung lut lou laija, Martha'n akimutopina mun'a chu umnalai ahi.

³¹Hichun Judah ho a-in'a aumpia alhembi ho chun, Mariam akipatdoh loija apotdoh chu amuvin, lhana kap dinga che ahi atiuvin, ajuijun ahi.

³²Chuin Mariam Jesu umna alhun phatnin, ama chu amun, akengphang bulah abohkhup jengin, ajah-a, Pakai, nangma hikoma um hile chun kasopipa thi lou dinga, ati.

³³Jesu'n hitia chu amanu aka amu-a, Judah ho ahin lhonpiho jong chu aka-u amu phatnin, alung sunga ahimsan, atinaje akimah jengin,

³⁴Hoija nakoijum, atin ahile; amahon, Pakai, hungin, hung vetan, atiuvin ahi.

³⁵Jesu akaptai.

³⁶Hijeh chun Judah hon, Veuvin, iti angailut hitam! atiuve.

³⁷Ahivangin alah uva abang bang chun, Mi mitcho mit hasah thei hiche mipa hin, hichepa jonghi athi sahda thei hilouham? atiuve.

³⁸Chuin Jesu asung gila ahimsa kitleuvin, lhan lama chun achetai. Alhan chu kohom khat ahin, akot chu song khatna kising ahi.

³⁹Jesu'n, Song chu tangdoh-un, ati. Athipa sopinu Martha chun, ajah-a, Pakai, tun a-uitai; ijeh-inem itile athina ni li ahitai, ati.

⁴⁰Jesu'n ajah-a, Natahsan le Pathen loupina namu ding ahi, tia kasei louham? ati.

⁴¹Hichun amahon mithi lupna-a konchun songchu aladoh un ahi. Chuin Jesu avandah-in, Pa, nangman kataona nangai jeh-in, kathangvah-e;

⁴²Chule nangman kataona nangai jinge ti keiman kahei; ahivangin hiche mipi kakimvela dingho hin nangma sol kahi hi atahsan theina dinguva, kati ahibouve, ati.

⁴³Chuin hichu asei jouvin, hasaptah-in asamin, Lazarus, hung doh-in, ati.

⁴⁴Hichun athipa chu akhut le akeng lhanpona kitom pumin; amai ultheh pona kitom pumin ahungdoh tan ahi. Jesu'n ajah uva, Lhamun lang che sah-un, ati.

⁴⁵Chuin Mariam henga hung Judah ho tamtah-in Jesu thibol hochu amuvin, atahsan taove.

⁴⁶Ahivangin abang kimkhat Pharisai ho henga acheuvin, Jesu thilbol chengse chu aga sei taove.

⁴⁷Hijeh chun thempu pipuiho le Pharisai ho chu akikhomun, Eihon ipi iboluham? Hichepa khunla melchihna tamtah abol jing jengin ahi.

⁴⁸Hiti mohlha leuhen, mi jousen ama tahsanun tin, chule Rome mite hunguva, imunu le ivaiju eilah mangpeh dingu ahi, atiuve.

⁴⁹Chuin alah uva khat, Caiaphas, chuche kum-a chu thempu chungnunga pang ahin, amachun ajah uva, Nanghon imacha nahehih heluve,

⁵⁰Chujongle vaipi aboncha amanthah louna dinga, miho dinga mi khat athi nangho dinga phajo ahi, ti jong nagelpouve, ati.

⁵¹Hiche chu aman ama chama asei ahipoi; chuche kum-a chu thempu chungnunga panga ahito lhona, vaipi dinga Jesu athi ding chu, gaova asei masah ahibouve.

⁵²Chule avaipiu chang ding hilouva, vannoi'a chehsa Pathen chate akhop khoma, pum khat ahidohna ding jong ahi.

⁵³Chuin chuche ni-a pat chun atha theina dingu lung angaitouvin akihousom taove.

⁵⁴Hijeh chun Jesu Judah ho lah-a lhang phongin avahle tapoi; ahin chua kon chun gamthip dep lama Ephraim atiu kho-a chun achen, aseijuite toh chua chun aum jing taove.

⁵⁵Chuin Judah ho kalchuh kut anaitan; agam agama konin mi tamtah kut masanga ana kisutheng dingin Jerusalem'a acheuvin ahi.

⁵⁶Chuin amaho chun Jesu aholun, houin'a chun adingun, khatle khat akihouvun, Ipi nangai touvem? Ama chu kut na hi hung lou dingham? akitiuve.

⁵⁷Thempu pipuiho le Pharisai hochun, Koi hijongle aumna he-a chun, amat theina dinguva avetsah dinguva, thupeh aneisao ahitai.