Read Thado Chin John 15 Bible Online

John 15 - Thado Chin bible

John 15

¹Keima lengpigui tahtah kahi; chule ka Pa aleilhou ahi.

²Keija um abah aga lou lou chu aman apaidohjin; aga chengse chu aha ga chehna dingin amal ngimjin ahi.

³Nangho jah-a kathusei vanga chu nangho angimsa nahitaove.

⁴Keijah um jingun, kei jong nangho-a uminge. Abah lengpiguija aum loule achanga aga thei lou banga chu, nangho jong keija naum louvule naga thei lou dingu ahi.

⁵Keima lengpigui kahi, nangho abah nahiuve. Ama keija uma, Keima ama-a kaum mi chu hagan agaji; ajeh chu kei louvin nanghon ima nabol theipouve.

⁶Mi keija umlou chu, abah bangin paidoh-in aumjin, chule agopjin; chule min hicheho chu achom khomun mei sungah asep lutjiuvin ahile akavamjitai.

⁷Nangho keija naum uva, chule ka thu nangho-a aum jinga ahileh, nagotchan thumun, kibolpeh ding nahiuve.

⁸Hichea hin nangho haga nagau hin ka Pa choi-at nin aumji; chule hitia chu nangho kaseijui nahi dingu ahi.

⁹Pan keima eingailut bang banga, keiman jong nangho kangailut nahiuve; kangailutna-a hin um jingun.

¹⁰Keiman ka Pa thupeh ho kanit sohkeija, angailutna kaum bang hin; nanghon kathupeh ho nitleu chun, kangailutna-a naum jing dingu ahi.

¹¹Kakipana nangho-a aum jingna dingle, nakipanao akimna dinga, hicheng thuhi najah uva kasei ahi.

¹² Kathupeh hiche hi ahi, keiman kangailut bangu hin, nangho khatle khat kingailuto cheh-un.

¹³Min ajol agol dinga ahinna apeh sanga ngailut chungnungjo koiman aneipoi.

¹⁴Kathupeh nabol uva ahile, nangho hi kajol kagol nahiuve.

¹⁵Tukal keiman nangho soh kati lou ding nahitaove; ijeh-inem itile soh chun apakai thilbol ahepoi. Golte kati nahitaove; ijeh-inem itile ka Pa-a kona kajahho jouse aboncha nangho kahetsah soh nahitaove.

¹⁶Nanghon keima neilhenu ahipoi, keima joh-in nangho kalhen doh-a, nacheuva haga nagauva chule nagau aumna dinga kapansah nahiuve; chutia chu ipi hijongle Pa henga kamina nathum chanu chu, aman napeh dingu ahi.

¹⁷Nangho khatle khat naki ngailut to chehna dinguva, thupeh hicheng hi kapeh nahiuve.

¹⁸Vannoi'in nahot ule, nangho nahot masang uva keima eihot chu naheuve.

¹⁹Nangho vannoi'a hileu chun vannoi'in ama-a chu angailut ding ahi; hinlah tun nangho vannoi'a nahi louvu, vannoi'a kona keiman kalhendoh nahiuvin, hiche jeh-a chu vannoi'in nahotnu ahi.

²⁰ Najah uva, Soh apakai sangin achungnung jopoi, tia kathusei chu geldoh-un. Amahon keima eibolset nule, nangho jong nabolset dingu ahi; kathu nitleu, nangho thu jong anit dingu ahi.

²¹Ahin amahon eisolpa ahetlou jeh uva chu, thil hicheng hi keima min jala nachung uva ahinbol dingu ahi, .

²²Keima kahunga ajah uva thu kahung sei lou hile, chonset anei lou dingu ahin; tuvangin achonset apaomea akilepna dingu aumtapoi.

²³Keima eihoa chun ka Pa jong ahot ahi.

²⁴Keiman alah uva mi koima dangin abol khah lou thil kabol lou hile, chonset anei lou dingu ahin; tuvangin amahon keima le ka Pa kakop lhonin eimutaovin, ho jong eiho taove.

²⁵ Ahoi hijongle adanthubu uva, Ajeh beijin eihove, tia kisun chu guilhuna dinga abolu ahi.

²⁶Ahin keiman Pa koma kona kahinsol ding Lhamonsah, Pa-a kona hungpotdoh Lhagao Theng chu ahungteng, Ama chun keima thudol ahettohsah ding;

²⁷Chule nangho jong atila pat kaumpi jing nahi jeh uva chu, kathu hettohsah-a napan dingu ahi.