Read Thado Chin John 12 Bible Online

John 12 - Thado Chin bible

John 12

¹Chuin kalchuh kut masang ni gup in, anathisa athodoh kit Lazarus umna Bethany'a chun Jesu ahungin ahi.

²Chukoma chun ama dingin jan an asemun; chule Martha'n ajenlen, Lazarus vang chu ankonga amatoh touho lah-a chu panga ahi.

³ Chuin Mariam'in halpibei spikenard kiti thao namtui, man tamtah ser keh ahin choijin, Jesu keng anun, asamin atheh ngimin ahile, agimnam chun insung chu alosoh jengin ahi.

⁴Chuin aseijuiho lah-a khat, Simon chapa Juda Iscariot, amatsah-a pang dingpa chun,

⁵Ibola hiche thao hi dangka jakhat le somnga [3] mana kijoh-a, mivaicha gentheite kipe louham? ati.

⁶Aman hiche ati chu, vaicha genthei akhohsah-a asei ahipoi; ama chu gucha ahin, chule sumdip avop ahin, asunga kikoi chu akilahji jeh-a asei ahi.

⁷Chuin Jesu'n, amanu limsah hih-un; amanun kakivui ni-a dinga hiche hi akoi ahi.

⁸ Ijeh-inem itile vaichaho chu nang hotoh naum khom jing naove; ahin keima vang nang hotoh umjing ding kahipoi, ati.

⁹Chuin Jesu chukoma chun aume, ti aheuvin, Judah ho mi tamtah ama chungchang jeng hilouvin, athi lah-a kona athodoh Lazarus jong chu vet nom-in ahenga ahungtaove.

¹⁰Ahin thempu pipuihon Lazarus sana chu tha dingin akihousom taove.

¹¹Ajehchu ama jala Judah ho tamtah chemanguva, Jesu atahsanu ahi.

¹²Ajingin kutna dinga hung mipi atama tamin, Jesu Jerusalem'a dingin ahunge ti ajah phatnun,

¹³ Lusu na akidopmun, aga lamtouvin, Hosanna: Pakai mina hunga Israelte Lengpa chu anun nome; tin asam asamun ahi.

¹⁴Chuin Jesu'n sangan chalgol khat amun, achunga atouvin;

¹⁵ Vo, Sion chanu, kicha hih-in; ven, na Lengpa sangan nou chunga achongin, ahunge, tia kisun bang chu ahi.

¹⁶Hicheng thu chu amasan aseijuiten ahedoh pouve; ahin Jesu choi-atna aumdoh phat chun, hiche thu chu ama thudola kisunsa ahin, amahon hitia chu ama chunga abolu ahi, ti chu ageldoh taove.

¹⁷Aman Lazarus lhana kon akouva, athi lah-a kona athodoh pettah-a aumpi mipi chengse chu, athu hettohsah-a pang ahiuve.

¹⁸Hiche melchihna kidang abol ajah jehtah uva jong chu mipi chun alamtou ahi.

¹⁹Hijeh chun Pharisai ho amahole amaho akihouvun, Ima nalo thei louvu namuve; veuvin, vannoi'in anung ajuitai, atiuve.

²⁰Hiche kut na Pathen hou dinga hungho lah-a chun Greek mi phabep ajaovin;

²¹Amaho chu Galilee gama Bethsaida kho-a mi Philip henga ahungun, ajah-a, Pu, Jesu chu kamu nomui, ahung tiuve.

²²Philip ahungin Andrew jah-a ahung seijin, chuin Andrew Philip toh ahungin, Jesu jah-a asei lhone.

²³Chuin Jesu'n amaho chu adonbutnin, Mihem Chapa choi-at na aum ding phat ahung lhunge.

²⁴Keiman nangho tahbeh beh-a kaseipeh nahiuve, Chang chang khat tolla alhah-a athi loule achangin aum jingji bouve; athi vangle tamtah aga jin ahi.

²⁵ Ahinna ngailu-a chun achan ding; chule hiche vannoi leiset chunga ahinna ho-a chun tonsot hinna-a dinga akikoi ahi.

²⁶Koi hijongle kalhacha panga chun kanung eijuihen; keima umna-a chu, kalhacha jong umding ahi; mi koi hile kalhacha panga chu, Pa chun ajabol ding ahi.

²⁷Tun kalung adongtai; ipi kasei dingham? Pa, hiche nidana kon hin neihuh doh-in. Ahivangin hiche dinga hi tu nidan geija hi hung kahi.

²⁸Pa, namin choi-anin, ati. Chuin van'a konin aw ahung gingin, Kachoi-antai, chule choi-an kit nalai ding kahi, ati.

²⁹Hichun akimvela dinga mipi chun hichu ajauvin, Van aginge, atiuvin; adangsen, Vantil'in ajah-a thu asei ahi, atiuve.

³⁰Jesu'n adonbutnin, Hiche aw hi keima jeh-a hung ahipoi; nangho dingjoh ahibouve.

³¹Tu-a hi hiche vannoi hi athu kitan ahi; vannoi'a vaihompa chu kipaidoh ding ahitai.

³²Chule keima leija kona dop sanga kauma ahile, mi jouse kahenga kaloi khom ding ahi, ati.

³³Hichu iti thia athi ding seina-a hitia chu asei ahi.

³⁴ Hichun mipi chun adonbutnun, Keihonla Christa chu a-imatih chana umjing ahi, ti danthua kajauvin; Mihem Chapa dop sanga umding iti natiham? Hiche Mihem Chapa chu koiham? atiuvin ahi.

³⁵Chuin Jesu'n ajah uva, Vah hi nalah uva chomcha khat umnalai ding ahi; muthimin nahinphah ma-un vah aumpet hin vahleu vin; ijeh inem itile muthima vahlea chun achena ding ahepoi.

³⁶Vah chate nahi theina dingun, Vah chu nanei petchao hin, vah chu tahsanun, ati. Thu hicheng hi Jesu'n aseijin, apotdoh-in amaho-a kon chun akiseltai.

³⁷Ahin alah uva melchihna kidang tamtah abol vangin, amahon atahsan pouve.

³⁸ Hiche hi Isaiah themgaovin, Pakai, kathuseiju kon atahsanem? Chule Pakai ban thahat koi henga kilangam? tia asei chu guilhun theina ding ahi.

³⁹Hiche thua hin Isaiah'in asei kitleuvin,

⁴⁰ Aman amitnu asuchon, alungu asutah tai; Achuti loule amitnun muvintin, chule alungun heuvintin, chule hung kihei kitnun tin, Keiman boldam get inge, ati; hiche jeh-a hi amahon atahsan thei louvu ahi.

⁴¹Hiche hi Isaiah'in ama loupina chu ana mu-a, ama thudol aseina-a kona, asei ahi.

⁴²Achuti vangin vaipoho jeng jong tamtah-in atahsan taove; ahinla Pharisai ho jeh chun, kikhopna-a konin eikikaidoh khante tin aphongdoh aumpouve;

⁴³Ajeh chu amahon Pathen choiat sanga mihem choiat adeijoh-u ahi.

⁴⁴Jesu'n aw sangtah-in asamin, Koi hijongle keima eitahsan chun, keima hilouva, eisolpajoh atahsan ahibouve.

⁴⁵Chule keima eimu-a chun eisolpa amu ahi.

⁴⁶Koi hijongle keima eitahsana chu muthima aum louna dinga, keima vah kahia vannoi'a kahung ahi.

⁴⁷Mi khattouvin kathu jahen, tahsan hih jongle athu katanpoi; ijeh-inem itile keima vannoi thutana hung kahipoi, vannoi huhhing ding joh-a hung kahibouve.

⁴⁸Koi hijongle keima eidei louva, kathu jong jop lou chu, athutanna khat aumnai; kathusei hochun ni nunung nile athu atan ding ahi;

⁴⁹ijeh-inem itile keiman kathuneina-a kasei ahipoi; ahin eisola Pa chun kasei dingle kahil dinga thupeh eipeh ahibouve.

⁵⁰Ama thupeh chu tonsot hinna ahi, ti kahei; hiche jeh-a chu kathusei hi Pan eihil bang banga kasei ahi, ati.