Read Thado Chin John 16 Bible Online

John 16 - Thado Chin bible

John 16

¹Nakipal lhuh louna dinguva, thu hicheng hi kaseipeh nahiuve.

²Amahon kikhopna-a kona nahin kaidoh dingu; koihile nathat chanu chu Pathen dinga napha tonga kingaito ding phat chu hung lhung ding ahi.

³Amahon Pa le keima eihet loujeh uva, thil hicheng chu nangho chunga aboldingu ahi.

⁴Ahivangin hitiho phat chu ahung lhun tengle, keimatah-in kaseipehsa chengseu hi nageldohna dinguva, thu hicheng hi kaseipeh nahiuve. Keiman nangho kaumpi jeh uva, atila chu kanasei lou ahi.

⁵Tuvanga eihinsolpa henga kache ding ahitai; ahivangin, Hoija nache dingham? tin koiman neidong pouve.

⁶Ahin thu hicheng chu kasei jeh-in, nalungu lunghem adimjotai.

⁷Hijongle keiman nangho thutahbeh kaseipeh nahiuve; kache dinghi nangho dinga phajo ahi; ijeh-inem itile keima kache loule Lhamonsah chu naheng uva hung lou ding ahi; kache vangle, keiman ama chu naheng uva kahinsol ding ahi.

⁸Chule Ama chu ahung teng, vannoi mitehi chonset thudol, chonphat thudol, chule thutan thudola themmo achan aphotchet ding ahi:

⁹Chonset thudola athemo naochu, ajehchu amahon keima eitahsan pouve;

¹⁰Chonphat thudola athemo naochu, ajehchu keima ka Pa henga che ding kahin, chule nanghon keima neimulou dingu ahitai;

¹¹Chule thutan thudola athemo naochu, ajehchu hiche vannoi pipupa thu kitana ahitai.

¹²Nangho jah-a sei ding thu tamtah kaneije, hijongle tun nadol joupouve.

¹³Thutah Lhagao chu ahung teng vangle, ama chun thutah lam jouse-a nangho napuihoi dingu ahi; ijeh-inem itile aman achama asei lou ding, ajah chan asei dingbou ahi; chule aman khonung thil hunglhung dingho namusah dingu ahi.

¹⁴Ama chun keima eichoi-at ding ahi; ijeh inem itile aman keima-a um chengse chu alah-a, chule nangho nahetsah dingu ahi.

¹⁵Pa nei chengse chu aboncha keija ahin; hiche jeh-a chu, Aman keima-a um chengse chu alah-a, nangho nahetsah dingu ahi, tia kasei ahi.

¹⁶Chomkhat joule nanghon keima neimulou dingu ahitai; chule chomcha khat joule neimukit dingu ahi, ajeh chu Pa koma cheding kahi, ati.

¹⁷Hichea chun aseijuiho khatle khat akihouvun, Chomkhat joule neimu lou dingu; chule chomcha khat joule neimu kit dingu; chule, ijeh-inem itile keima Pa henga che ding kahi ati hi ipi eiseipeh-u hintem? akitiuve.

¹⁸Hijeh chun amahon, Chomcha khat jou, ati hiche hi ipi ati naham? ipi asei ahi ihepouve, atiuve.

¹⁹Adoh nomu chu Jesu'n ahen, ajah uva, Chomcha khat joule neimu lou dingu, chomcha khat joule neimu kit dingu, kati chu itidol ahi khatle khat kidongtoa nahiuvem?

²⁰Keiman nangho tahbeh beh-a kaseipeh nahiuve, Nangho nakauva chule namao dingu, vannoi mite vang kipah ding ahiuve; nangho nalunghem dingu, ahivanga nalunghemnau chu kipana hung sohdoh ding ahi.

²¹Numei naoso natnin aphah tengle alunghem lhehji-e, ajeh chu aphat hunglhunga ahitai: ahin acha chu asolhah teng vangle, vannoi'a mihem khat apen jeh chun akipahjin, alungdon hesoh chu aheji tapoi.

²²Hiche banga chu nangho jong tu-a nalunghemu ahi; ahivangin keiman nangho kamukit ding nahiuve, chutengle nalungu kipah ding, chule hiche nakipanao chu koiman nalahpeh lou dingu ahi.

²³Hiche nikho chule keima imacha neidoh lou dingu ahi. Keiman nangho tahbeh beh-a kaseipeh nahiuve, Pa henga ipihile keima mina nathum channu chu, aman napeh dingu ahi.

²⁴Tu geihin nanghon kaminin ima nathum hihlai juve; nakipanao suhchamkima aumna dingin, thumun chutile namu dingu ahi.

²⁵Thu hicheng hi keiman nangho jah-a alema kasei ahi; alema sei louva, phongtah-a nangho Pa thu kahetsahna dingu phat hung lhung ding ahi.

²⁶Hiche ni chule kamina nathum dingu ahi; chule nangho dingin keima Pa henga taovinge, kati ahipoi;

²⁷Ijeh-inem itile Pa amatah-in nangho nangailu uve, ajehchu nanghon keima neingailuvin, chule keima Pathen na kona hung kahi natahsan taovin ahi.

²⁸Keima Pa koma kona vannoi'a hunga kahin; avela, vannoi kadalhah-a Pa henga che kit ding kahi, ati.

²⁹Chutah-in aseijuiten, Ven, nangman tun thu alema seita louvin, phongtah-in naseije.

³⁰Nangman ijakai nahesoh-in, chule mi koimachan nangma nadoh ding chu nangaipoi, ti tun kahe taove. Hichea kon hin nangma Pathen koma kona hung nahi ti katahsanui, atiuve.

³¹Jesu'n amaho chu adonbutnin, Tuabou natahsan um?

³²Veuvin, nangho nangma nangma-a cheh-a navacheh sohkeijuva, keima kachanga neidalhah dingu phat ahung lhunge, henge, ahung lhungtai; ahivangin keima kachang kahipoi, ijeh-inem itile Pan keima eiumpinai.

³³Nanghon keija lungmonna namu theina dinguva, thu hicheng hi najah uva kasei ahi. Vannoi'a hesoh gentheina nanei dingu ahi; ahivangin kipah-un; keiman vannoi kajoutai, ati.