Read Thado Chin John 13 Bible Online

John 13 - Thado Chin bible

John 13

¹Kalchuh kut masangin, Jesu'n hiche vannoi'a kona a-Pa henga ache ding phat ahung lhungtai, ti ahen, Vannoi'a um ama-a ho chu angailun akhon ni geijin angailu lhumkeije.

²Chuin jan anneh kichaijin, diabol chun Simon chapa Judas Iscariot lung sunga ama matsahna ding lungthim akhumpeh tai.

³Jesu'n, Pan thil jouse ama khutna apeh, chule ama Pathen'a kona hungdoh ahia, Pathen henga chea ahi chu ahen;

⁴Ajan anneh ankonga konin akipatdoh-in, chuin aposil akoijin, tinotpon alan, akong akigah-in ahi.

⁵Chuin aman kisilna kong-ah twi alheijin, aseijuiho keng asilin, akong gahna tinotpon chun atheh pantan ahi.

⁶Chuin ama Simon Peter koma ahungin ahile aman ajah-a, Pakai, nangman kakeng neisilpeh dingham? atin ahile,

⁷Jesu'n adonbutnin ajah-a, Kabol hi nangman tun nahepoi; ajole henan nate, ati.

⁸Chuin Peter'in ajah-a, Nangman itih hijongle kakeng nasil louhel ding ahi, ati. Jesu'n adonbutnin ajah-a, Keiman nangma kasil loule keija nangman chan nanei lou ahi, ati.

⁹Simon Peter'in ajah-a, Pakai, kakeng keojeng hilouvin kakhut le kalu jonge, ati.

¹⁰Jesu'n ajah-a, Akisil jousa chu akeng tailou adang sil lou akhohpoi, apumpin angimsoh nai; chule nangho nangim naove, ahivangin nabonchao nahipouve, ati.

¹¹Ijeh ham itile ama matsah-a pang dingpa chu aman ahetsa ahin; hiche jeh-a chu, aman, Nabonchaovin nangimpouve, ati ahi.

¹² Aman akengu asil jouvin, apon akilah-in atou kitnin, amaho jah-a chun, Nachung uva ipi bola kahi chu nahetnah-um?

¹³Nanghon keima Houhil le Pakai neitiuve; hiche natiu chu aphai, ijeh-inem itile keima hichu kahi.

¹⁴Hijeh chun keima Pakai le Houhil bonin nangho keng kasil leh, nanghon jong khatnin khat keng naki silpeh to dingu thu ahi.

¹⁵Ajeh chu keiman nangho kabol banga chu nanghon jong nabolna dinguva, vetsahna-a kabol ahi.

¹⁶ Keiman nangho tahbeh beh-a kaseipeh nahiuve, Pakai sangin soh achungnung jopoi, asola sangin solchah jong achungnung jopoi.

¹⁷Hitiho hi nahetdoh uva nabol ule nangho anun noma nahiuve.

¹⁸ Nangho nabon chaova thudola kasei ahipoi; keiman kalhendohho chengse chu kahenai; Ahivangin changlhah eineh khompi pan kachunga akengto alamtai, ti Pathen lekhabua thu guilhun theina dinga ahi.

¹⁹Tu-a kala ahung guilhun tengle, keima hi ama chu kahi nahetna dinguva, ahung guilhun masanga kaseipeh nahiuve.

²⁰ Tahbeh beh-a kaseipeh nahiuve, Koi hijongle kamisol sang chan chun keima eisan ahi; chule keima eisang chan chun eisolpa asan ahi, ati.

²¹Chuin Jesu'n hiche chu aseijin, alungdong lheh jengin, ajah uva, Tahbeh beh-a kaseipeh nahiuve, nalah uva khat eipedoh-a pang ding ahi, tin aphongdoh tan ahi.

²²Seijui ho chu khatle khat akive touvin, koipen asei ahi agelmove.

²³Hichea chu aseijuiho lah-a khat, Jesu'n angailut chu a-anga kingai ahin;

²⁴Simon Peter'in Koi pen aseina ham dongin tin amitnin agah houpin ahi.

²⁵Hichun ama akingai bang chun akingaijin, Pakai, hiche chu koiham? tin adongin ahi.

²⁶Jesu'n adonbutnin, Hiche changlhah hal hi kade-a kapeh dingpentah chu ama chu ahi, ati. Chuin aman changlhah hal chu adekot jouvin alan, Simon chapa Judas Iscariot chu apetai.

²⁷Chuche changlhah hal akisan joutah chun Satan asungah alut tan; chuphat chun Jesu'n ajah-a, Nabol ding chu bol loijin, ati.

²⁸Ahivangin aman ipi dola achuti sei ahi ankonga touho khatchan jong ahedoh pouve.

²⁹Ijeh-inem itile kimkhatnin, Judas khutna sumbom aum jeh-a chu, kutna dinga imanchah dingu gacho-in atiham; ahiloule, vaichaho ikhattou pe dinga Jesu'n asolin angaitouvin ahi.

³⁰Chuin aman changlhah hal chu akisan jouvin hiche pettah chun apotdoh paijeng tai. Chule hichu jan ahi.

³¹Chutichun amapa apotdoh jouvin Jesu'n, Tun Mihem Chapa choi-atnin aumtai, ama-ah Pathen jong choi-atnin aumtai.

³²Ama-a Pathen choi-atna aumle, Pathen'in jong amatah-a ama chu achoi-at ding ahi, chule achoi-at pai jeng ding ahi.

³³ Chapang neochaho, nang hotoh chomcha khat kaum nahlai ding ahi. Nanghon neihol dingu; ahivanga Judah ho jah-a kasei banga, tu-a nangho jah-a jong kasei ahi, Keima chena-a chu nangho nahung thei lou dingu ahi.

³⁴ Keiman nangho thupeh thah kapeh nahiuve, Nangho khatle khat kingailuto cheh-un; keiman nangho kangailut bangu hin nangho jong khat le khat kingailuvin.

³⁵Nangho nangho lah-a naki ngailut tocheh uva nahiule, nangho chu keima seijui nahiu hichea chu mi jousen ahet ding ahi, ati.

³⁶Simon Peter'in adongin, Pakai, nangma hoilama nache dingham? ati. Jesu'n adonbutnin, Tun nangma kachena-a kanung nunga hungthei pon nate, ajo vangle kanung nunga nahung ding ahi, ati.

³⁷Peter'in ajah-a, Pakai, ibola tu-a nanung nunga kahung thei lou dingham? Nangma jala kahinna jong kapeh ding ahi, ati.

³⁸Jesu'n adonbutnin, Keima jala nahinna napeh dingham? Keiman nangma tahbeh beh-a kaseipeh nahi, thumvei nei seilep masangse-a ahchal khong lou ding ahi, ati.