Read Thado Chin John 14 Bible Online

John 14 - Thado Chin bible

John 14

¹Nangho lungkham hih-un; Pathen tahsanun, keima jong neitahsanun.

²Ka Pa in'ah chenna in nom tamtah aume; umlou hile najah uva kaseitah hih dingham; ajeh chu keima nangho ding mun sema che ding kahi.

³Chule nangho ding mun sema kache-a ahile, keima umna-a chu nangho jong naum theina dinguvin, keima hung kitning ting, kahenga dinga kahung puiding nahiuve.

⁴Kachena ding nanghon naheuvin, chule alampi nahenaove, ati.

⁵Thomas'in ajah-a, Pakai, nachena dingbon kihe lou uva, alampi iti kahet dingu ham? ati.

⁶Jesu'n ajah-a, Keima hi lampi, thutah, chule hinna chu kahi; keija che lou chu koima Pa kom alhungpoi.

⁷Nanghon keima neiheleu chun, ka Pa jong chu nahet dingu ahitai; tu-a kal vang he jong naheuvin, mu jong namutaove, ati.

⁸Philip'in ajah-a, Pakai, Pa chu neimusah-un, hichu keiho dinga phaset ahi, ati.

⁹Jesu'n ajah-a, Vo Philip, keima hitihchan nang hotoh kauma jong neihet loulaiham? Keima eimu-a chun ka Pa amu ahitai; achutile Pa chu neimusah-un, iti natiham?

¹⁰Keima Pa-a kaum chule Pa jong keija aum hi natahsan louham? Keiman nangho jah-a thu kasei chengse hi keima chama kasei ahipoi; Pa chu keija uma na atoh ahibouve.

¹¹Keima Pa-a kaumin chule Pa jong keija aume kati hi tahsanun; ahilou jongle na kitong chengse jehtah hin tahsanun.

¹²Keiman tahbeh beh-a kaseipeh nahiuve, keima eitahsana chun, kathilbol chengse hi aman jong abolding ahi; chule asanga lenjojo abolding ahi, ajehchu keima ka Pa henga kache ding ahitai.

¹³Chule Pa chu Chapa-a choi-atna aumna dinga, ipi hijongle keima mina nathum chanu chu kabolpeh ding nahiuve.

¹⁴Keima mina ipi hijongle nathum chanu chu, kabolpeh ding nahiuve.

¹⁵Keima neingailut ule, kathupeh ho nitnun.

¹⁶Keima Pa henga taoving ting, chule Aman nangho a-imatih chana naumpi jing dingu, Lhamonsah achom dang khat napeh dingu;

¹⁷Thutah Lhagao ngeichu napeh dingu ahi; amachu vannoi'in asang thei pouve, ajehchu mu jong amupouvin, he jong ahepouve; nanghon vang naheuve; ajeh chu ama nangho sunga chenga ahi, um jong hung umding ahi.

¹⁸Keiman nangho kaihoi beijin dalha pouvinge; naheng uva kahung kit ding ahi.

¹⁹Chomkhat joule vannoi min eimu lou ding ahitai, nanghon vang neimu dingu ahinai; ajehchu keima kahin jeh-a, nangho jong nahin dingu ahi.

²⁰Hiche ni chule keima Pa-a kaum, nangho keija na-umu, chule keima nangho-a kaum hi nahet dingu ahi.

²¹Kathupeh ho neija chule nitna chu, eingailua ahi; chule keima eingailua chu ka Pan angailut ding, chule keiman ama chu kangailut na, ahenga kakiphon ding ahi, ati.

²²Judas (Iscariot hilou) in ajah-a, Pakai, nangma keiho henga nakiphona vannoi mi henga nakiphon lou ding chu itidan ham? ati.

²³Jesu'n adonbutnin ajah-a, Mi eingailua chun kathu anit ding, chule ka Pan ama chu angailut ding, chule ahenga chu kahunguva, ama chu kachenpi dingu ahi.

²⁴Keima eingailu lou chun kathu jong anitpoi; chule nathu jah-u keija ahipoi, eisola Pa-a chu ahibouve.

²⁵Keiman nangho kaumpi petna thu hicheng hi kaseipeh nahiuve.

²⁶Ahinla Pan kamina ahinsol ding Lhamonsah, Lhagao Theng chun, imajouse nahil sohkei dingu, chule najah uva kathusei chengse hi nageldohsah dingu ahi.

²⁷Lungmon kadalhahpeh nahiuve; kalungmon kapeh nahiuve; kapeh hi vannoi mi peh bang ahipoi; nalungu donsah hih-un, kicha jong kicha hih-un.

²⁸Keima kachemanga, chule naheng uva kahung kit ding ahi kati chu najataove. Neingailut ule Pa henga kache ding ahi tia najah uva kasei jeh-a hi nakipa nathanop dingu ahi; ijeh-inem itile Pa chu kei sanga chungnungjo ahi.

²⁹Ahung guilhun tengle natahsan theina dinguva, tu-a aguilhun masanga najah uva kasei masah dem ahi.

³⁰Najah uva thu tamsei taponge; ijeh-inem itile vannoi lengpa hung ding ahitai; chule aman keijah imacha aneipoi;

³¹Ahinla keiman Pa chu kangailut na, chule Pa chun eithupeh bang banga na katoh ahi hi, vannoi miten ahetna ding ahi. Kipatdoh-un, hikoma konin chetao hite.